រាជធានីភ្នំពេញ ៖ កាលពីជាង១ឆ្នាំមុននេះ ឈ្មួញបាននាំចូលជ្រូករស់ទាំងស្របច្បាប់ និងខុសច្បាប់រាប់ពាន់ក្បាលក្នុង១ថ្ងៃៗពីប្រទេសវៀតណាមមកផ្គត់ផ្គង់ ធ្វើឲ្យតម្លៃជ្រូកក្នុងស្រុកធ្លាក់ចុះយ៉ាងគំហុក និងបង្ខំឲ្យអ្នកចិញ្ចឹមមួយចំនួនបោះបង់ចោលរបរនេះចោល។ ប៉ុន្តែបច្ចុប្បន្ន ឈ្មួញបានបង្វែរមកនាំចូលពីប្រទេសថៃវិញ ដោយសារកត្តាចាំបាច់មួយចំនួន…
រាជធានីភ្នំពេញ ៖ កាលពីជាង១ឆ្នាំមុននេះ ឈ្មួញបាននាំចូលជ្រូករស់ទាំងស្របច្បាប់ និងខុសច្បាប់រាប់ពាន់ក្បាលក្នុង១ថ្ងៃៗពីប្រទេសវៀតណាមមកផ្គត់ផ្គង់ ធ្វើឲ្យតម្លៃជ្រូកក្នុងស្រុកធ្លាក់ចុះយ៉ាងគំហុក និងបង្ខំឲ្យអ្នកចិញ្ចឹមមួយចំនួនបោះបង់ចោលរបរនេះចោល។ ប៉ុន្តែបច្ចុប្បន្ន ឈ្មួញបានបង្វែរមកនាំចូលពីប្រទេសថៃវិញ ដោយសារកត្តាចាំបាច់មួយចំនួន ស្របពេលតម្លៃកើនឡើងគួរឲ្យកត់សម្គាល់ ។
បើតាមលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានមានប្រសាសន៍តាមទូរស័ព្ទកាលពីថ្ងៃទី១០ មិថុនា ថា មូលហេតុដែលឈ្មួញបញ្ឈប់ការនាំចូលពីវៀតណាម ដោយសារតម្លៃជ្រូករស់នៅក្នុងប្រទេសវៀតនេះឡើងថ្លៃខ្ពស់ ធើ្វឲ្យពួកគេមិនអាចចំណេញ ។ លោកថា ៖« សព្វថ្ងៃនេះ តម្លៃជ្រូករស់នៅប្រទេសវៀតណាមបានឡើងខ្ពស់ណាស់ មិនអាចឲ្យឈ្មួញបន្តនាំចូលមកកាន់ទីផ្សារកម្ពុជាបានទេ។ ដូចនេះ ពួកគេបានបង្វែរទៅនាំពីប្រទេសថៃចូលមកផ្គត់ផ្គង់វិញ »។
លោកបន្តថា នៅពេលជ្រូកវៀតណាមឡើងថ្លៃខ្ពស់បែបនេះ ក៏បានធ្វើឲ្យតម្លៃជ្រូករស់នៅលើទីផ្សារកម្ពុជាឡើងខ្ពស់ដែរ ។ ជាក់ស្ដែង នៅលើទីផ្សារកម្ពុជាអាចមានតម្លៃរហូតដល់៩.៥០០រៀល ហើយទាបបំផុតត្រឹម៨.៥០០រៀលដែរក្នុង១គីឡូក្រាម ។ ការឡើងថ្លៃបែបនេះ បានធ្វើឲ្យកសិករ និងម្ចាស់កសិដ្ឋានមួយចំនួន ដែលទ្រាំបន្តចិញ្ចឹមកាលពីជ្រូកធ្លាក់ថ្លៃខ្លាំង គាត់សប្បាយរីករាយនឹងទទួលយកតម្លៃជ្រូកនាពេលបច្ចុប្បន្ន។ ប៉ុន្តែចំពោះអ្នកដែលបានបោះបង់ចោលការចិញ្ចឹមនោះ កំពុងតែស្ដាយ និងស្ទាក់ស្ទើរក្នុងការចាប់អាជីវកម្មនេះឡើងវិញ ។
លោកថា ៖« ឃើញវាឡើងថ្លៃបែបនេះ មិនប្រាកដថា នៅថ្ងៃខាងមុខឡើងថ្លៃរហូតទេ វាអាចនឹងធ្លាក់ថ្លៃវិញ នៅពេលជ្រូកវៀតណាមធ្លាក់ថ្លៃដែរ » ។
