ខេត្តសៀមរាប ៖ កម្លាំងការិយាល័យប្រឆាំងគ្រឿងញៀនដោយបានការចូលរួមសហការពីកម្លាំងអធិការដ្ឋាននគរបាលស្រុកជីក្រែង កម្លាំងស្រុកសូទ្រនិគម នគរបាលស្រុកបន្ទាយស្រី សហការជាមួយកម្លាំងការិយាល័យប្រឆាំងគ្រឿងញៀនខេត្តបន្ទាយមានជ័យចុះបង្ក្រាបបទរក្សាទុក និងជួញដូរដោយខុសច្បាប់នូវសារធាតុញៀនឃាត់ខ្លួនបានជនសង្ស័យចំនួន៨នាក់បានជាបន្តបន្ទាប់រយៈ២ថ្ងៃ នៅទីតាំងផ្សេងគ្នា ។
ហេតុការចុះប្រតិបត្តិការបង្ក្រាបករណីគ្រឿងញៀននេះធ្វើឡើងរយៈ២ថ្ងៃនៅទីតាំងផ្សេងគ្នាគឺថ្ងៃទី៦ និងទី៧ ស្ថិតនៅចំនុចភូមិដូនរាជ ឃុំគោក ធ្លកក្រោម ស្រុកជីក្រែង ខេត្តសៀមរាប និងនៅចំនុចភូមិបន្ទាយស្រី ឃុំដំដែក ស្រុកសូទ្រនិគម និងស្រុកបន្ទាយស្រី និងពន្លាតដែនសមត្ថកិច្ចទៅបង្ក្រាបមុខសញ្ញាជួញដូរនៅភូមិភ្នំជញ្ជាំង ឃុំជុំវ៉ារី ស្រុកព្រះនេត្រព្រះ ខេត្តបន្ទាយមានជ័យ ។
តាមប្រភពពីសមត្ថកិច្ចបានប្រាប់ថា ជនសង្ស័យទាំង៨នាក់ ក្នុងនោះមានទី១- ឈ្មោះ កង ភាព ភេទប្រុស ឆ្នាំ មុខរបររត់ម៉ូតូឌុប ទីលំនៅ សង្កាត់ចុងឃ្នៀស ក្រុងខេត្តសៀមរាប (រក្សាទុកជួញដូរ និងប្រើប្រាស់) (មានសារធាតុញៀនក្នុងខ្លួន) ទី២- ឈ្មោះ តាន់ វិបុល ភេទប្រុស មុខរបរគ្មាន ទីលំនៅភូមិកកោះ ឃុំគោកធ្លកក្រោម ស្រុកជីក្រែង ខេត្តសៀមរាប (រក្សាទុកជួញដូរ និងប្រើប្រាស់ ) (មានសារធាតុញៀនក្នុងខ្លួន) ទី៣- ឈ្មោះ ហ៊ី វ៉ាន់នី ភេទប្រុស មុខរបរគ្មាន ទីលំនៅភូមិកកោះ ឃុំគោកធ្លក ក្រោមស្រុកជីក្រែង ខេត្តសៀមរាប (ជួញដូរ និងប្រើប្រាស់) (មានសារធាតុញៀនក្នុងខ្លួន) ទី៤- ឈ្មោះ ថេង សាគរ ភេទប្រុស មុខរបរគ្មាន ទីលំនៅភូមិចក្រី ឃុំជុំវ៉ារី ស្រុកព្រះនេត្រព្រះ (រក្សាទុកជួញដូរ និងប្រើប្រាស់) (មានសារធាតុញៀនក្នុងខ្លួន) ទី៥- ឈ្មោះ រៀម សារ័ត្ន ភេទប្រុស មុខរបរគ្មាន ទីលំនៅភូមិចក្រី ឃុំជុំវ៉ារី ស្រុកព្រះនេត្រព្រះ (ចាត់ចែង និងប្រើប្រាស់)(មានសារធាតុញៀនក្នុងខ្លួន) ទី៦- ឈ្មោះ ណែម វីរាក់ ភេទប្រុស មុខរបរគ្មាន ទីលំនៅភូមិទួលក្រឡាញ់ ឃុំខ្នារសណ្តាយ ស្រុកបន្ទាយស្រី (ប្រើប្រាស់) (មានសារធាតុញៀនក្នុងខ្លួន) ទី៧- ឈ្មោះចាន់ រដ្ឋា ភេទប្រុស មុខរបរគ្មាន ទីលំនៅភូមិទួលក្រឡាញ់ ឃុំខ្នារសណ្តាយ ស្រុកបន្ទាយស្រី (ចាត់ចែង និងប្រើប្រាស់)(មានសារធាតុញៀនក្នុងខ្លួន) និងទី៨-ឈ្មោះ លី ដែន ភេទប្រុស ឆ្នាំកំណើត១៩៨៧ មុខរបរគ្មាន ទីលំនៅភូមិត្បែងខាងលិច ឃុំត្បែង ស្រុកបន្ទាយស្រី ខេត្តសៀមរាប (ចាត់ចែង និងប្រើប្រាស់) (មានសារធាតុញៀនក្នុងខ្លួន) ។
បន្ទាប់ពីកម្លាំងជំនាញបានឃាត់ខ្លួនជនសង្ស័យក្នុងនោះដកហូតបានវត្ថុតាងរួមមាន ម្សៅមេតំហ្វេតាមីន ប្រភេទទឹកកកចំនួន០៨កញ្ចប់ ស្មើនឹងទម្ងន់១០,៣ក្រាម (ទម្ងន់សុទ្ធ) និងទូរស័ព្ទដៃចំនួន០៥គ្រឿង និងឧបករណ៍ប្រើប្រាស់មួយចំនួនផងដែរ ។
បច្ចុប្បន្នជនសង្ស័យទាំង៨នាក់ត្រូវបានសមត្ថកិច្ចបញ្ចូនទៅសាលាដំបូងនៅថ្ងៃទី០៨ ខែមិថុនា ឆ្នាំ២០១៨ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