រាជធានីភ្នំពេញ ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាចាត់ទុកការលើកកម្ពស់ភាពប្រកួតប្រជែង ជាយុទ្ធសាស្ត្រនិងជាវិស័យអាទិភាពចាំបាច់ ដើម្បីទាក់ទាញការវិនិយោគ និងលើកកម្ពស់បរិយាកាសធុរកិច្ចអំណោយផល ។ ក្នុងជំនួបជាមួយលោក…
រាជធានីភ្នំពេញ ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាចាត់ទុកការលើកកម្ពស់ភាពប្រកួតប្រជែង ជាយុទ្ធសាស្ត្រនិងជាវិស័យអាទិភាពចាំបាច់ ដើម្បីទាក់ទាញការវិនិយោគ និងលើកកម្ពស់បរិយាកាសធុរកិច្ចអំណោយផល ។
ក្នុងជំនួបជាមួយលោក យ៉ូស៊ីហ៊ីសា កៃនូម៉ា (Yoshihisa Kainuma) អគ្គនាយកក្រុមហ៊ុនMinebea Mitsumi លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា គោលនយោបាយនៃការអនុគ្រោះនិងគាំពារការវិនិយោគ ត្រូវបានរាជរដ្ឋាភិបាលកម្ពុជាចាត់ទុកការលើកកម្ពស់ភាពប្រកួតប្រជែង ជាគោលបំណងយុទ្ធសាស្ត្រ និងជាអាទិភាពចាំបាច់ ដែលតាមរយៈនេះ កម្ពុជាបាននិងកំពុងធ្វើការសិក្សាអំពីភាពប្រកួតប្រជែងដូចជា របបពន្ធ ការសម្របសម្រួលពាណិជ្ជកម្ម ការដឹកជញ្ជូន និងប្រាក់ឈ្នួល ជាដើម ដើម្បីទាក់ទាញការវិនិយោគ និងលើកកម្ពស់បរិយាកាសធុរកិច្ចអំណោយ
ផល ។
លោកបន្តថា ៖« ដើម្បីជំរុញការអភិវឌ្ឍ ពង្រីកការវិនិយោគ និងផលិតកម្មរោងចក្រ ក្រសួងសេដ្ឋកិច្ច និងហិរញ្ញវត្ថុ កំពុងរៀបចំក្រុមការងារដើម្បីសិក្សា និងចូលរួមក្នុងការរៀបចំច្បាប់វិនិយោគថ្មី និងការរៀបចំសេចក្តីព្រាងអនុក្រឹត្យ រួមជាមួយលិខិតបទដ្ឋានផ្សេងៗ សំដៅផ្តល់ការលើកទឹកចិត្តចំពោះគម្រោងពង្រីកផលិតកម្មរបស់គម្រោងវិនិយោគមានលក្ខណសម្បត្តិគ្រប់គ្រាន់ដែលមានស្រាប់ឱ្យបានលឿនក្នុងពេលដ៏ខ្លីខាងមុខ » ។
លោក ខាត់ហ្ស៊ូហ៊ិកុ យ៉ូស៊ីដា មន្ត្រីគ្រប់គ្រងក្រុមហ៊ុនមីនេបៀ មីតហ្ស៊ូមី បានថ្លែងនូវកោតសរសើរដល់រាជរដ្ឋាភិបាលកម្ពុជា ដែលបានជំរុញ និងយកចិត្តទុកដល់ការអភិវឌ្ឍ ដែលធ្វើឲ្យអ្នកវិនិយោគទុនទាំងក្នុង និងក្រៅស្រុកទទួលបានជោគជ័យជាបន្តបន្ទាប់ ។ ជាក់ស្តែង ក្រុមហ៊ុនមីនេបៀ នៅក្នុងរយៈពេល៧ឆ្នាំនៃប្រតិបត្តិការក្នុងសង្វាក់ផលិកម្មដំឡើងគ្រឿងបង្គុំអគ្គិសនី និងម៉ូទ័រ ក្រុមហ៊ុនបានបង្កើនទុនវិនិយោគពី២៣លានដុល្លារអាមេរិកក្នុងឆ្នាំ២០១១ រហូតដល់ប្រមាណ៨៥លានដុល្លារអាមេរិក បើគិតត្រឹមឆ្នាំ២០១៨នេះ និងបានជួយបង្កើតការងារប្រមាណជាង៥ពាន់កន្លែងជូនប្រជាពលរដ្ឋកម្ពុជាផងដែរ ។
លោកបន្ថែមថា ៖« ដើម្បីជំរុញការអភិវឌ្ឍវិស័យឧស្សាហកម្មកម្មន្តសាល នាពេលអនាគត ក្រុមហ៊ុនចាំបាច់ត្រូវប្រែក្លាយផលិតកម្មគ្រឿងបង្គុំ ឱ្យទៅជាផលិតកម្មមានតម្លៃបន្ថែមខ្ពស់ ដោយតម្រូវឱ្យមានការគិតគូរលើរបបលើកទឹកចិត្តពន្ធ ដើម្បីទាក់ទាញការវិនិយោគមានទំហំធំ និងរយៈពេលវែង » ។
យោងតាមរបាយការណ៍ក្របខ័ណ្ឌគោលនយោបាយសេដ្ឋកិច្ច វិស័យឧស្សាហកម្មនឹងបន្តរក្សាកំណើនរឹងមាំក្នុងអត្រាប្រចាំឆ្នាំរង្វង់១០% ក្នុងឆ្នាំ២០១៨ និងឆ្នាំ២០១៩ ដែលគាំទ្រដោយភាពរឹងមាំនៃវិស័យសំណង់ និងការបន្តកំណើននៃវិស័យកាត់ដេរ ស្របនឹងសន្ទុះកំណើនខ្ពស់វិស័យកម្មន្តសាលមិនមែនកាត់ដេរទាំងសម្រាប់នាំចេញ និងបម្រើទីផ្សារក្នុងស្រុក ។ ទន្ទឹមនឹងនេះ វិស័យឧស្សាហកម្មផ្សេងទៀតត្រូវបានរំពឹងថា នៅរក្សាបាននូវកំណើនល្អដដែលក្នុងរង្វង់១១,៩%ក្នុងឆ្នាំ២០១៨ និង១២,២%ក្នុងឆ្នាំ២០១៩ ដោយសារការពង្រីកការវិនិយោគដែលមានស្រាប់ និងការវិនិយោគថ្មី ក្នុងអនុវិស័យកម្មន្តសាលមិនមែនកាត់ដេរ ដែលជាជន្ទល់កំណើនមួយដ៏រឹងមាំ រួមមាន ៖ ការផលិតម្ហូបអាហារ និងភេសជ្ជៈ, គ្រឿងបង្គុំអេឡិចត្រូនិក, គ្រឿងបន្លាស់, គ្រឿងសង្ហារិម, កង់ និងស៊ីម៉ងត៍
ជាដើម ៕
ចែករំលែកព័តមាននេះ