ខេត្តបាត់ដំបង ៖ បើតាមសេចក្តីរាយការណ៍បឋមពីសមត្ថកិច្ចបានឱ្យដឹងថា លោកអនុប្រធានមន្ទីរបរិស្ថានមួយរូបបានក្រឡាប់រថយន្តស្លាប់យ៉ាងអាណោចអាធ័ម ហេតុការណ៍នេះកើតឡើងកាលពីម៉ោង៤និង៣០នាទីរសៀល ថ្ងៃទី០៩ មិថុនា នៅលើកំណាត់ផ្លូវមួយកន្លែង ស្ថិតក្នុងភូមិត្រពាំងដងទឹក ឃុំហប់ ស្រុកគាស់ក្រឡ។
សេចក្តីរាយការណ៍បន្តទៀតថា ជនរងគ្រោះខាងលើឈ្មោះ ឯម វិចិត្រ ភេទប្រុស អាយុ៥៥ឆ្នាំ មានមុខតំណែងអនុប្រធានមន្ទីរបរិស្ថានខេត្តបាត់ដំបង រស់នៅភូមិនរា២ ឃុំនរា ស្រុកសង្កែ ហើយគាត់បានបើករថយន្តម៉ាកហ្វ័ត ពាក់ស្លាកលេខ រដ្ឋ,2 -0029។
បើតាមសមត្ថកិច្ចនៅមិនទាន់បានបញ្ជាក់ប្រាប់ពីមូលហេតុដែលនាំឲ្យលោកអនុប្រធានមន្ទីរបរិស្ថានជួបគ្រោះថ្នាក់ចរាចរណ៍នេះនៅឡើយទេ គ្រាន់តែនិយាយថា គាត់បានបើករថយន្តក្រឡាប់ចូលប្រឡាយទឹកដោយខ្លួនឯង។ ហើយគេសង្ស័យថា គាត់បើកបរក្នុងល្បឿនលឿន តែគេមិនដឹងថា គាត់បើកគេចអ្វី ឬជ្រុលចង្កូតដោយខ្លួនឯងឬយ៉ាងណានោះទេ ទើបបានជារថយន្តរបស់គាត់ក្រឡាប់ជាច្រើនត្រឡប់ផ្ងាជើងក្នុងប្រឡាយទឹក ហើយកៀបគាត់ជាប់ក្នុងកាប៊ីនស្លាប់ភ្លាមៗយ៉ាងអាណោចអាធ័មនៅកន្លែងកើតហេតុតែម្ដង។
ក្រោយមកបន្ទាប់ពីចុះទៅពិនិត្យកន្លែងកើតហេតុរួច សមត្ថកិច្ចបានដឹកសពជនរងគ្រោះទៅប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណីហើយ៕
ចែករំលែកព័តមាននេះ