រាជធានីភ្នំពេញ៖ គ្រួសារមួយបានត្រឡប់មកពីលក់ផ្លែឈូកខ្ចីនៅឯផ្សារកណ្ដាល ពេលមកដល់ពាក់កណ្ដាលផ្លូវក៏ត្រូវបានជនសង្ស័យមួយក្រុមធ្វើសកម្មភាពឆក់ទូរស័ព្ទដៃ ហើយជិះម៉ូតូគេចខ្លួនបាត់ស្រមោល បណ្ដាលឲ្យស្ត្រីជាប្រពន្ធធ្លាក់ពីលើម៉ូតូរ៉ឺម៉កកង់បីរងរបួសធ្ងន់ ហេតុការណ៍នេះបានកើតឡើងកាលពីវេលាម៉ោង៤ ទៀបភ្លឺថ្ងៃទី១០ ខែមិថុនា ឆ្នាំ២០១៨ នៅតាមបណ្ដោលផ្លូវសហព័ន្ធរុស្សី នៅសង្កាត់ទឹកល្អក់១ ខណ្ឌទួលគោក។
បើតាមសម្ដីបុរសជាប្ដីបានប្រាប់ឲ្យដឹងថា នៅមុនពេលកើតហេតុ ពួកគាត់មានគ្នា៦នាក់បានត្រឡប់មកពីលក់ផ្លែឈូកខ្ចីនៅឯផ្សារកណ្ដាល គោលបំណងត្រឡប់ទៅផ្ទះនៅសង្កាត់សំរោងក្រោម ខណ្ឌពោធិសែនជ័យ ស្រាប់តែមកចំណុចកើតហេតុ ក៏ស្រាប់តែជនសង្ស័យមានគ្នា៦នាក់ ជិះម៉ូតូ៣គ្រឿងមិនចាំម៉ាក មកពីក្រោយជិះអែបម៉ូតូរ៉ឺម៉កកង់បីរបស់គាត់ រួចធ្វើសកម្មភាពឆក់ទូរស័ព្ទពីដៃកូនស្រីរបស់គាត់ដែលកំពុងចុចលេង ពេលនោះគាត់ក៏បានបើកម៉ូតូរ៉ឺម៉កកង់បីដេញតាម ស្រាប់តែម៉ូតូរ៉ឺម៉កកង់បីនោះក្រឡាប់បណ្ដាលឲ្យប្រពន្ធគាត់ខ្ទាតចេញពីរ៉ឺម៉ក បោកនឹងថ្នល់រងរបួសធ្ងន់ ចំណែកជនសង្ស័យនាំគ្នាជិះម៉ូតូគេចខ្លួនបាត់ស្រមោល។
ក្រោយមក គាត់ក៏បានលើកប្រពន្ធដាក់លើម៉ូតូរ៉ឺម៉កកង់បីដឹកយកទៅសង្គ្រោះនៅមន្ទីពេទ្យ រង់ចាំព្រឹកឡើងទើបមកដាក់ពាក្យបណ្ដឹងនៅប៉ុស្តិ៍នគរបាលទឹកល្អក់១ដើម្បីឲ្យសមត្ថកិច្ចស្រាវជ្រាវចាប់ជនសង្ស័យមកផ្ដន្ទាទោសតាមច្បាប់។
ចែករំលែកព័តមាននេះ