សហរដ្ឋអាមេរិក និងកូរ៉េខាងជើង ៖ ប្រធានាធិបតីអាមេរិកលោកដូណាល់ ត្រាំ កាលពីថ្ងៃទី៩ មិថុនា បានធ្វើដំណើរពោរពេញដោយសុទិដ្ឋិនិយម មកកាន់សិង្ហបុរី ដើម្បីជួបជាមួយមេដឹកនាំកូរ៉េខាងជើង លោកគីម ជុងអ៊ុន។ នេះជាឱកាសតែមួយគត់ដើម្បីដោះស្រាយបញ្ហានុយក្លេអ៊ែរកូរ៉េខាងជើង ដែលបញ្ហានោះអ្នកកាន់អំណាចមុនៗលោក សុទ្ធតែទទួលបរាជ័យ។
ចំណែកលោកគីម ជុងអ៊ុនវិញ មកកាន់សិង្ហបុរីនាថ្ងៃទី១០ មិថុនា ២ថ្ងៃមុនការជួបគ្នាកំពូលជាប្រវត្តិសាស្ត្រនោះជាមួយលោកត្រាំ។ យោងតាមរ៉យទ័រថា លោកគីម ជុងអ៊ុនមកកាន់សិង្ហបុរី ដោយយន្តហោះលោកជិះចុះនៅព្រលានយន្តហោះ CHANGI ។
ម្យ៉ាងវិញទៀតរដ្ឋមន្ត្រីការបរទេសកូរ៉េខាងជើងលោក RI YONG HO បានជួបពិភាក្សានៅទីក្រុងព្យុងយ៉ាង ជាមួយសមភាគីសិង្ហបុរីលោក VIVIAN BALAKRISHNAN ពីការរៀបចំការជួបគ្នាកំពូលនេះ ព្រមទាំងពីការពង្រីកទំនាក់ទំនងទ្វេភាគី។
ប្រធានាធិបតីអាមេរិក ក្នុងសន្និសីទសារព័ត៌មានមួយនៅកាណាដា ជាកន្លែងលោកចូលរួមកិច្ចប្រជុំកំពូល G7 នៅទីក្រុង MALBAIE ថ្លែងថា ខ្ញុំមានអារម្មណ៍ថា លោកគីម ជុងអ៊ុន ចង់ធ្វើរឿងអ្វីមួយដែលសំខាន់ សម្រាប់ប្រជាជនលោក។ នេះជាឱកាសតែមួយគត់។ បន្ទាប់មកលោកត្រាំ ជិះយន្តហោះប្រធានាធិបតីមកកាន់សិង្ហបុរី ដែលលោកត្រូវទៅដល់ទីនោះនាយប់ថ្ងៃទី១០ មិថុនា។ ការជួបគ្នាកំពូលនឹងប្រព្រឹត្តទៅក្នុងសណ្ឋាគារទំនើបមួយ នាព្រឹកថ្ងៃទី១២ មិថុនា។
នោះជាការជួបគ្នាកំពូលលើកដំបូងបំផុត ដែលពុំមានប្រធានាធិបតីអាមេរិកកំពុងកាន់អំណាចណាម្នាក់ ជួបចរចាដោយផ្ទាល់ជាមួយមេដឹកនាំកូរ៉េខាងជើង លើបញ្ហារំសាយនុយក្លេអ៊ែរប្រទេសនេះឡើយ។ លោកត្រាំមានប្រសាសន៍ថា ខ្ញុំកំពុងបំពេញបេសកកម្មសន្តិភាពមួយ ហើយយើងនឹងធ្វើឲ្យមនុស្សច្រើនលាននាក់ និងពិភពលោកទាំងមូល ធូរស្បើយអារម្មណ៍។ យើងត្រូវទទួលបានការរំសាយនុយក្លេអ៊ែរ។ យើងជឿជាក់ច្បាស់ថា កូរ៉េខាងជើងនឹងជាកន្លែងទាក់ទាញមួយក្នុងពេលដ៏ឆាប់៕
ចែករំលែកព័តមាននេះ