ខេត្តកំពង់ស្ពឺ ៖ យុវជនម្នាក់បានស្លាប់ភ្លាមនៅនឹងកន្លែង ខណៈត្រឡប់មកពីលេងក្មួយនៅខេត្តតាកែវ ដែលរៀបចេញទៅធ្វើការងារនៅឯប្រទេសកូរ៉េ លុះជិះម៉ូតូត្រឡប់មកផ្ទះវិញ ត្រូវរថយន្តធុនធំដឹកទំនិញបុកចំពីមុខពេញទំហឹង ។
ក្រោយកើតហេតុ អ្នកបើកបរបានបន្ថែមល្បឿនបើករថយន្តរត់ទៅចតនៅក្នុងព្រៃមួយកន្លែងក្បែរកន្លែងកើតហេតុដែរ រួចរត់គេចខ្លួនបាត់ ។ហេតុការណ៍គ្រោះថ្នាក់នេះ កើតឡើងកាលពីវេលាម៉ោង២និង៣៩នាទីរសៀលថ្ងៃទី៧ ខែមិថុនា នៅលើកំណាត់ផ្លូវជាតិលេខ៤១ ត្រង់ចន្លោះបង្គោលគីឡូម៉ែត្រលេខ១១និងលេខ១២ ស្ថិតក្នុងភូមិដីក្រហម ឃុំរកាកោះ ស្រុកគងពិសី ។
មន្ត្រីនគរបាលចរាចរណ៍ស្រុកគងពិសីបានឱ្យដឹងថា យុវជនរងគ្រោះឈ្មោះ ឆេង វណ្ណៈ អាយុ២៣ឆ្នាំ ជាជាងដែក រស់នៅក្នុងភូមិស្នោទី១ សង្កាត់រកាធំ ក្រុងច្បារមន ជិះម៉ូតូម្នាក់ឯងម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ កំពង់ស្ពឺ ១K-៤២៦៤ ។ ចំណែករថយន្តដឹកទំនិញដែលបុកនោះម៉ាកហ៊ីយ៉ាន់ដាយ ក្បាលពណ៌ស ទ្រុងពណ៌ខៀវ ពាក់ផ្លាកលេខ កំពង់ចាម ៣A-៦៥៩៨ មិនស្គាល់អត្តសញ្ញាណអ្នកបើកបរ ។
សាច់ញាតិជនរងគ្រោះរៀបរាប់ថា មុនពេលកើតហេតុជនរងគ្រោះ បានធ្វើដំណើរទៅលេងផ្ទះបងប្អូនជីដូនមួយនៅខេត្តតាកែវ ដែលមានក្មួយម្នាក់រៀបចេញដំណើរទៅធ្វើការងារនៅឯប្រទេសកូរ៉េ ។ លុះពេលរសៀល ក៏ជិះម៉ូតូត្រឡប់មកផ្ទះនៅកំពង់ស្ពឺវិញ តាមផ្លូវជាតិលេខ៤១ ក្នុងទិសដៅពីខាងត្បូងទៅខាងជើង ។ ខណៈមកដល់ចំណុចខាងលើ ស្រាប់តែមានរថយន្តធុនធំ បើកបញ្ច្រាសទិសគ្នាបុកចំពីមុខពេញទំហឹងតែម្តង បណ្តាលឱ្យជនរងគ្រោះប៉ើងធ្លាក់ចូលប្រឡាយស្លាប់ភ្លាមនៅកន្លែងកើតហេតុ ៕
ចែករំលែកព័តមាននេះ