ខេត្ដកំពង់ចាម ៖ មានព្រះរាជសវនីយ៍ នៅចំពោះមុខប្រជាពលរដ្ឋក្រីក្រចំនួនជាង៥០០នាក់ សម្ដេចព្រះមហាក្សត្រីនរោត្ដមមុនិនាថ សីហនុ ព្រះវររាជមាតាជាតិខ្មែរ បានកោតសរសើរលោកជំទាវបណ្ឌិតប៊ុន រ៉ានី ហ៊ុន សែន ថា លោកជំទាវមិនមែនត្រឹមតែជាកំពូលភរិយាដ៏ល្អរបស់សម្ដេចអគ្គមហាសេនាបតីតេជោហ៊ុន សែន ប៉ុណ្ណោះទេ ថែមទាំងជាកំពូលនារីដែលពូកែ និងឈ្លាសវៃបំផុត ដែលបានដឹកនាំកាកបាទក្រហមកម្ពុជាឱ្យមានភាពរីកចំរើន និងមានកេរ្ដិ៍ឈ្មោះល្បីល្បាញលើឆាកអន្ដរជាតិក្នុងពេលបច្ចុប្បន្ននេះ ។ សម្ដេចម៉ែក៏បានកោតសរសើរផងដែរចំពោះភាពវៃឆ្លាតរបស់សម្ដេចអគ្គមហាសេនាបតីតេជោហ៊ុន សែន ដែលបានខិតខំកសាង និងអភិវឌ្ឍន៍ប្រទេសជាតិផង ការពារប្រទេសជាតិផង ហើយកម្ពុជាកំពុងតែរីកចំរើនគួរឱ្យកត់សំគាល់ ។ សម្ដេចម៉ែបានមានព្រះរាជសវនីយ៍បែបនេះនៅក្នុងភូមិពង្រ ឃុំស្ដើងជ័យ ស្រុកជើងព្រៃ ខេត្ដកំពង់ចាម កាលពីព្រឹកថ្ងៃទី៥ ឧសភា ខណៈពេលដែល ព្រះអង្គបានយាងចុះចែកព្រះរាជអំណោយដល់ប្រជាពលរដ្ឋចំនួន៥៣១គ្រួសារមកពីឃុំចំនួន១០ក្នុងស្រុកជើងព្រៃ ។
ក្នុងព្រះរាជដំណើរយាងចុះចែកអំណោយនេះ លោកជំទាវប៊ុន រ៉ានី ហ៊ុន សែន ប្រធានកាកបាទក្រហមកម្ពុជា រួមជាមួយសមាជិកសមាជិកាកាកបាទក្រហមដែលជាភរិយារបស់ថ្នាក់ដឹកនាំគណបក្សប្រជាជនកម្ពុជាក៏បានអម ព្រះរាជដំណើរសម្ដេចម៉ែក្នុងឱកាសនោះដែរ ។អំណោយដែលប្រជាពលរដ្ឋទទួលបានក្នុងមួយគ្រួសារៗមានអង្ករ៣០គីឡូក្រាម សារុង១ ក្រមា១ មុង១ ភួយ១ នំប៉័ងបាក់ យ៉ុង២ដើម ទឹកបរិសុទ្ធឱរ៉ាល់២ដប និងថវិកា ចំនួន៥ម៉ឺនរៀល ដែលអំណោយទាំងនេះ អង្ករជារបស់ក្រុមហ៊ុនអ៊ែតវូត និងក្រៅពីនេះជាអំណោយរបស់កាកបាទក្រហមកម្ពុជា ។ សម្ដេចម៉ែមានព្រះរាជសវនីយ៍បន្ដថា ឆ្នាំនេះសម្ដេចឪមានព្រះជន្ម៨៩ព្រះវស្សាទៅហើយ ស្ដេចទន់ និងមានព្រះប្រឈួនទៀត មិនអាចយាងចុះសាកសួរសុខទុក្ខប្រជាពលរដ្ឋនៅតាមបណ្ដាខេត្ដដូចមុនៗទៀតបានទេ ហើយសម្ដេចឪក៏បានកសាងសមិទ្ធផលជាច្រើននៅតាមបណ្ដាភូមិ ស្រុកផងដែរ ដូចជា ផ្លូវ ស្ពាន សាលារៀន មន្ទីរពេទ្យ និងអណ្ដូង ទឹកជាដើម ។
សម្ដេចព្រះមហាក្សត្រីនរោត្ដម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្ដិយសកាកបាទក្រហមកម្ពុជាបានប្រទានទឹកប្រាក់ចំនួន១ម៉ឺនដុល្លារអាមេរិកដល់លោកជំទាវ ប៊ុន រ៉ានី ហ៊ុន សែន សំរាប់ចូលរួមក្នុងពិធីអបអរសាទរខួបលើកទី១៤៧ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ដែលកាកបាទក្រហមកម្ពុជាគ្រោងរៀបចំធ្វើឡើងនៅថ្ងៃទី៨ ឧសភា ខាងមុខនេះក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ។ សម្ដេចម៉ែបានជូនពរលោកជំទាវប៊ុន រ៉ានី ហ៊ុន សែន ឱ្យទទួលជោគជ័យក្នុងឆ្នាំថ្មី និងសូមឱ្យទិវាកាកបាទក្រហមទទួលបានជោគជ័យ គឺទទួលបានថវិកាពីសប្បុរសជនគ្រប់ មជ្ឈដ្ឋានដែលចូលជាវិភាគទានដល់កាកបាទក្រហមកម្ពុជាឱ្យបានច្រើនដើម្បីជួយប្រជាពលរដ្ឋក្រីក្រ ប្រជាពលរដ្ឋដែលរងគ្រោះ ដោយប្រការផ្សេងៗគ្រប់ខេត្ដ តំបន់ សមដូចពាក្យស្លោករបស់កាកបាទក្រហមដែលបានលើកឡើងថា ទីណាមានទុក្ខលំបាកទីនោះមានកាកបាទក្រហម ។ នេះជាសកម្មភាពមនុស្សធម៌គ្មានព្រំដែន។
ចែករំលែកព័តមាននេះ