ខេត្តមណ្ឌលគិរី ៖ ផ្ទះឈើមួយខ្នងត្រូវបានប្រគល់ជូនស្ត្រីទុរគតជនម្នាក់ ដែលកំពុងជួបការខ្វះខាតខ្លាំង លើជីវភាពប្រចាំថ្ងៃ ក្រោមការជួយឧបត្ថមពីលោកអភិបាលស្រុកកែវសីមា កាលពីរសៀលថ្ងៃទី១០ មិថុនា ២០១៨ នៅភូមិស្រែព្រះ ឃុំស្រែព្រះ ស្រុកកែវសីមា ខេត្តមណ្ឌលគិរី ។
លោកសាន គឹមអ៊ាប អភិបាលរងស្រុកកែវសីមាបានឱ្យដឹងថា តាំងពីអភិបាលស្រុកថ្មីលោកនួន សារ៉ន ផ្លាស់ប្តូរតំណែងមកនៅស្រុកកែវសីមានេះ លោកតែងតែយកចិត្តទុកដាក់ទៅលើសុខទុក្ខប្រជាពលរដ្ឋ ពិសេស គឺបញ្ហាផ្ទះសម្បែងនេះជាងគេ ។ ហើយកន្លងទៅលោកអភិបាលតែងតែផ្តល់ជាអំណោយ និងប្រគល់ផ្ទះជូនទុរគតជារឿយៗ ។
លោកនួន សារ៉ន អភិបាលស្រុកកែវសីមាបានឲ្យដឹងថា ក្នុងនាមលោកជាមន្ត្រីរាជការក្រោមការដឹកនាំរបស់រាជរដ្ឋាភិបាលសព្វថ្ងៃ ត្រូវតែបំពេញភារៈកិច្ចជួយប្រជាពលរដ្ឋដែលខ្វះខាត និងមានតួនាទីជាសេនាធិការរបស់រាជរដ្ឋាភិបាល ដូច្នេះអ្វីដែលលោកអាចជួយបាន គឺលោកត្រូវតែជួយ ។ លោកអភិបាលបន្តថា ផ្ទះឈើសង់ផុតដីនេះ ត្រូវសង់ឡើងក្នុងទំហំ៥គុណ៧ម៉ែត្រ ដែលត្រូវចំណាយថវិកា ប្រមាណជាង៧លានរៀល ។
ស្ត្រីមេម៉ាយឈ្មោះ នូវ ម៉ុន ភេទស្រី អាយុ៦៦ឆ្នាំ ដែលទទួលបានផ្ទះថ្មីខាងលើ មានការត្រេកអរ និងថ្លែងអំណរគុណដល់ថ្នាក់ដឹកនាំដែលតែងតែយកចិត្តទុកដាក់លើសុខទុក្ខប្រជាពលរដ្ឋដែលក្រលំបាកជាប្រចាំ ។
ស្របពេលនោះដែរក្រុមការងារបានបន្តនាំយកនូវអង្ករ២៥គីឡូក្រាម និងថវិកា៣១ម៉ឺន៥ពាន់រៀល ជូនដល់លោកយាយ និងថវិកា ៤៦ម៉ឺនរៀលបន្ថែមទៀត ដើម្បីសម្រួលជីវភាពប្រចាំថ្ងៃ ៕
ចែករំលែកព័តមាននេះ