រហូតមកទល់ពេលនេះ ក្រុមការងារកីឡានៃសារព័ត៌មានកោះសន្តិភាពយើង បានធ្វើការវិភាគ៦ពូលរួចមកហើយ នៅឡើយតែ២ពូលចុងក្រោយទៀតប៉ុណ្ណោះ ។ ចំណែកការវិភាគបន្ទាប់នេះ យើងសូមលើកយកពូល G ដែលមានក្រុមបែលហ្ស៊ិក និងអង់គ្លេស មកពីទ្វីបអឺរ៉ុប ទុយនីស៊ី មកពីទ្វីបអាហ្វ្រិក និងប៉ាណាម៉ាមកពីទ្វីបអាមេរិកខាងជើង ។
១-បែលហ្ស៊ិក
បើនិយាយពីការប្រឡូកក្នុងព្រឹត្តិការណ៍ World Cup បែលហ្ស៊ិកជាប្រទេសមានបទពិសោធន៍ជោកជាំមួយក្នុងចំណោមប្រទេសដទៃក្នុងទ្វីបអឺរ៉ុប ។ ពួកគេបានចូលរួមប្រកួតចាប់តាំងពីព្រឹត្តិការណ៍នេះបង្កើតឡើងមកម៉្លេះ ។ ចំណែករដូវកាលថ្មីនេះគឺជាការបង្ហាញខ្លួនលើកទី១៣ក្នុងប្រវត្តិសាស្ត្រ ខណៈវត្តមានចុងក្រោយកាលពីរដូវកាល២០១៤ បែលហ្ស៊ិកបានឡើងដល់វគ្គ៨ក្រុម ។ កំណត់ត្រាល្អបំផុតនៅ World Cup ពួកគេធ្លាប់ឈានដល់វគ្គពាក់កណ្តាលផ្ដាច់ព្រ័ត្រម្តងកាលពីឆ្នាំ១៩៨៦ ។
បច្ចុប្បន្ន បែលហ្ស៊ិកសំបូរទៅដោយកីឡាករឆ្នើមច្រើនរូប ដែលកំពុងបញ្ចេញសមត្ថភាពនៅក្លិបធំៗក្នុងទ្វីបអឺរ៉ុប ។ ជាក់ស្តែង Lukaku, De Bruyne, Hazard និង Fellaini សុទ្ធតែជាតួអង្គសំខាន់ជួយដឹកនាំនាវាក្រុមជម្រើសជាតិឱ្យឆ្ពោះទៅមុខ ។ អ្វីដែលធ្វើឱ្យបែលហ្ស៊ិករឹតតែក្លាយជាក្រុមគួរឱ្យខ្លាចនោះ គឺលទ្ធផល៥ប្រកួតចុងក្រោយវគ្គជម្រុះបឋម ពួកគេមិនទាន់ចាញ់ម្តងឡើយដោយឈ្នះទាំង៥ប្រកួត ។
២-អង់គ្លេស
អង់គ្លេសដែលមានរហស្សនាមថា «តោកំណាច» ហាក់ចេញពីទំព័រក្រុមជម្រើសជាតិឆ្នើមបាត់ទៅហើយ ដោយសារតែមួយរយៈចុងក្រោយនេះ ពួកគេធ្វើពុំបានល្អសោះ ។ អង់គ្លេសធ្លាប់ត្រូវបានគេស្គាល់ថា ជាក្រុមខ្លាំងមួយនៅអឺរ៉ុប ប៉ុន្តែរមែងទទួលការខកចិត្តទៅវិញ ។ ចំពោះប្រវត្តិប្រកួត World Cup អង់គ្លេសក៏ជាក្រុមចាស់វស្សាមួយផងដែរ ដោយបានចូលរួមដំបូងនៅឆ្នាំ១៩៥០ ហើយរដូវកាលនេះគឺជាការបង្ហាញខ្លួនលើកទី១៥ ។
