ខេត្តព្រះសីហនុ ៖ លោកអនុសេនីយ៍ឯក ញា វិសិទ្ទ អនុប្រធានមន្ទីរស្រាវជ្រាវយុត្តិធម៌នៃទីបញ្ជាការកងរាជអាវុធហត្ថខេត្តព្រះសីហនុ បានរងរបួសធ្ងន់នៅក្នុងហេតុការណ៍ចុះបំពេញកាតព្វកិច្ចតាមបទបញ្ជារបស់គណៈបញ្ជាការឯកភាពខេត្ត ក៏ដូចជាចុះអនុវត្តទៅតាមបទបញ្ជារបស់មេបញ្ជាការ កងរាជអាវុធហត្ថខេត្តព្រះសីហនុ ទាក់ទងទៅនឹងពាក្យបណ្តឹងរបស់ប្រជាពលរដ្ឋអំពីបទល្មើសព្រហ្មទណ្ឌ ដែលបានកើតឡើងនៅចំណុចពយម៉ាចូវ ក្នុងភូមិគគីរ ឃុំរាម ស្រុកព្រៃនប់ ខេត្តព្រះសីហនុ នាពេលកន្លងមក។
តាមការរៀបរាប់របស់លោកអនុសេនីយ៍ឯក ញា វិសិទ្ធ បានរៀបរាប់ទាំងឈឺចុកចាប់ថា បន្ទាប់ពីទទួលបានពាក្យបណ្តឹងរបស់ប្រជាពលរដ្ឋជាកម្មករចាំចំការនៅចំណុចខាងលើនេះថា មានករណីជម្លោះកើតឡើងរវាងកម្មករចាំចំការ និងកម្មករចាំចំការ ដោយឈ្មោះ មឿង ស្រីទូច ដែលកន្លងមកអះអាងថា ជាក្មួយបង្កើតរបស់ថ្នាក់ដឹកនាំជាន់ខ្ពស់នៅរាជធានីភ្នំពេញ បានបញ្ជាឲ្យកម្មកររបស់ខ្លួនប្រើហិង្សាដុតបំផ្លាញម៉ូតូកម្មករចាំចំការភាគីម្ខាងទៀត។
ប្រភពខាងលើបន្តទៀតថា បន្ទាប់ពីទទួលពាក្យបណ្តឹង និងទទួលបទបញ្ជារបស់ប្រធានគណៈបញ្ជាការឯកភាពខេត្ត និងបទបញ្ជារបស់លោកមេបញ្ជាការកងរាជអាវុធហត្ថខេត្ត នៅម៉ោងប្រមាណជិត១១ ថ្ងៃទី០៩ មិថុនា កម្លាំងកងរាជអាវុធហត្ថមន្ទីរស្រាវជ្រាវយុត្តិធម៌បានចុះដល់កន្លែងកើតហេតុ និងទីតាំងដីចំការអ្នកស្រី មឿង ស្រីទូច ក្នុងគោលបំណងពិនិត្យ និងអញ្ជើញ អ្នកស្រី មឿង ស្រីទូច ព្រមទាំងបក្សពួកមកសួរនាំ ដើម្បីកសាងសំណុំរឿងទៅតាមនីតិវិធី។
ប្រភពបន្តឲ្យដឹងទៀតថា បន្ទាប់ពីកម្លាំងសមត្ថកិច្ចកងរាជអាវុធហត្ថទៅដល់ភ្លាម មឿង ស្រីទូច បានលើកទូរស័ព្ទតេឆ្វែងឆ្វាត់ទំនងជារកការជួយអន្តរាគមន៍ ពេលនោះលោក ញា វិសិទ្ធបានអញ្ជើញ មឿងស្រីទូច និងបក្សពួកដែលគេអះអាងថា ជាអង្គរក្សឲ្យមកកាន់ទីបញ្ជាការ ដើម្បីសួរនាំទៅតាមនីតិវិធី។
