ប្រទេសហ្វ៊ីលីពីន ៖ ប្រធានាធិបតីហ្វ៊ីលីពីន លោកRODRIGO DUTERTE ថ្លែងកាលពីថ្ងៃទី៧ មិថុនាថា លោកពុំមានបំណងដាក់ប្រទេសទាំងមូលឲ្យស្ថិតក្រោមច្បាប់អាជ្ញាសឹក ដើម្បីឲ្យមានការផ្លាស់ប្ដូរទាំងស្រុងឡើយ។
លោក DUTERTE ក៏បញ្ជាក់ផងដែរថា បែបនេះពុំអាចអនុវត្តបាន ហើយនឹងធ្វើឲ្យប្រទេសបែកខ្ញែក។ ថ្លែងទៅកាន់ក្រុមអ្នកកាសែត នៅទីក្រុងសេប៊ូ ភាគកណ្ដាលប្រទេសជាកន្លែងលោកបើកសម្ពោធព្រលានយន្តហោះថ្មីមួយ ប្រធានាធិបតីហ្វ៊ីលីពីនអះអាងថា ប្រទេសរបស់លោកស្ថិតក្នុងស្ថានភាព ប្រកាសអាសន្នជានិច្ច ចាប់តាំងពីខែកញ្ញា ឆ្នាំ២០១៦ មកម្ល៉េះ។
លោកបញ្ជាក់ថា ច្បាប់អាជ្ញាសឹកពុំអាចអនុវត្តទៅបាន ហើយនឹងពុំដំណើរការឡើយ ដោយវាអាចធ្វើឲ្យប្រជាជាតិមានការបែកខ្ញែក។ លោកបន្តថា ហ្វ៊ីលីពីនធ្លាប់ជួបប្រទះរួចហើយ ច្បាប់អាជ្ញាសឹកក្រោមរបបប្រធានាធិបតី លោកហ្វ័រឌីណង់ ម៉ាកូស កាលពីទសវត្សឆ្នាំ១៩៧០។ បែបនោះធ្វើឲ្យលោកបាត់បង់ប្រជាប្រិយភាព ដោយវាជាការរំលោភបំពានអំណាចយ៉ាងសាហាវ។ ខ្ញុំនឹងពុំអនុញ្ញាតឲ្យមានបែបនេះទៀតទេ។ ក្រោមអាណត្តិរបស់ខ្ញុំមិនអនុញ្ញាតឲ្យមានការជិះជាន់សង្កត់សង្កិនណាមួយឡើយ។
ផ្ទុយទៅវិញប្រធានាធិបតីថ្លែងថា លោកក៏មិនអនុញ្ញាតឲ្យមានការបញ្ចេញមតិហៀរកែងដែរ៕
ចែករំលែកព័តមាននេះ