គិតមកទល់ពេលនេះ បណ្តាប្រទេសទាំង៣២បានបញ្ចេញឈ្មោះកីឡាករផ្លូវការទាំង២៣រូបរបស់ខ្លួនអមដោយឈ្មោះប្រធានក្រុមជម្រើសជាតិនីមួយៗដែលពួកគេហាក់បីដូចជាជឿជាក់លើការដឹកនាំក្រុមក្នុងនាមជា «មេទ័ព» ដើម្បីលើកពានមាស World Cup ២០១៨ ។ តោះទៅមើលមុខពួកគេទាំងអស់គ្នា៖
១-Lionel Messi (អាហ្សង់ទីន)
ខ្សែប្រយុទ្ធមុតស្រួចវ័យ៣០ឆ្នាំ Messi កំពុងតែរិះរកយុទ្ធសាស្ត្រថ្មីៗដើម្បីទុកប្រើក្នុងសមរភូមិធំនៅរុស្ស៊ីព្រោះវាអាចជាព្រឹត្តិការណ៍ចុងក្រោយរបស់ក្រុមជម្រើសជាតិអាហ្សង់ទីនរបស់គេផងដែរ ។ ខណៈអាហ្សង់ទីនទទួលបានត្រឹមតំណែងជើងឯករងតែប៉ុណ្ណោះកាលពីWorld Cup២០១៤ នៅលើទឹកដីប្រេស៊ីល ។
២-Marquinhos (ប្រេស៊ីល)
បន្ទាប់ពី Thiago Silva របួសទៅ តំណែងប្រធានក្រុមក៏ធ្លាក់ក្នុងដៃ Marquinhos ជាលើកដំបូងកាលពីថ្ងៃទី១០ តុលា ២០១៧ អំឡុងការប្រកួតយកឈ្នះក្រុមស៊ីលី ៣-០ ក្នុងទឹកដីរបស់ខ្លួន ។
៣-Harry Kane (អង់គ្លេស)
Kane បានបោះពាក្យសម្ដីថា អង់គ្លេសអាចឈ្នះ World Cup ក្រោយពីទទួលតំណែងជាប្រធានក្រុមពីសហព័ន្ធបាល់ទាត់អង់គ្លេស(FA)កាលពីថ្ងៃទី២២ ឧសភា ២០១៨ ដោយខ្សែប្រយុទ្ធវ័យ២៤ឆ្នាំរូបនេះជំនួសកៅអី Rooney ដែលចូលនិវត្តន៍កាលពីឆ្នាំ២០១៦ ។
៤-Sergio Ramos (អេស្ប៉ាញ)
ម្ចាស់ពានរង្វាន់ «ខ្សែការពារល្អបំផុតរបស់ក្របខ័ណ្ឌអេស្ប៉ាញ» ៤ដង Ramos វ័យ៣២ឆ្នាំជឿជាក់ថា ទ័ពអេស្ប៉ាញនឹងឡើងដល់វគ្គផ្តាច់ព្រ័ត្រក្នុងការប្រយុទ្ធនៅលើសមរភូមិ World Cup ។
៥-Cristiano Ronaldo (ព័រទុយហ្គាល់)
ខ្សែប្រយុទ្ធវ័យ៣៣ឆ្នាំ Ronaldo ដែលប្រកាសក្តែងៗថា ខ្លួនឯងជាកីឡាករល្អជាងគេក្នុងលោកកំពុងមានអំនួតខ្លាំងក្រោយក្លាយជា «កីឡាកររកគ្រាប់បាល់ច្រើនជាងគេនៅក្នុងកម្មវិធីឆេមពានលីគ» កំពុងនាំនាវាព័រទុយហ្គាល់ទៅរកត្រើយជ័យជម្នះ ។
៦-Robert Lewandowski (ប៉ូឡូញ)
ក្នុងយុទ្ធនាការប្រកួតជម្រុះ World Cup២០១៨ កីឡាករវ័យ២៩ឆ្នាំLewandoxskiរកបាន
ដល់ទៅ១៦គ្រាប់ជូនក្រុមរបស់ខ្លួនហើយរូបគេនឹងបន្តរកគ្រាប់បាល់បន្ថែមទៀតដើម្បីឱ្យស័ក្តិ
សមជាកីឡាករដែលកើតចេញពីត្រកូលអ្នកជំនាញកីឡា ។
៧-Radamel Falcao (កូឡុំប៊ី)
Falcao ត្រូវបានប្រសិទ្ធនាមថា «អធិរាជក្នុងសមរភូមិយូរ៉ូប៉ាលីគ» ។ ខ្សែប្រយុទ្ធវ័យ៣២ឆ្នាំរូបនេះត្រូវបានកោះហៅឱ្យចូលបន្ទាយកូឡុំប៊ីវិញកាលពី២០១៦ដើម្បីដឹកនាំទ័ពទៅសមរភូមិ World Cup ២០១៨ ជាមួយនឹងក្តីរំពឹងខ្ពស់ ។
៨-Eden Hazard (បែលហ្ស៊ិក)
ខ្សែបម្រើប្រយុទ្ធ Hazard ទទួលងារជាប្រធានក្រុមជំនួស Kompany កាលពីនៅ Euro ២០១៦ ចាប់តាំងពីពេលនោះមក ។
៩-Luka Modric (ក្រូអាស៊ី)
តារាចូលចិត្តលេងស្ទីលសក់វែងដូចស្រីវ័យ៣២ឆ្នាំកីឡាករ Modric បានជាប់ឈ្មោះជា «Croatian Footballer of Year» ឬ «កីឡាករឆ្នើមបំផុតរបស់ក្រុមបាល់ទាត់ក្រូអាស៊ី» ៦ដង និងសង្ឃឹមថា ក្រូអាស៊ីអាចឡើងដល់វគ្គពាក់កណ្តាលផ្តាច់ព្រ័ត្រ ឬផ្តាច់ព្រ័ត្រ ខណៈក្រុមធ្លាប់ភ្លក់រសជាតិវគ្គ៨ក្រុមពីរដងនៅ Euro ១៩៩៦ និង ២០០៨ ៕
ចែករំលែកព័តមាននេះ