AFP កាលពីពេលថ្មីៗកន្លងមកផ្សាយថា លោកសាស្ត្រាចារ្យហ៊្វីលីប ឆាលីយេ (Philippe Charlier) បង្ហើបឲ្យដឹងថា ធ្មេញរបស់លោកអ៊ីទ្លែរជារបស់ពិត ហើយលទ្ធផលនៃការត្រួតពិនិត្យរបស់ក្រុមការងារបានរកឃើញថា លោកអ៊ីទ្លែរស្លាប់បាត់បង់ជីវិតនៅឆ្នាំ១៩៤៥។…
AFP កាលពីពេលថ្មីៗកន្លងមកផ្សាយថា លោកសាស្ត្រាចារ្យហ៊្វីលីប ឆាលីយេ (Philippe Charlier) បង្ហើបឲ្យដឹងថា ធ្មេញរបស់លោកអ៊ីទ្លែរជារបស់ពិត ហើយលទ្ធផលនៃការត្រួតពិនិត្យរបស់ក្រុមការងារបានរកឃើញថា លោកអ៊ីទ្លែរស្លាប់បាត់បង់ជីវិតនៅឆ្នាំ១៩៤៥។ យើងអាចបញ្ចប់ទ្រឹស្តីនៃការប៉ាន់ប្រមាណនានាថា អ៊ីទ្លែរបានគេចខ្លួនទៅប្រទេសអាហ្សង់ទីនដោយជិះនាវាមុជទឹក លោកមិនបានលាក់ខ្លួននៅតំបន់ប៉ូលខាងត្បូង ឬលាក់ខ្លួននៅជ្រុងដ៏តូចមួយនៃទីអាថ៌កំបាំងទេ ។
តាមការត្រួតពិនិត្យលើធ្មេញពុក ឬធ្មេញសិប្បនិមិត្តជាច្រើនរបស់លោកអ៊ីទ្លែរបានប្រទះឃើញកំបោរដោយគ្មានស្លាកស្នាមទទួលទានសាច់ជាអាហារ ព្រោះលោកជាមេដឹកនាំផ្ដាច់ការពិសាអាហារបួស ។
លោកសាស្ត្រាចារ្យរូបនោះបញ្ជាក់ទៀតថានៅខែមីនា និងកក្កដា ២០១៧ អង្គភាពផ្នែកចារកម្មFSBរបស់រុស្ស៊ីបានអនុញ្ញាតឲ្យក្រុមអ្នកស្រាវជ្រាវបារាំងត្រួតពិនិត្យធ្មេញរបស់អ៊ីទ្លែរ និងជាលើកដំបូងចាប់តាំងពីឆ្នាំ១៩៤៦ ដែលអ្នកស្រាវជ្រាវបានត្រួតពិនិត្យលលាដ៍ក្បាល ដោយមានស្នាមរន្ធនៅផ្នែកខាងឆ្វេងកើតឡើងដោយសារគ្រាប់ ។
លទ្ធផលនៃការសិក្សាលើកចុងក្រោយនេះបញ្ជាក់ឲ្យដឹងថា លោកអ៊ីទ្លែរបានស្លាប់បាត់បង់ជីវិតនៅថ្ងៃទី៣០ មេសា ១៩៤៥ នៅក្នុងលេណដ្ឋានក្រោមដីមួយនៅក្រុងប៊ែរឡាំង ជាមួយលោកស្រីអេវ៉ា ប្រោណ(Eva Braun) ជាប្រពន្ធ និងជាគន្លឹះថ្មីមួយបង្ហាញពីការស្លាប់របស់លោក ។
លោកហ៊្វីលីប ឆាលីយេ ឲ្យដឹងទៀតថាតាមការត្រួតពិនិត្យធ្មេញមិនឃើញមានស្លាកស្នាម ឬក្លិនរំសេវ មានន័យថាលោកមិនបានប្រើកាំភ្លើងរបស់ខ្លួនធ្វើអត្តឃាតទេ ប៉ុន្តែបានបាញ់នៅត្រង់បំពង់ក ឬថ្ងាស ។ ក្រៅពីនេះដុំកំណកពណ៌ខៀវនៅលើធ្មេញសិប្បនិមិត្តរបស់អ៊ីទ្លែរអាចឆ្លុះបញ្ចាំងឲ្យឃើញថា កើតឡើងដោយសារមានប្រតិកម្មផ្នែកគីមីរវាងសារធាតុ«Cyanide» និងលោហៈរបស់ធ្មេញសិប្បនិមិត្ត ៕
ចែករំលែកព័តមាននេះ