រាជធានីភ្នំពេញ ៖ អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបានអះអាងថា អ្នកនាំពាក្យ មិនត្រឹមតែជាស្ពានចម្លងព័ត៌មានពិតពីស្ថាប័នរបស់ខ្លួនទៅកាន់សាធារណៈជនប៉ុណ្ណោះទេ គឺជាអ្នកការពារសិទ្ធិមនុស្ស ការពារលទ្ធិប្រជាធិបតេយ្យ ការពារសុខសន្តិភាព ស្ថិរភាពនយោបាយ ស្ថេរភាពសង្គម អធិបតេយ្យភាព បូរណភាពទឹកដី ឯករាជ្យ ឯកភាពជាតិ និងសិទ្ធិមនុស្សដែលជាអ្នកគិតគូរទាំងយុទ្ធសាស្ត្រ យុទ្ធវិធី និងជាមេបញ្ជាការនៅលើការគ្រប់គ្រងសមរភូមិសាធារណៈ មតិដែលត្រូវតែសហការឲ្យបានល្អ ជាមួយអ្នកសារព័ត៌មាន ដើម្បីឆ្លើយតបបានលឿន និងមានប្រសិទ្ធភាព ។
ក្នុងពិធីបិទវគ្គបណ្តុះបណ្តាលវិជ្ជាជីវៈមន្ត្រីអ្នកនាំពាក្យកាលពីរសៀលថ្ងៃទី០៨ ខែមិថុនា ឆ្នាំ២០១៨នេះ លោកស្វាយ ស៊ីថា រដ្ឋលេខាធិការ និងជាប្រធានអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបានថ្លែងថា អ្នកនាំពាក្យ គឺជាអ្នកគិតគូរទាំងយុទ្ធសាស្ត និងយុទ្ធវិធី ហើយក៏ជាមេបញ្ជាការនៅលើការគ្រប់គ្រងសមរភូមិសាធារណៈមតិ ។ លោកបន្តថា វគ្គបណ្តុះបណ្តាលវិជ្ជាជីវៈអ្នកនាំពាក្យនេះ ដើម្បីលើកកម្ពស់ការងារផ្សព្វផ្សាយនូវព័ត៌មានពិតជូនប្រជាពលរដ្ឋ ហើយ អ្នកនាំពាក្យត្រូវតែមានទិសដៅផែនការសកម្មភាពច្បាស់លាស់ ហើយត្រូវតាមដានគ្រប់គ្រង និងក្តាប់ព័ត៌មានឲ្យបានគ្រប់ជ្រុងជ្រោយនៅក្នុងស្ថាប័នរបស់ខ្លួននីមួយៗ និងត្រូវតែសហការឲ្យបានល្អជាមួយអ្នកសារព័ត៌មាន ដើម្បីឆ្លើយតបបានលឿនចំបញ្ហា និងមានប្រសិទ្ធភាព ។
លោកស្វាយស៊ីថាបានឲ្យដឹងទៀតថា នេះជាលើកទី២ហើយដែលអង្គភាពព័ត៌មាន និងប្រតិកម្មរហ័សបានរៀបចំវគ្គបណ្តុះបណ្តាលវិជ្ជាជីវៈមន្ត្រីអ្នកនាំពាក្យដែលកាលពីលើកទី១រៀបចំធ្វើឡើងសម្រាប់ថ្នាក់ដឹកនាំ និងមន្ត្រីចំនួន៧៨រូប តំណាងឲ្យ៣៣ក្រសួង និងស្ថាប័នថ្នាក់ជាតិ ហើយលើកទី២នេះ សម្រាប់អាជ្ញាធរថ្នាក់ក្រោមជាតិ ។
