ខេត្តព្រៃវែង ៖ កាលពីព្រឹកថ្ងៃទី៩ មិថុនា កន្លងទៅ ក្រុមគ្រូពេទ្យស្ម័គ្រចិត្តរបស់សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានចុះទៅជួយពិនិត្យ…
ខេត្តព្រៃវែង ៖ កាលពីព្រឹកថ្ងៃទី៩ មិថុនា កន្លងទៅ ក្រុមគ្រូពេទ្យស្ម័គ្រចិត្តរបស់សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានចុះទៅជួយពិនិត្យ និងព្យាបាលជំងឺផ្នែកភ្នែក និងជំងឺមាត់ធ្មេញដោយឥតគិតថ្លៃ ជូនដល់បងប្អូនប្រជាពលរដ្ឋជាង៥០០នាក់ នៅក្នុងឃុំព្រៃកន្លោង ស្រុកពោធិ៍រៀង ខេត្តព្រៃវែង។ ការពិនិត្យ និងព្យាបាលជំងឺនេះ ធ្វើឡើងនៅក្នុងបរិវេណវត្តសត្ថារាម ដែលស្ថិតក្នុងភូមិពពឹស ឃុំព្រៃកន្លោង ស្រុកពោធិ៍រៀង និងព្យាបាលដោយក្រុមគ្រូពេទ្យជាច្រើនរូប ដែលមានបទពិសោធន៍ និងជំនាញខ្ពស់ខាងផ្នែកជំងឺភ្នែក និងជំងឺមាត់ធ្មេញ ក្រោមការដឹកនាំដោយឯកឧត្តម ឧត្តមសេនីយ៍ទោ ទន្តបណ្ឌិត លីវ ផេង អនុប្រធាននាយកដ្ឋានសុខាភិបាល។
ឯកឧត្តម លីវ ផេង បានមានប្រសាស៍ថា សកម្មភាពចុះជួយពិនិត្យ និងព្យាបាលជំងឺផ្នែកភ្នែក និងជំងឺមាត់ធ្មេញនេះ មិនមែនទើបជាលើកទី១នោះទេសម្រាប់ឃុំព្រៃកន្លោង នេះគឺជាលើកទី៣ហើយ ហើយបើគិតនៅក្នុងស្រុកពោធិ៍រៀង ទាំងមូល នេះគឺជាលើកទី១៥ហើយ ដែលក្រុមគ្រូពេទ្យស្មគ្រ័ចិត្តសម្តេចក្រឡាហោម ស ខេង បានចុះជួយពិនិត្យ និងព្យាបាលជំងឺជូនដល់បងប្អូនប្រជាពលរដ្ឋដោយឥតគិតថ្លៃបែបនេះ។ ឯកឧត្តមបានបញ្ជាក់ថា ជានិច្ចកាលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ លោកតែងតែយកចិត្តទុក្ខដាក់ និងគិតគូរយ៉ាងខ្លាំងចំពោះសុខទុក្ខរបស់ប្រជាពលរដ្ឋគ្រប់ៗរូប ជាពិសេសបងប្អូនដែលរស់នៅតាមទីជនបទដាច់ស្រយាល ហើយការរៀបចំឲ្យក្រុមគ្រូពេទ្យស្មគ្រ័ចិត្ត ចុះមកជួយពិនិត្យ និងព្យាបាលជំងឺជូនបងប្អូនប្រជាពលរដ្ឋផ្ទាល់ក្នុងមូលដ្ឋានបែបនេះ គឺដើម្បីរួមចំណែកកាត់បន្ថយការលំបាករបស់បងប្អូន និងស្របទៅតាមគោលនយោបាយកាត់បន្ថយភាពក្រីក្រ ដែលរដ្ឋាភិបាលបានដាក់ចេញនោះផងដែរ។
គួរបញ្ជាក់ផងដែរថា នៅក្នុងការពិនិត្យព្យាបាលជំងឺជូនបងប្អូនប្រជាពលរដ្ឋ នៅក្នុងវត្តសត្ថារាម រយៈពេលមួយថ្ងៃពេញនោះ ក្រុមគ្រូពេទ្យបានជួយពិនិត្យ និងព្យាបាលផ្នែកជំងឺភ្នែកបានចំនួន២៧០នាក់ ផ្នែកជំងឺមាត់ធ្មេញបានចំនួន២៩៥នាក់ ជាមួយគ្នានោះក្រុមគ្រូពេទ្យក៏បានចែកសម្ភារប្រើប្រាស់ និងថ្នាំសង្កូវមួយចំនួនទៀត ជូនដល់បងប្អូនប្រជាពលរដ្ឋដែលមកទទួលសេវាព្យាបាលនេះដែរ ដែលក្នុងនោះរួមមាន ថ្នាំដុះធ្មេញ និងច្រាសដុះធ្មេញ វ៉ែនតា សាប៊ូសម្អាតខ្លួន ប្រេងខ្យល់ ប្រេងកូឡា ថ្នាំថែរក្សាភ្នែក និងថ្នាំពេទ្យមួយចំនួនផងដែរ៕
ចែករំលែកព័តមាននេះ