ខេត្តព្រៃវែង ៖ អាសូរក្មេងប្រុសស្រីពីនាក់រស់នៅស្រុកពីរផ្សេងគ្នាតែស្លាប់ក្នុងថ្ងៃតែមួយ និងមូលហេតុតែមួយដូចគ្នា ព្រោះតែការធ្វេសប្រហែលរបស់ក្រុមគ្រួសារធ្វើឱ្យពួកគេលង់ទឹកស្លាប់យ៉ាងអាណោចអាធ័ម ។ ករណីទី១ កើតឡើងនៅព្រឹកថ្ងៃទី៩ មិថុនា ម៉ោងប្រមាណ១០ព្រឹក…
ខេត្តព្រៃវែង ៖ អាសូរក្មេងប្រុសស្រីពីនាក់រស់នៅស្រុកពីរផ្សេងគ្នាតែស្លាប់ក្នុងថ្ងៃតែមួយ និងមូលហេតុតែមួយដូចគ្នា ព្រោះតែការធ្វេសប្រហែលរបស់ក្រុមគ្រួសារធ្វើឱ្យពួកគេលង់ទឹកស្លាប់យ៉ាងអាណោចអាធ័ម ។
ករណីទី១ កើតឡើងនៅព្រឹកថ្ងៃទី៩ មិថុនា ម៉ោងប្រមាណ១០ព្រឹក ត្រង់ចំណុចមាត់បឹងចាក់ខ្លាញ់ ស្ថិតនៅភូមិចាក់ខ្លាញ់ឃុំពាមរក៍ ស្រុកពាមរក៍ ខេត្តព្រៃវែង ខាងក្រោយផ្ទះរបស់ឈ្មោះ លាង ឆែម ចម្ងាយ70ម៉ែត្រ ដែលត្រូវជាជីតារបស់ជនរងគ្រោះ ។ ជនរងគ្រោះដែលស្លាប់ឈ្មោះ ខៀវ តុលា ភេទប្រុស អាយុ19ខែ មានឪពុកឈ្មោះ ខៀវ មករា អាយុ19ឆ្នាំ និងម្តាយឈ្មោះគិត សុជាតិ អាយុ21ឆ្នាំ រស់នៅភូមិចាក់ខ្លាញ់ ឃុំពាមរក៍ ស្រុកពាមរក៍ ។
សមត្ថកិច្ចបានឱ្យដឹងថា មុនកើតហេតុជនរងគ្រោះបានដើរតាមក្រោយជីតា ខណៈដែលគាត់ទៅចងគោក្រោយផ្ទះដោយពុំដឹងថា ចៅដើរទៅតាមពីក្រោយនោះទេ ធ្វើឱ្យជនរងគ្រោះរអិលជើងធ្លាក់ចូលទឹកបឹងលង់ស្លាប់តែម្តង។ លុះម៉ោង១និង10នាទីរសៀល ទើបសពជនរងគ្រោះផុសអណ្តែតឡើង រួចគ្រួសារចុះស្រង់យកទៅទុកនៅផ្ទះ រហូតដល់ម៉ោង២រសៀលទើបរាយការណ៍ជូនសមត្ថកិច្ច ។ ក្រោយពីទទួលព័ត៌មានសមត្ថកិច្ចចុះទៅកន្លែងកើតហេតុរួចពិនិត្យ ព្រមទាំងធ្វើការបំភ្លឺពីក្រុមគ្រួសារដោយប្រាប់ថា ជនរងគ្រោះពិតជាស្លាប់ដោយសារលង់ទឹកពិតប្រាដកមែន ។ បច្ចុប្បន្នសពជនរងគ្រោះបានក្រុមគ្រួសារយកទៅធ្វើបុណ្យតាមប្រពៃណីខ្មែរ។
ដោយឡែកករណីទី២ កើតឡើងនៅថ្ងៃទី៩ មិថុនា ម៉ោងប្រហែល៦និង១២នាទីល្ងាច នៅចំណុចរណ្តៅគេកាប់យកដីលក់ នៅខាងលិចភូមិប្រហែល១០០ម៉ែត្រពីផ្លូវថ្នល់ ស្ថិតក្នុងភូមិបឹងព្រោះ ឃុំក្រញូង ស្រុកកំចាយមារ។ កុមារីរងគ្រោះឈ្មោះ ណៃ ចាន់រ៉ា អាយុ៧ឆ្នាំ រស់នៅភូមិកើតហេតុ ។
សមត្ថកិច្ចឱ្យដឹងថា មុនកើតហេតុក្មេងស្រីរងគ្រោះទៅលេងទឹករណ្តៅគេកាប់យកដីលក់ជាមួយក្មេងៗជាច្រើននាក់ទៀតតាំងពីមោង២រសៀល បន្ទាប់មកក្មេងៗទាំងនោះមកផ្ទះវិញអស់នៅសល់តែក្មេងរងគ្រោះនៅលេងម្នាក់ឯង ។ ក្រោយមកយាយបាត់ចៅក៏ដើររកតែមិនឃើញ ហើយត្រូវក្មេងៗប្រាប់ថា ក្មេងរងគ្រោះទៅលេងទឹកនៅខាងលិចភូមិ លុះដល់ម៉ោងកើតហេតុទើបលោកយាយពឹងបងប្អូនអ្នកភូមិជួយចុះរាវរក ស្រាប់តែប្រទះឃើញសពក្មេងរងគ្រោះនៅកន្លែងរណ្តៅដីនោះ តែគួរឱ្យស្តាយក្មេងស្រីលង់ទឹកស្លាប់បាត់បង់ជីវិតទៅហើយ។ សូមបញ្ជាក់ផងដែរថា ក្មេងស្រីរងគ្រោះរស់ជាមួយជីដូន ដោយឪពុកម្តាយយកមកផ្ញើទុកឱ្យគាត់មើល ៕
ចែករំលែកព័តមាននេះ