សារព័ត៌មានបរទេសកាលពីពេលថ្មីៗកន្លងមកផ្សាយថា សហរដ្ឋអាមេរិកបានបង្កើតសារមន្ទីរសិល្បៈលើកដំបូងនៅក្នុងទឹកឈ្មោះ «underwater art museum» ។ សារមន្ទីរនេះមានដាក់តាំងបង្ហាញរូបសិល្បៈនៅក្នុងឈូងសមុទ្រម៉ិកស៊ិក នៅខាងក្រៅឆ្នេរក្នុងរដ្ឋផ្លរីដា សហរដ្ឋអាមេរិក និងបង្ហាញសមិទ្ធផលសិល្បៈចំនួន៧ប្រភេទកើតចេញពីស្នាដៃរបស់វិចិត្រករជាច្រើនរូប ។
សមិទ្ធផលទាំងនោះស្ថិតនៅក្នុងជម្រៅទឹក១៨ម៉ែត្រ ឆ្ងាយពីបរិវេណឧទ្យាន «Grayton Beach» ជាតំបន់ឆ្នេរនៅក្រុងសានតារ៉ូសា ប្រហែល១,៦គីឡូម៉ែត្រ ។ សារមន្ទីរនោះនឹងសម្រួលឲ្យការមុជទឹកកាន់តែមានភាពល្អប្រសើរឡើង ព្រោះអ្នកមុជទឹកមិនត្រឹមតែបានឃើញសត្វនៅក្នុងសមុទ្រប៉ុណ្ណោះទេ ពួកគេនឹងបានឃើញរូបសិល្បៈដែលមនុស្សជាអ្នកបង្កើត ឃើញរូបចម្លាក់ក្ដាន់ លលាដ៍ក្បាល និងសមិទ្ធផលដទៃទៀតគួរឲ្យចាប់អារម្មណ៍ ។
សារមន្ទីរនោះនឹងបើកឲ្យចូលទស្សនាដោយឥតគិតថ្លៃ ប៉ុន្តែអ្នកចូលទស្សនាត្រូវមានលិខិតធានាពីការមុជទឹក ទើបអាចមុជទឹកទៅទស្សនាបាន ៕
ចែករំលែកព័តមាននេះ