លោកបន្តបន្ថែមទៀតថា លោកក៏ឡើងជិះរថយន្ត៥៧០ជាមួយមឿង ស្រីទូច បន្ទាប់ពីលោកឡើងជិះនៅក្នុងរថយន្តខាងលើ មឿង ស្រីទូច ឡើងទៅកាន់ចង្កូតបើកបរ និប្តូរឲ្យអង្គរក្សរបស់គេមកអង្គុយជិតលោកវិញ ហាក់បីដូចជាមានគំរោងផែនការក្នុងការធ្វើសកម្មភាពអ្វីមួយ។ ប៉ុន្តែលោកញា វិសិទ្ធ យល់ឃើញថា យើងមានកម្លាំងនៅក្នុងរថយន្តស៊ីរ៉ែនបើកតាមពីក្រោយផងដែរ ទំនងជាមិនមានរឿងអ្វីកើតឡើងបានទេ ។ តែអ្វីៗមិនដូចការគិតទុកជាមុនឯណា គ្រាន់តែឡើងអង្គុយនៅក្នុងរថយន្តភ្លាម មឿង ស្រីទូច និងអង្គរក្សបានបញ្ជាឲ្យលោកបិទទូរស័ព្ទមិនឲ្យធ្វើការទាក់ទង មិនខុសពីក្លាយខ្លួនពីសមត្ថកិច្ចមកជាចំណាប់ខ្មាំងវិញ។ ហើយពួកគេបានបើករថយន្តក្នុងល្បឿនលឿនដូចហោះសំដៅទៅភ្នំពេញ ធ្វើឲ្យរថយន្តកម្លាំងសមត្ថកិច្ចតាមមិនទាន់។ ដោយឃើញទិដ្ឋភាពមិនអំណោយផល លោកក៏សម្រេចចិត្តបើកទ្វាររថយន្ត រួចលោតចុះទាំងបង្ខំទៅខាងឆ្វេងដៃ បណ្តាលឲ្យរងរបួសដាច់រយះស្លឹកត្រចៀកខាងស្តាំស្ទើរបាត់ទាំងស្រុង និងមានស្នាមជាំឈឺចុកចាប់ពេញខ្លួនប្រាណ។ បន្ទាប់មករថយន្តកម្លាំងសមត្ថកិច្ចដែលបើកប្រដេញតាមក្រោយបានដឹករូបលោកមកកាន់គ្លីនិកមិត្តភាពឃ្លាំងលើ ដើម្បីសង្គ្រោះ ដោយឡែក មឿង ស្រីទូច និងអង្គរក្សនៅក្នុងរថយន្តចំនួន០២នាក់ទៀតបានបើករថយន្តគេចខ្លួនបាត់ដោយសុវត្ថិភាព។ ក្រោយហេតុការណ៍កើតឡើងក៏មានវត្តមានលោក យន្ត មីន អភិបាលខេត្តចុះសួរសុខទុក្ខ និងពិនិត្យមុខរបួសដល់គ្លីនិកផងដែរ ជាការយកចិត្តទុកដាក់ខ្ពស់ និងលើកទឹកចិត្តពីថ្នាក់ដឹកនាំប្រធានគណៈបញ្ជាការឯកភាពខេត្ត។
តាមការលើកឡើងរបស់អ្នកច្បាប់បានឲ្យដឹងថា សកម្មភាពរបស់ មឿង ស្រីទូច និងបក្សពួកអង្គរក្ស គឺជាសកម្មភាពប៉ុនប៉ងធ្វើឃាតគិតទុកជាមុនមកលើមន្ត្រីកងរាជអាវុធហត្ថ។
លោកអនុសេនីយ៍ឯក ញា វិសិទ្ធ បានឲ្យដឹងថា ជុំវិញហេតុការណ៍ខាងលើថ្នាក់ដឹកនាំទីបញ្ជាការកងរាជអាវុធហត្ថខេត្តព្រះសីហនុ បានដាក់ពាក្យបណ្តឹងទៅសាលាដំបូងខេត្តហើយ ដើម្បីចាត់ការបន្តទៅតាមនីតិវិធីច្បាប់៕
ចែករំលែកព័តមាននេះ