លោក ស្រ៊ុន ពៅ បន្តទៀតថា បើទោះបីជាបច្ចុប្បន្ននេះ តម្លៃជ្រូករស់នៅកម្ពុជាបានឡើងខ្ពស់ក្តី តែទីផ្សារនេះមិនទាន់ដឹងថា វាមានស្ថិរភាពនឹងនរបានយូរប៉ុនណាទេ ពីព្រោះទីផ្សារជ្រូករស់ក្នុងស្រុកគឺពឹងផ្អែកទាំងស្រុងលើតម្លៃទីផ្សារក្រៅប្រទេសដូចជា វៀតណាម និងថៃ ។ លោកថា ៖« ខណៈតម្លៃជ្រូកឡើងខ្ពស់បែបនេះ បច្ចុប្បន្ន ការនាំចូលពីប្រទេសវៀតណាមស្ទើរតែលែងមានហើយ គឺនៅមានគេចពន្ធមួយៗប៉ុណ្ណោះ ក៏ប៉ុន្តែពីប្រទេសថៃមានបរិមាណច្រើន។ ជាក់ស្ដែង សព្វថ្ងៃនេះ ការនាំចូលពីប្រទេសក្រៅមកផ្គត់ផ្គង់ មានបរិមាណប្រមាណ៣០ទៅ៤០%នៃតម្រូវការក្នុងស្រុក ។ អីចឹង បើសិនជាទីផ្សារខាងក្រៅមានបញ្ហា ទីផ្សារខាងក្នុងក៏មានបញ្ហាដែរ » ។
លោកបន្ថែមថា តម្លៃជ្រូករស់ក្នុងស្រុកខ្មែរបច្ចុប្បន្ន អ្នកចិញ្ចឹមទទួលបានកម្រិតមួយល្អណាស់ហើយ ព្រោះកន្លងមក ពួកគាត់សុំត្រឹមតែ៨.០០០រៀលប៉ុណ្ណោះក្នុង១គីឡូក្រាម តែវាបានឡើងដល់លើសហ្នឹង ដូចនេះ អ្នកណាៗក៏សប្បាយចិត្តដែរ ។ ប៉ុន្តែក្នុងស្ថានភាពការចិញ្ចឹមក្នុងស្រុកនៅមានតិចតួច បើសិនជាថៃឈប់ឲ្យនាំចូលដែរនោះ ជ្រូកក្នុងស្រុកអាចឡើងថ្លៃខ្ពស់ដល់២ម៉ឺនរៀលក្នុង១គីឡូក្រាម ហើយពេលនោះ ក៏ជាបញ្ហាដែរ ។
លោក ស៊ុន ឡាយ អ្នកចាប់ជ្រូកផ្គត់ផ្គង់តាមកុងស៊ី និងជាអ្នកចិញ្ចឹមជ្រូកមួយដែរនោះ បានឲ្យដឹងដែរថា ដោយសារតែកន្លងមក អ្នកចិញ្ចឹមជ្រូកបានបោះបង់ចោលរបរនេះ នៅពេលបច្ចុប្បន្ន ពួកគាត់មិនសូវមានជ្រូកសម្រាប់ផ្គត់ផ្គង់ទីផ្សារទេ បើទោះបីជាជ្រូកឡើងថ្លៃក៏ដោយ ។ លោកថា ៖
« បើសិនជាតម្លៃនេះនៅថេរបានយូរ ខ្ញុំជឿថា នៅពេលខាងមុខ កសិករនឹងបង្កើនការចិញ្ចឹមបានច្រើន ហើយការផ្គត់ផ្គង់ក្នុងស្រុកក៏ច្រើនដែរ » ។
លោកបន្តថា កាលពីមុន ជ្រូកធ្លាក់ថ្លៃខ្លាំង ម្ចាស់កសិដ្ឋានដែលផ្គត់ផ្គង់កូនជ្រូក ក៏បានលក់ទាំងមេជ្រូកក្នុងតម្លៃថោកឲ្យទៅកុងស៊ី ព្រោះតែគ្មានអ្នកណាត្រូវការកូនជ្រូកយកទៅចិញ្ចឹម ប៉ុន្តែបច្ចុប្បន្ន មានម្ចាស់កសិដ្ឋានមួយចំនួនបានបង្កាត់ពូជជ្រូកយកកូនបន្ថែមសម្រាប់ផ្គត់ផ្គង់ទៅកសិករ និងម្ចាស់កសិដ្ឋានផ្សេងទៀតសម្រាប់ចិញ្ចឹមជ្រូកយកសាច់លក់ ៕
ចែករំលែកព័តមាននេះ