បើតាមសារព័ត៌មានពីប្រទេសនីហ្សេរីយ៉ា កាលពីពេលថ្មីៗកន្លងមកផ្សាយថា ស្ត្រីម្នាក់ត្រូវគូដណ្ដឹងចាក់ស្លាប់បាត់បង់ជីវិត ក្រោយពីទាស់សំដីគ្នានៅក្នុងផ្ទះ ។ បុរសជាឪពុកខាងស្រីបានយកសពកូនរបស់ខ្លួនទៅស្រុក និងឲ្យបុរសបង្កហេតុត្រូវរៀបការជាមួយសពកូនស្រីតាមទំនៀមទម្លាប់ប្រពៃណី រួមទាំងទារបណ្ណាការទ្វេដង ។
របាយការណ៍បានបញ្ជាក់ថា ស្ត្រីរងគ្រោះដល់ជីវិតឈ្មោះ Confidence Nwanma អាយុ១៩ឆ្នាំ និងគូដណ្ដឹងឈ្មោះ Saliu Ladayo អាយុ២៤ឆ្នាំ អ្នកស្រុកនៅក្រុងអាគូរ៉េ រដ្ឋអនដូ។ មុនពេលកើតហេតុនាងបានឃើញគូដណ្ដឹងរបស់ខ្លួននៅជាមួយស្រីផ្សេងជាញឹកញាប់ ឃើញដូច្នេះនាងក៏ជេរ ហើយក៏ទាស់សំដីគ្នា ។ ដោយសារតែមានកំហឹងទ្រាំមិនបាន ខាងប្រុសបានយកកាំបិតចាក់គូដណ្តឹងរបស់ខ្លួន បណ្ដាលឲ្យស្លាប់បាត់បង់ជីវិតតែម្តង ក្រោយមកបុរសបង្កហេតុនោះត្រូវប៉ូលិសចាប់ខ្លួន ។
លោក Jude Nwanma ឪពុករបស់នារីរងគ្រោះបានថ្លែងថា « Ladayo ត្រូវយកសពកូនស្រីរបស់លោកត្រឡប់ទៅស្រុកកំណើតនៅរដ្ឋអ៊ីម៉ូ រួចរៀបការជាមួយសពតាមទំនៀមទម្លាប់ ។
បើតាមទំនៀមទម្លាប់ ប្រសិនបើមុនពេលរៀបការខាងប្រុសបានសម្លាប់អនាគតប្រពន្ធនោះ រូបគេត្រូវរៀបការជាមួយសពនៅក្នុងស្រុកភូមិរបស់ខាងស្រី និងខាងបុរសត្រូវផ្ដល់បណ្ណាការទៅខាងស្រីដល់ទៅទ្វេដង មិនអាចបន្ធូរបន្ថយបាននោះទេ ។
បុរសជាឳពុកនារីរងគ្រោះនិយាយថា «នៅពេលការរៀបការបានបញ្ចប់ រឿងរ៉ាវនានានឹងចប់ បើមិនដូច្នេះខ្ញុំនឹងមិនបណ្ដោយឲ្យប្អូនស្រី ឬប្អូនប្រុសរបស់គេបាននៅរស់ទេ ។ បញ្ហានេះមិនមែនជាកំហុសរបស់ខ្ញុំ វាជាទំនៀមទម្លាប់តាំងពីបុរាណ ទោះបីជាគ្មានការកាត់ក្ដីពីតុលាការក៏ដោយ» ៕
ចែករំលែកព័តមាននេះ