ខេត្តបាត់ដំបង ៖ ការបំពាក់មេដាយការពារជាតិចំនួន១៥២៧នាក់បានពាក់ប្រគល់ឲ្យបងប្អូនអតីតយុទ្ធជនក្នុងក្រុង-ខេត្តបាត់ដំបង ក្រោមអធិបតីភាពរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៃព្រះរាជាណាចក្រកម្ពុជា លោកនាយឧត្តមសេនីយ៍គន់ គីម អគ្គលេខាធិការសមាគមអតីតយុទ្ធជនកម្ពុជាលោកងួន រតនៈអភិបាលខេត្តបាត់ដំបងព្រមទាំងតំណាងរាស្ត្រ មន្ត្រីរាជការកងកម្លាំងប្រដាប់អាវុធដែលជាសមាជិកសមាគមអតីតយុទ្ធជនក្នុងខេត្តបាត់ដំបងទាំងអស់បានមកចូលរួមនៅវេលាព្រឹកថ្ងៃទី១១ ខែមិថុនា ឆ្នាំ២០១៨ ក្នុងសាលមហោស្រពស្ទឹងសង្កែក្រុង-ខេត្តបាត់ដំបង ។
លោកឧត្តមសេនីយ៍ទោ អ៊ុក ឃ្នួច មេបញ្ជាការរងយោធភូមិភាគទី៥មេបញ្ជាការតំបន់ប្រតិបត្តិការសឹករងបាត់ដំបង និងជាប្រធានសមាគមអតីតយុទ្ធជនខេត្តបាត់ដំបងបានអានរបាយការណ៍អំពីការចុះជួយដល់បងប្អូនអតីតយុទ្ធជនជួបការលំបាក ក្នុងរយៈពេល២ឆ្នាំកន្លងមកនេះ គឺមានលទ្ធផលល្អប្រសើរ ទាំងផ្នែកជីវភាព សុខភាព ដោះស្រាយដីធ្លី ផ្តល់ជម្រកស្នាក់នៅផ្តល់ថវិកាមរណៈសង្គ្រោះ ក្នុងការជួយកាត់បន្ថយភាពក្រីក្រ និងការលំបាកបានមួយចំណែកធំកន្លងមកនេះក៏ដោយសារមានការជួយជំរុញជ្រោមជ្រែងពីសម្តេចតេជោ ហ៊ុន សែន នាយករដ្ឋមន្ត្រីបានចង្អុលបង្ហាញតាមលោកនាយឧត្តមសេនីយ៍គន់ គីម អគ្គលេខាធិការសមាគមអតីតយុទ្ធជនកម្ពុជាសំខាន់ពីសម្តេចក្រឡាហោម សខេង នាយករដ្ឋមន្ត្រីស្តីទី និងជាតំណាងរាស្ត្រមណ្ឌលបាត់ដំបងជួយជំរុញបន្ថែមលោកងួន រតនៈអភិបាលខេត្តបានចុះជាប្រចាំទើបបងប្អូនយើងទទួលបានជីវភាពល្អប្រសើរឡើងមួយកម្រិតទៀត ។
បន្ទាប់សម្តេចក្រឡាហោម ស ខេង នាយករដ្ឋមន្ត្រីស្តីទីបានបញ្ជាក់ថា នេះជាការរំលឹកអំពីការដឹងគុណក្នុងការជួយរួបរួមគ្នារំដោះប្រទេសជាតិឲ្យបានរួចចាកផុតពីសង្គ្រាម និងប្រល័យពូជសាសន៍រួចមក យើងបានប្រមូលផ្តុំគ្នា គឺខ្មែរតែមួយមកពីគ្រប់ភាគី ដើម្បីកសាងរក្សាសុខសន្តិភាពជាបន្តទៅទៀត តែកន្លងមកមានបងប្អូនយើងខ្លះដែលពលី ពិការ និវត្តជនបានជួបការលំបាកដោយគ្មានអ្នកចាប់អារម្មណ៍ឡើយ គឺមានតែមនុស្សមួយចំនួននៅក្រៅប្រទេសរបស់បក្សប្រឆាំងបានបង្កភាព ញុះញង់ បំភ្លើសការពិត រាំងខ្ទប់មិនឲ្យដំណើរការបាននូវការបោះឆ្នោត ដែលខ្លួនឯងបានរលាយបក្សដឹកនាំអស់ហើយនោះ គឺដើម្បីលាងខ្លួនព្រោះ តែគ្មានសិទ្ធអ្វីមកចូលរួមបោះឆ្នោតក្នុងអាណត្តទី៦នេះទៀតបានឡើយនោះក៏ព្រោះ តែទង្វើដែលបានធ្វើកន្លងមកគឺ ក្បត់ជាតិមានគោលបំណងផ្តួលរំលំរាជរដ្ឋាភិបាលស្របច្បាប់ មានព្រះមហាក្សត្រ អាស្រ័យដោយរដ្ឋធម្មនុញ្ញ មានសុខសន្តិភាពពិតប្រាកដ កំពុងដំណើរការអភិវឌ្ឍន៍ ដែលប្រទេសកម្ពុជាបានងើបពីសង្គ្រាមសល់តែផេះមកនោះក៏កើតឡើងដោយការបោះឆ្នោតជាច្រើនអាណត្តិពីប្រជាពលរដ្ឋពិតៗតាំងពីឆ្នាំ១៩៩៣កន្លងមកម្ល៉េះ ។
សម្តេចក្រឡាហោមបានបន្ថែមអំពីការប្រគល់ដីបន្ថែមទៀតដល់បងប្អូនដែលនៅជួបការលំបាកចំនួន២០០ហិកតា ដល់លោកនាយឧត្តមសេនីយ៍គន់ គីម អគ្គលេខាសមាគមអតីតយុទ្ធជន និងលោកងួន រតនៈអភិបាលខេត្តសម្រាប់ជួយបងប្អូននៅក្នុងស្រុកគាស់ក្រឡកំពុងត្រូវការ ហើយសុំឲ្យបងប្អូនអតីតយុទ្ធជនទាំងអស់ត្រូវចេះសាមគ្គីគ្នា ចេះគោរពស្រលាញ់គ្នាទៅវិញទៅមក ទន្ទឹមនោះដែរត្រូវណែនាំបងប្អូនកូនចៅជឿជាក់គាំទ្រការដឹកនាំរបស់សម្តេចតេជោជាប្រធានសមាគមអតីតយុទ្ធជនកម្ពុជា និងសុំឲ្យអតីតយុទ្ធជនទាំងអស់ត្រូវនាំបងប្អូនកូនចៅទៅបោះឆ្នោតជូនសម្តេចតេជោ ដើម្បីដឹកនាំប្រទេសជាតិ ឲ្យកាន់តែអភិវឌ្ឍន៍រីកចម្រើនបន្តទៀត ។
បន្តមកពិធីសំណេះសំណាលជូនលិខិតសរសើរ និងបំពាក់មេដាយជូនដល់សមាជិកអតីតយុទ្ធជនក្រុងបាត់ដំបងចំនួន១៥២៧នាក់ រួមមានមេដាយមាស, មេដាយប្រាក់, មេដាយសំរឹទ្ធក្នុងកិច្ចការ ការពារជាតិម្នាក់១គ្រឿង និងថវិកា៥០,០០០រៀល ជាអំណោយរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចគត្តិព្រឹទ្ធបណ្ឌិត ប៊ុនរ៉ានី ហ៊ុនសែន ៕
ចែករំលែកព័តមាននេះ