ខេត្តកោះកុង ៖ កាលពីវេលាម៉ោង៥និង១៥នាទីល្ងាចថ្ងៃទី៧ មិថុនា កម្លាំងការិយាល័យបទល្មើសគ្រឿងញៀន កងរាជអាវុធហត្ថក្រុងខេមរភូមិន្ទ សហការជាមួយកងរាជអាវុធហត្ថស្រុកមណ្ឌលសីមា និងកំលាំងកងរាជអាវុធហត្ថខេត្ត ដឹកនាំដោយលោកវរសេនីយ៍ត្រី នួន…
ខេត្តកោះកុង ៖ កាលពីវេលាម៉ោង៥និង១៥នាទីល្ងាចថ្ងៃទី៧ មិថុនា កម្លាំងការិយាល័យបទល្មើសគ្រឿងញៀន កងរាជអាវុធហត្ថក្រុងខេមរភូមិន្ទ សហការជាមួយកងរាជអាវុធហត្ថស្រុកមណ្ឌលសីមា និងកំលាំងកងរាជអាវុធហត្ថខេត្ត ដឹកនាំដោយលោកវរសេនីយ៍ត្រី នួន វុត្ថា មេបញ្ជាការរងទទួលបន្ទុកផ្នែកគ្រឿងញៀន ដោយមានការចង្អុលបង្ហាញពីលោកឧត្តមសេនីយ៍ត្រី ថុង ណារុង មេបញ្ជាការកងរាជអាវុធហត្ថខេត្ត និងមានការសម្របសម្រួលពីលោក ប៊ូ ប៊ុនហាង ព្រះរាជអាជ្ញាអមសាលាដំបូងខេត្តកោះកុង បានចុះបង្ក្រាបករណីជួញដូរ និងរក្សាទុកដោយខុសច្បាប់នូវសារធាតុញៀន នៅចំណុចស្រែបង្គា ស្ថិតនៅភូមិ២ ឃុំប៉ាក់ខ្លង ស្រុកមណ្ឌលសីមា ខេត្តកោះកុង និងឃាត់ខ្លួនជនសង្ស័យ២នាក់ប្តីប្រពន្ធ ។
តាមប្រភពព័ត៌មានបានឱ្យដឹងថា ជនសង្ស័យទាំង២នាក់ប្តីប្រពន្ធដែលសមត្ថកិច្ចឃាត់ខ្លួនបានរួមមាន ឈ្មោះ ត្រឹង ឌីន ភេទប្រុស អាយុ៥០ឆ្នាំ ជាប្តី មុខរបរចិញ្ចឹមក្តាមលក់ និងឈ្មោះ សុខ វ៉ិត ភេទស្រី អាយុ៤៨ឆ្នាំ ជាប្រពន្ធ មុខរបរចិញ្ចឹមក្តាមលក់ ។ ជនសង្ស័យទាំង២នាក់ប្តីប្រពន្ធស្នាក់នៅភូមិ២ ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
ក្នុងការឃាត់ខ្លួនជនសង្ស័យទាំង២នាក់ប្តីប្រពន្ធខាងលើនេះ សមត្ថកិច្ចដកហូតបានវត្ថុតាងរួមមាន ថ្នាំញៀនប្រភេទមេតំហ្វេតាមីន (ម៉ាទឹកកក) ចំនួន២៥៨កញ្ចប់ (ធំ១៦ និងតូច២៤២) ថ្នាំញៀនប្រភេទមេតំហ្វេតាមីន(WY) ចំនួន១៦៦ គ្រាប់ ទូរស័ព្ទដៃ២គ្រឿង ប្រាក់រៀល៤០០០រៀល និងសម្ភារៈប្រើប្រាស់ សំរាប់ច្រកថ្នាំញៀនមួយចំនួន ។
បច្ចុប្បន្ន ជនសង្ស័យទាំង២នាក់ប្តីប្រពន្ធខាងលើ ត្រូវបានសមត្ថកិច្ចកំពុងកសាងសំណុំរឿងបញ្ជូនទៅសាលាដំបូងចាត់ការតាមនីតិវិធី ៕
ចែករំលែកព័តមាននេះ