រាជធានីភ្នំពេញ ៖ យុវជន២នាក់ជិះម៉ូតូអត់ស្លាកលេខត្រូវកម្លាំងនគរបាលប៉ុស្តិ៍ចោមចៅ១ឃើញហៅអោយឈប់ តែមិនព្រមឈប់ព្យាយាមបើកម៉ូតូគេចខ្លួន ត្រូវសមត្ថកិច្ចដេញតាមតាំងពីផ្លូវវ៉េងស្រេងរហូតដល់ផ្លូវជាតិលេខ៤ ព្រមទាំងបាញ់គំរាម១គ្រាប់ផងទើបឃាត់បាន ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី៩ ខែមិថុនា នៅលើផ្លូវជាតិលេខ៤ ភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ។
យុវជនទាំង២នាក់ខាងលើមិនត្រូវបានស្គាល់អត្តសញ្ញាណនៅឡើយ។
តាមសំដីសមត្ថកិច្ចប៉ុស្តិ៍បាននិយាយថា មុនហេតុការណ៍នេះកើតឡើង កម្លាំងប៉ុស្តិ៍បានធ្វើការល្បាតក្នុងមូលដ្ឋានលើផ្លូវវ៉េងស្រេង ពេលមកដល់ក្បែរក្លិបមិតណាយ ក្នុងសង្កាត់ចោមចៅ១ ស្រាប់តែឃើញយុវជន២នាក់ខាងលើជិះម៉ូតូមួយគ្រឿងម៉ាក MSX ពណ៌ខ្មៅ អត់មានស្លាកលេខ ឌុបគ្នា ដោយសង្ស័យក៏ហៅអោយឈប់ដើម្បីធ្វើការត្រួតពិនិត្យ តែបែរជាយុវជនខាងលើមិនព្រមឈប់ ហើយបែរជាព្យាយាមបើកម៉ូតូគេចខ្លួនទៅវិញ។
សមត្ថកិច្ចប្រាប់បន្តថា ក្រោយពីយុវជនខាងលើព្យាយាមបើកម៉ូតូគេចខ្លួន សមត្ថកិច្ចក៏បើកម៉ូតូដេញតាមរហូតដល់ផ្លូវជាតិលេខ៤ ក្នុងសង្កាត់ចោមចៅ៣ ទើបឃាត់យុវជនទាំង២នាក់បាន និងនាំយកមកធ្វើការសាកសួរនៅប៉ុស្តិ៍នគរបាលរដ្ឋបាលចោមចៅ១តែម្តង ៕
ចែករំលែកព័តមាននេះ