ខេត្តប៉ៃលិន ៖ មានសេចក្តីរាយការណ៍ឱ្យដឹងថា បុរសម្នាក់ដែលប្រើប្រាស់គ្រឿងញៀនរហូតឈ្លោះទាស់ទែងលែងលះគ្នាជាមួយប្រពន្ធ និងត្រូវនគរបាលចាប់ដាក់ពន្ធនាគារនោះពេលចេញមកវិញ ក៏បានទៅសុំកូនរបស់ខ្លួនប្រុស១ ស្រី១ដែលម្តាយយកទៅចិញ្ចឹម ដើម្បីមករស់នៅជាមួយខ្លួនវិញ ។ ប៉ុន្តែម្តាយមិនព្រមឱ្យដោយខ្លាចក្រែងចៅគ្មានអនាគត ព្រោះតែកូនប្រុសម្នាក់នេះស្រវឹងនឹងគ្រឿងញៀន ស្រាប់តែជននេះខឹងទាញយកពូថៅទៅកាប់ម្តាយពេញទំហឹងចំក្បាលផុងលលាដ៍ស្លាប់ភ្លាមនៅនឹងកន្លែង ។
ចំណែកបងប្អូនដែលចូលទៅជួយ ក៏ត្រូវជននេះកាប់រងរបួសជាច្រើននាក់ដែរ តែភ្លាមៗនោះ នគរបាលក៏បានឃាត់ខ្លួនយកទៅឃុំនៅអធិការដ្ឋានស្រុកសាលាក្រៅ ។ តាមទោសកំហុសដែលធ្ងន់ជាងភ្នំព្រះមេរុនេះ កូនទុរយសនេះ ប្រហែលជាប់គុកគ្មានថ្ងៃចេញវិញបានឡើយ ។ ហេតុការណ៍ដ៏គួរឲ្យរន្ធត់នេះ បានកើតឡើង កាលពីវេលាម៉ោង៦ និង១០នាទីព្រឹកថ្ងៃទី១០ មិថុនា ស្ថិតនៅភូមិដីស ឃុំស្ទឹងត្រង់ ស្រុកសាលាក្រៅ ។
ប្រភពព័ត៌មានពីលោក រី ដារ៉ា អធិការរងនគរបាលស្រុកសាលាក្រៅ បានឲ្យដឹងថា ជននេះឈ្មោះ ធុង នាង អាយុ៣១ឆ្នាំ អតីតទណ្ឌិតគ្រឿងញៀន រស់នៅក្នុងភូមិឃុំកើតហេតុខាងលើ ។ ចំណែកម្តាយដែលរងគ្រោះឈ្មោះ សុខ ស្រីុម អាយុ៥៥ឆ្នាំ ត្រូវកូនប្រុសតិរច្ឆាននេះ កាប់នឹងពូថៅ បណ្តាលឱ្យស្លាប់នៅនឹងកន្លែង ។
ចំណែកជនរងគ្រោះផ្សេងទៀតមាន ឈ្មោះ ធុង ថូ ភេទប្រុស អាយុ២២ឆ្នាំ ជាប្អូនបង្កើតរងរបួសក្បាលផ្នែកខាងមុខធ្ងន់ និងឈ្មោះ ធុង សារី ភេទស្រី អាយុ២០ឆ្នាំ ជាប្អូនបង្កើតដែរ រងរបួសក្បាលផ្នែកខាងក្រោយធ្ងន់ ។
លោកអធិការរងបន្តទៀតថា ជនឈ្មោះ ធុង នាង នេះ ធ្លាប់ជាប់ពន្ធនាគាររយ:ពេលជាច្រើនឆ្នាំ នាពេលកន្លងមក ពាក់ព័ន្ធនឹងករណីប្រើប្រាស់គ្រឿងញៀន ហើយបានឈ្លោះទាស់ទែងគ្នាជាមួយប្រពន្ធរហូតដល់លែងលះគ្នា ។ ពេលនោះ ប្រពន្ធក៏ទៅធ្វើការនៅប្រទេសថៃបាត់ទៅ លុះឃើញអត់មានអ្នកមើលថែចៅ ស្ត្រីជាជីដូន ក៏យកចៅប្រុស-ស្រីមកចិញ្ចឹម ។ លុះកូនទុរយសនេះ ចេញពីពន្ធនាគារវិញ ក៏ទៅរំអុកសុំកូនមករស់នៅជាមួយនឹងខ្លួន តែម្តាយឃើញជនសង្ស័យនៅមានការប្រើប្រាស់គ្រឿងញៀន គាត់មិនព្រម ឲ្យក៏កើតទៅជាទំនាស់ទាស់ទែងគ្នាជាពាក្យសម្តី ។
ពេលនោះ ស្រាប់តែជននេះទាញពូថៅកាប់ម្តាយចំក្បាលពេញទំហឹង បណ្តាលឱ្យស្លាប់ភ្លាមៗតែម្តង លុះបងប្អូនចូលទៅជួយក៏កាប់រងរបួសជាច្រើននាក់ទៀត និងត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។ ប្រភពដដែលបញ្ជាក់ថា ជនសង្ស័យត្រូវនគរបាលចាប់ឃាត់ខ្លួននៅអធិការដ្ឋានស្រុកសាលាក្រៅ ដើម្បីកសាងសំណុំរឿងបញ្ជូនទៅសាលាដំបូង ។
នេះជាវិបត្តិគ្រឿងញៀនដែលកំពុងជះឥទ្ធិពលកាន់តែធ្ងន់ធ្ងរដល់សង្គមគ្រួសារ ហើយក៏កំពុងឈានដល់បង្កបញ្ហាសង្គមដែរ ៕
ចែករំលែកព័តមាននេះ