អង់គ្លេសធ្លាប់គ្រងតំណែងជើងឯកម្តងកាលពីឆ្នាំ១៩៦៦ ប៉ុន្តែវត្តមានចុងក្រោយឆ្នាំ២០១៤ ក្រុមតោកំណាចមិនបានឆ្លងផុតវគ្គចែកពូលនោះទេ ។ យ៉ាងណាមិញ រដូវកាលថ្មីនេះ ពួកគេហាក់ងើបមុខឡើងវិញជាមួយនឹងសមត្ថភាពកូនក្រុមខ្លាំងក្លាជាងមុន រីឯលទ្ធផល៥ប្រកួតចុងក្រោយវគ្គជម្រុះ World Cup ក៏អង់គ្លេសមិនបរាជ័យដែរ ពោលគឺឈ្នះ៤ ស្មើ១ ។
៣-ទុយនីស៊ី
ការបង្ហាញខ្លួននៅ World Cup សាជាថ្មីក្រោយបាត់មុខ២រដូវកាលចុងក្រោយនេះ ទុយនីស៊ីនៅតែមិនសូវរឹងមាំដដែល ។ ឆ្នាំ២០១៨ជាការបង្ហាញខ្លួនលើកទី៥ក្នុងប្រវត្តិសាស្ត្រ បន្ទាប់ពីពួកគេចូលរួមប្រកួតលើកដំបូងនៅឆ្នាំ១៩៧៨ ប៉ុន្តែវត្តមានទាំង៤លើកកន្លងមក ទុយនីស៊ីពុំធ្លាប់ឆ្លងផុតវគ្គចែកពូលម្តងឡើយ ។
ទន្ទឹមនឹងបទពិសោធន៍តិចតួចនៅ World Cup រួមទាំងមិនមានកីឡាករលេចធ្លោផងនោះ ទុយនីស៊ីអាចនឹងភ្លក់រសជាតិប្រវត្តិសាស្ត្រច្រំដែលទាំង៥លើកនៅព្រឹត្តិការណ៍នេះ ។ យ៉ាងណាមិញ លទ្ធផល៥ប្រកួតចុងក្រោយវគ្គជម្រុះបឋម ពួកគេក៏មិនបរាជ័យដែរ គឺឈ្នះ៣ ស្មើ២ ។
៤-ប៉ាណាម៉ា
ប៉ាណាម៉ាគឺជាក្រុមមានវ័យក្មេងជាងគេនៅព្រឹត្តិការណ៍ World Cup ដែលនេះជាលើកទី១ក្នុងប្រវត្តិសាស្ត្រពួកគេនៅវគ្គចែកពូល ។ ប្រទេសដែលមានប្រជាជនត្រឹម៤លាននាក់នេះ ជាក្រុមខ្លាំងមួយនៅតំបន់អាមេរិកកណ្តាលដែលឈ្នះពានរង្វាន់ខាប់Copa Centroamericana ឆ្នាំ២០០៩ និងរងជើងឯកពីរដងក្នុងការប្រកួតដណ្តើមពាន CONCACAF Gold Cup ឆ្នាំ២០០៥ និង២០១៣ ។ ក្នុង៥ប្រកួតចុងក្រោយនៅវគ្គជម្រុះកន្លងទៅ ក្រុមក្មេងខ្ចីមួយនេះ ធ្វើពុំសូវបានល្អប៉ុន្មានទេ ពោលគឺឈ្នះ២ ស្មើ១ និងចាញ់២ ។
*វិភាគ ៖ បន្ទាប់ពីបានដឹងសមាសភាពក្រុមទាំង៤ក្នុងពូល G នេះរួចមក យើងដូចជាបានឃើញទៅហើយថាបែលហ្ស៊ិក និងអង់គ្លេសនឹងអាចឡើងទៅវគ្គបន្ត ។ ជាក់ស្តែងមិនថាបទពិសោធន៍ សមត្ថភាពកីឡាករ និងគ្រូបង្វឹករបស់ក្រុមមកពីទ្វីបអឺរ៉ុបទាំងពីរខាងលើ សុទ្ធតែមានប្រៀបជាងទុយនីស៊ី និងប៉ាណាម៉ា ។ អ្វីដែលត្រូវវែកញែកនោះ គឺថាតើបែលហ្ស៊ិក និងអង់គ្លេសក្រុមមួយណាឈរនៅកំពូលតារាង ខណៈ២ក្រុមផ្សេងទៀតមានភាគរយតិចតួចប៉ុណ្ណោះថានឹងអាចបន្តក្តីស្រមៃរបស់ខ្លួនទៅវគ្គបន្ត ៕
ចែករំលែកព័តមាននេះ