រាជធានីភ្នំពេញ ៖ សំណង់អគារកម្ពស់៥ជាន់ដែលគ្មានច្បាប់អនុញ្ញាត និងមិនគោរពតាមបទដ្ឋានបច្ចេកទេសនៃការសាងសង់ ដោយសង់ឃ្លាតពីព្រំតែចម្ងាយ២តឹកកន្លះ ជាកម្មសិទ្ធិរបស់ឈ្មោះសៀន សាម៉ុន មានទីតាំងនៅអមផ្លូវជាតិលេខ១ ក្រុមទី១ ភូមិដើមស្លែង សង្កាត់ច្បារអំពៅទី២ ខណ្ឌមានជ័យ ស្ថិតនៅក្បែរអតីតផ្ទះស្រុត បានបង្កឱ្យមានរបួសដល់ម្ចាស់ផ្ទះដែលនៅជាប់គ្នាឈ្មោះជា លាងនី។ ដោយសារមូលហេតុនេះ អ្នករងរបួសក៏បានដាក់ពាក្យបណ្តឹងចូលមកសមត្ថកិច្ច និងអាជ្ញាធរមូលដ្ឋានរហូតដល់សាលារាជធានីភ្នំពេញ ។
នៅថ្ងៃទី២៣ កុម្ភៈ ឆ្នាំ២០១១ មានការផ្សះផ្សាមិនចុះសម្រុងគ្នាមួយរបស់សាលាខណ្ឌមានជ័យ ដែលនៅក្នុងឱកាសនោះលោកឡឹក ចិន្តា អនុប្រធានការិយាល័យភូមិបាលខណ្ឌមានជ័យ បានបញ្ជាក់ថា «សូមឱ្យលោកស្រីសៀន សាម៉ុន ផ្អាកសាងសង់រហូតដល់ច្បាប់អនុញ្ញាតឱ្យសាងសង់ និងដោះស្រាយចប់ជាមួយអ្នកជិតខាងសិន ទើបលោកស្រីអាចបន្តសាងសង់ទៀតបាន» ។ ប៉ុន្តែតាំងពីថ្ងៃនោះរហូតមកដល់ថ្ងៃនេះ សំណង់ខុសច្បាប់មួយនេះនៅតែបន្តសាងសង់ដដែល ទោះបីជាអ្នករងរបួសបានព្យាយាមដាក់ពាក្យបណ្តឹង និងជូនដំណឹងទៅសាលាខណ្ឌជាបន្តបន្ទាប់រហូតដល់ទៅ១០ដងហើយក៏ដោយ។ បន្ថែមលើនោះ នៅថ្ងៃទី១៧ មីនា ឆ្នាំ២០១១ ថែមទាំងត្រូវបានមន្ត្រីការិយាល័យរដ្ឋបាលនៃសាលាខណ្ឌមានជ័យ ប្រាប់ថា ឱ្យគាត់ឈប់មកដាក់ទៀតគេមិនទទួលពាក្យបណ្តឹងរបស់គាត់ទៀតទេ ហើយបានដេញគាត់ចេញពីសាលាខណ្ឌទៀតផង ។
សូមបញ្ជាក់ថា កាលដែលលោកស្រីជា លាងនី ដាក់ពាក្យបណ្តឹងជាបន្តបន្ទាប់រហូតដល់ទៅ១០ដងដូចនេះ គឺធ្វើទៅតាមបណ្តាំរបស់លោកហៀក ចាន់ លាង អភិបាលរងខណ្ឌមានជ័យតែប៉ុណ្ណោះ ។ បន្ថែមលើនោះ ឈ្មោះសៀន សាម៉ុន បានធ្វើការសាងសង់ផ្ទះមួយកន្លែងទៀតដោយគ្មានច្បាប់អនុញ្ញាត និងមិនគោរពទៅតាមបទដ្ឋានបច្ចេកទេសសំណង់ ដោយបុកគ្រឹះឃ្លាតពីព្រំដីរបស់ឈ្មោះជា លាងនី តែចម្ងាយ៣តឹកប៉ុណ្ណោះ ដែលសំណង់នេះមានទីតាំងនៅអមផ្លូវជាតិលេខ១ ក្នុងក្រុមទី៥ ភូមិតាងៅ សង្កាត់និរោធ ៕
ចែករំលែកព័តមាននេះ