រាជធានីភ្នំពេញ ៖ ក្មេងទំនើងជាជើងខ្លាំងប្រចាំភូមិម្នាក់ក្នុងចំណោមបក្សពួក៥នាក់ ត្រូវកម្លាំងនគរបាលប៉ុស្តិ៍ស្រាវជ្រាវឃាត់ខ្លួនបានក្រោយពីប្រើហិង្សាលើអ្នកភូមិ ហើយគេចខ្លួនបាត់មួយរយៈ ។ ហើយក្មេងទំនើងនេះត្រូវបានសមត្ថកិច្ចឃាត់ខ្លួមកសាកសួរកាលពីម៉ោង១៩និង៤៥នាទីព្រលប់ ថ្ងៃទី៩ មិថុនា ស្ថិតនៅភូមិព្រៃព្រីងខាងត្បូង២ សង្កាត់ចោមចៅ៣ ខណ្ឌពោធិ៍សែនជ័យ។
ក្មេងទំនើងខាងលើឈ្មោះ ចាន់ សុផាន់ណារិទ្ធ ហៅតយ អាយុ២២ឆ្នាំ មុខរបរមិនពិតប្រាកដ ស្នាក់នៅភូមិព្រៃព្រីងខាងត្បូង២ សង្កាត់ចោមចៅ៣ ខណ្ឌពោធិ៍សែនជ័យ។
សមត្ថកិច្ចបញ្ជាក់ប្រាប់ថា កាលពីម៉ោង១៩និង៣០នាទីយប់ ថ្ងៃទី០២ មិថុនា ក្មេងទំនើងខាងលើ ព្រមទាំបក្សពួក៤នាក់ទៀតបានធ្វើយកដុំថ្មគប់ទៅលើប្រជាពលរដ្ឋដែលកំពុងជួបជុំគ្នាផឹកស៊ីក្នុងបន្ទប់ជួល បណ្តាលឱ្យត្រូវរបួសយុវជន២នាក់ ក្រោយពីក្រុមក្មេងទំនើងក៏នាំគ្នារត់គេចខ្លួនអស់តែម្តង។ លុះព្រឹកថ្ងៃទី៣ ជនរងគ្រោះ២នាក់មកដាក់ពាក្យបណ្តឹង និងសូមឱ្យសមត្ថកិច្ចជួយស្រាវជ្រាវតាមឃាត់ខ្លួនក្រុមក្មេងទំនើងខាងលើដើម្បីមកទទួលទោសដែលខ្លួនបានប្រព្រឹត្ត ។ រហូតដល់ព្រលប់កើតហេតុសមត្ថកិច្ចបានឃើញក្មេងទំនើងម្នាក់ខាងលើនៅក្នុងភូមិក៏ឃាត់ខ្លួនតែម្តង ចំណែកបក្សពួក៤នាក់ទៀតគេចខ្លួននៅឡើយ ហើយសមត្ថកិច្ចកំពុងធ្វើការស្រាវជ្រាវតាមចាប់បន្តទៀត។
បច្ចុប្បន្នជនសង្ស័យជាក្មេងទំនើងខាងលើ ត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌពោធិ៍សែនជ័យ៕
ចែករំលែកព័តមាននេះ