លោកបន្តថា តាមរយៈវគ្គបណ្តុះបណ្តាលរយៈពេល៣ថ្ងៃនេះអ្នកនាំពាក្យបានទទួលនូវចំណេះដឹង រូបមន្ត បទពិសោធន៍ថ្មីៗជាច្រើនពីគ្រូឧទ្ទេសនាម និងបានដឹងកាន់តែច្បាស់អំពីចំណុចខ្លាំង ចំណុចខ្វះខាតរបស់ខ្លួនយកទៅកែលំអរ ដើម្បីពង្រឹងការអនុវត្តនូវបេសកកម្មរបស់ខ្លួនជាអ្នកនាំពាក្យ ប្រកបដោយវិជ្ជាជីវៈខ្ពស់ ។ អ្នកនាំពាក្យក៏ដើរតួនាទីដ៏សំខាន់ណាស់ គឺមិនត្រឹមតែជានិមិត្តរូប ឬជាស្ពានចម្លងព័ត៌មានពិតរបស់ស្ថាប័ននីមួយៗរបស់ខ្លួន ទៅកាន់សាធារណៈជនប៉ុណ្ណោះទេ ថែមទាំងជាអ្នកការពារនូវសិទ្ធិមនុស្ស និងលទ្ធិប្រជាធិបតេយ្យដ៏ពិតប្រាកដ ជាពិសេសក្នុងសមរភូមិសាធារណៈមតិអ្នកនាំពាក្យ គឺជាអ្នកការពារនូវសុខសន្តិភាព ស្ថិរភាពនយោបាយ ស្ថេរភាពសង្គម អធិបតេយ្យភាព បូរណភាពទឹកដី ឯករាជ្យ និងការឯកភាពជាតិផងដែរ ។
លោកស្វាយ ស៊ីថា បានឲ្យដឹងទៀតថា សម្តេចតេជោ ហ៊ុន សែន គឺជាអ្នកកសាងនូវសន្តិភាពដូច្នេះអ្នកនាំពាក្យទាំងអស់គ្នាត្រូវចូលរួមថែរក្សា សុខសន្តិភាព ដែលមាននាពេលបច្ចុប្បន្ននេះឲ្យបានស្ថិតស្ថេរគង់វង្សយូរអង្វែង ។ លោកបន្តថា អ្នកនាំពាក្យមានកាតព្វកិច្ចកែតម្រូវជុំវិញការបំភ្លៃ និងការភូតកុហកដោយក្រុមជនមួយចំនួនដែលផ្សព្វផ្សាយនូវព័ត៌មានបំពុល និងបំបែកបំបាក់សង្គមជាតិ ជាពិសេសព័ត៌មានដែលមានចរឹកជាការញុះញង់ដុតបញ្ឆេះ ឲ្យមានឡើងនូវបដិវត្តពណ៌ បង្កចលាចលក្នុងសង្គម ។
ដូចនេះអ្នកនាំពាក្យ គឺជាអ្នកជួរមុខក្នុងការបន្សាប និងពន្លត់នូវព័ត៌មានក្លែងក្លាយដែលជាយុទ្ធសាស្ត្រ និងឧបាយកលដ៏ពិសពុលនៃបដិវត្តន៍ពណ៌នៅពេលដែលមានព័ត៌មានអវិជ្ជមាន និងការចោទប្រកាន់ខុសពុំមានមូលដ្ឋានច្បាស់លាស់ ប៉ះពាល់ដល់ស្ថាប័នរបស់ខ្លួនអ្នកនាំពាក្យចាំបាច់ត្រូវតែធ្វើការបកស្រាយបំភ្លឺតបទៅវិញ តាមទម្រង់ផ្សេងៗឲ្យបានលឿន និងច្បាស់លាស់ ។
សូមបញ្ជាក់ថា វគ្គបណ្តុះបណ្តាលនេះមានសិក្ខាកាមចំនួន៦១នាក់ ដែលជាមន្ត្រីទទួលបន្ទុកការងារព័ត៌មាន មកពីរាជធានីខេត្ត ដើម្បីបណ្តុះបណ្តាលជំនាញ អ្នកនាំពាក្យ និងការដកបទពិសោធន៍បន្ថែមទៀត ពីគ្រូបង្គោលជាជនជាតិកម្ពុជា និងគ្រូជនជាតិបរទេស ក្នុងរយៈពេល៣ថ្ងៃ ដែលត្រូវបិទវគ្គកាលពីរសៀលថ្ងៃទី៨ ខែមិថុនា ឆ្នាំ២០១៨ កន្លងមក ស្ថិតក្នុងអធិបតីភាពលោក ស្វាយ ស៊ីថា រដ្ឋលេខាធិការ និងជាប្រធានអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី ៕
ចែករំលែកព័តមាននេះ