ខេត្តស្ទឹងត្រែង ៖ មណ្ឌលកំសាន្តកាឡាក់ស៊ីខេត្តស្ទឹងត្រែង ត្រូវបានគេពិនិត្យឃើញថា ចំណីអាហារដែលរក្សាក្នុងកំប៉ុងសម្បូរទៅដោយរបស់ហួសកាលបរិច្ឆេទ អាចបង្កផលប៉ះពាល់ ដល់អ្នកបរិភោគ ចំណែកមន្ត្រីកាំកុងត្រូលធ្លាប់បានចុះណែនាំដល់ម្ចាស់មណ្ឌលកម្សាន្តយ៉ាងណា នោះទេ។ ជាក់ស្តែងចំណីអាហារក្សាក្នុងកំប៉ុងដែលជាគ្រឿងក្លែមនោះ ត្រូវបានគេតាមដានពិនិត្យ ឃើញញឹកញយនៅលើសំបកកំប៉ុងដែលសុទ្ធសឹងហួលកាលបរិច្ឆេទ រួមមានសណ្តែកដីកំប៉ុង នំបង្គាកំប៉ុង ផលិតផលរបស់ប្រទេសថៃជាដើម។ អតិថិជននិយមគាំទ្រមណ្ឌលកម្សាន្តកាឡាក់ស៊ី ខេត្តស្ទឹងត្រែង បានថ្លែងការហួសចិត្តយ៉ាងខ្លាំងគ្រាដែលពួកគេយកលុយទៅចំណាយរាប់រយដុល្លារម្តងៗ តែរបស់ក្លែមជាគ្រឿងកំប៉ុងពិនិត្យទៅខូចគុណទាំងអស់។ អតិថិជនទាំងនោះបានលើកឡើងថា ម្ចាស់គ្រប់គ្រងមណ្ឌលកម្សាន្តគួរព្យាយាមឧស្សាហ៍ត្រួតពិនិត្យផលិតផលលក់ដូររបស់ខ្លួនឲ្យបានច្រើន ចៀសវាងបាត់បង់នៃការធ្លាក់ចុះចំនួនអតិថិជនរបស់ខ្លួន ព្រោះករណីនេះពួកគេជូបប្រទះច្រើនលើក មកហើយ។
ដូចជា ថ្ងៃទី៩ ខែមីនា ឆ្នាំ២០១៨ ពិនិត្យឃើញនំបង្គាកំប៉ុងហួសកាលបរិច្ឆេទ ដែលបានផលិតចេញនៅថ្ងៃទី២ ខែវិច្ឆិកា ឆ្នាំ២០១៦ និងផុតថ្ងៃប្រើប្រាស់ ថ្ងៃទី២ ខែវិច្ឆិកា ឆ្នាំ២០១៧ ពោលគឺខូចគុណភាពកាន់ឆ្នាំ។ អតិថិជនដដែលបន្តថា នៅថ្ងៃទី៧ ខែមិថុនា ឆ្នាំ២០១៨ ពួកគេបានចូលកម្សាន្តទៀតក៏ស្រាប់តែប្រទះឃើញសណ្តែកដីកំប៉ុងដែលផលិតចេញនៅថ្ងៃទី១៦ ខែវិច្ឆិកា ឆ្នាំ២០១៦ និងផុតកំណត់ប្រើប្រាស់នៅថ្ងៃទី១៥ ខែមករា ឆ្នាំ២០១៨ ពោលគឺហួសកំណត់ប្រើប្រាស់រយៈពេល៦ខែ ដែលសំបកកំប៉ុងមានស្នាមទង្គិច និងកាន់ច្រេសផងដែរ។ លោក គឹម ប្រុស ប្រធានសាលាកាំកុងត្រូលខេត្តស្ទឹងត្រែងបានបញ្ជាក់ប្រាប់ កោះសន្តិភាព នៅរសៀលថ្ងៃទី៨ ខែមិថុនា ឆ្នាំ២០១៨នេះថា លោកពិតជាទទួលស្គាល់ថា មន្ត្រីសាខាកាំកុងត្រូលរបស់លោកមិនធ្លាប់បានចុះណែនាំដល់បណ្តាម្ចាស់មណ្ឌលកម្សាន្តនោះមែន។
តែបន្ទាប់ទទួលព័ត៌មានជាក់ស្តែងខាងលើនេះលោកនឹងចាត់វិធានការចុះត្រួតពិនិត្យ និងអប់រំណែនាំដើម្បីបញ្ចៀសបញ្ហាប៉ះពាល់ដល់សុខភាពអ្នកបរិភោគ។ លោក អ៊ន ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងក៏បានបញ្ជាក់ប្រាប់ កោះសន្តិភាព នៅរសៀលថ្ងៃទី៨ ខែមិថុនា ឆ្នាំ២០១៨នេះដែរថា ជាធម្មតាមន្ទីរទេសចរណ៍ចុះធ្វើការណែនាំដល់ម្ចាស់មណ្ឌលកម្សាន្តផងដែរ ដូចជាការហាមប្រាមទទួលភ្ញៀវដែលមិនទាន់គ្រប់អាយុ ការរៀបចំឲ្យមានប្រព័ន្ធសុវត្ថិភាព ដល់អតិថិជនជាដើម។ លោកបន្តថា ចំពោះចំណីអាហាអាចនិយាយបានថាជាបន្ទុករបស់កាំកុងត្រូល និងសុខាភិបាល។ លោកថា នៅតាមមណ្ឌលកម្សាន្ត ឬហាងលក់ចំណីអាហារត្រូវមានលិខិតធានា សុវត្ថិភាពអនាម័យលើចំណីអាហាព្រោះទាក់ទងនឹងការហូបចុកដូច្នេះមិនថាមន្ទីរទេសចរណ៍មន្ទីរសុខាភិបាល ឬសាខាកាំកុងត្រូលគឺត្រូវរួមចំណែករក្សាអនាម័យសុខភាពជូនអ្នកទទួលទានដូចគ្នា៕
ចែករំលែកព័តមាននេះ