ខេត្តក្រចេះ ៖ មណ្ឌលសុខភាពចំនួន៥មណ្ឌល គឺត្រូវធ្វើការសាងសង់បន្ថែមក្នុង គម្រោងសាងសង់របស់ក្រសួងសុខាភិបាលនៅឆ្នាំ២០១៨នេះសម្រាប់ជាទីតាំងផ្តល់សេវា សំណុំសកម្មភាពអតិប្បរិមាក៏ដូចជា បំពេញបន្ថែមនូវការផ្តល់នូវសេវាសុខភាពដល់ពលរដ្ឋនៅ តាមតំបន់នានាដែលនៅឆ្ងាយពីមន្ទីរពេទ្យឲ្យបានទាន់ពេលនិងឆាប់រហ័ស ។ មណ្ឌលសុខភាពដែលនឹងត្រូវធ្វើការសាងសង់បន្ថែមទាំងនេះមាននៅស្រុកសំបូរ…
ខេត្តក្រចេះ ៖ មណ្ឌលសុខភាពចំនួន៥មណ្ឌល គឺត្រូវធ្វើការសាងសង់បន្ថែមក្នុង គម្រោងសាងសង់របស់ក្រសួងសុខាភិបាលនៅឆ្នាំ២០១៨នេះសម្រាប់ជាទីតាំងផ្តល់សេវា សំណុំសកម្មភាពអតិប្បរិមាក៏ដូចជា បំពេញបន្ថែមនូវការផ្តល់នូវសេវាសុខភាពដល់ពលរដ្ឋនៅ តាមតំបន់នានាដែលនៅឆ្ងាយពីមន្ទីរពេទ្យឲ្យបានទាន់ពេលនិងឆាប់រហ័ស ។
មណ្ឌលសុខភាពដែលនឹងត្រូវធ្វើការសាងសង់បន្ថែមទាំងនេះមាននៅស្រុកសំបូរ ស្រុកឆ្លូង ស្រុកចិត្របុរី ស្រុកព្រែកប្រសព្វ និងស្រុកស្នួល ។ នេះបើតាមការបញ្ជាក់ពីប្រធានមន្ទីរសុខាភិបាលខេត្ត គឺលោកឈ្នាង សុវត្ថា ។
លើកឡើងនៅក្នុងពិធីជួបសំណេះសំណាលជាមួយបុគ្គលិកពេទ្យនៃមន្ទីរសុខាភិបាល ខេត្តទាំងចំនួនជាង៤០០នាក់ ពីលោកវ៉ា ថនអភិបាលខេត្តក្រចេះដែលបានធ្វើឡើងនៅថ្ងៃទី៨ មិថុនា ។ លោកប្រធានមន្ទីរសុខាភិបាលលោកឈ្នាង សុវត្ថាបានឲ្យដឹងទៀតថា មន្ទីរសុខាភិបាលមានបុគ្គលិកពេទ្យចំនួន៧១០នាក់ និងមានការិយាល័យសុខាភិបាលស្រុក ប្រតិបត្តិចំនួន២កន្លែង មន្ទីរពេទ្យបង្អែកចំនួន៣កន្លែង មណ្ឌលសុខភាពចំនួន៣០មណ្ឌល និង ប៉ុស្តិ៍សុខភាពចំនួន១៣កន្លែង ។
លោកថា ការអនុវត្តការងាររបស់មន្ទីរសុខាភិបាល គឺមានភាពប្រឈមដោយសារ តំបន់ខ្លះ ចំនួនមណ្ឌលសុខភាព និងប៉ុស្តិ៍សុខភាព គឺនៅមិនទាន់គ្របដណ្តប់ស្របគ្នានោះ សម្ភារបរិក្ខាពេទ្យក៏នៅខ្វះខាត ។ ក្រៅពីនោះ ក៏មានមណ្ឌលសុខភាពខ្លះនៅឆ្ងាយពីតំបន់ពលរដ្ឋរស់នៅធ្វើឲ្យពួកគាត់មានការពិបាកមកទទួលសេវាព្យាបាលស្របជាមួយ និងចំនួនវេជ្ជបណ្ឌិត និងគ្រូពេទ្យជំនាញ ក៏នៅមិនទាន់គ្រប់គ្រាន់ ហើយចំណេះដឹងបុគ្គលិកពេទ្យនៅមានកម្រិត ។
លោកប្រធានមន្ទីរបានលើកឡើងថា កត្តាចំណេះដឹងរបស់ប្រជាពល រដ្ឋមកលើផ្នែកសុខាភិបាលក៏ជាកត្តាប្រឈមដែលធ្វើឲ្យពួកគាត់ងាយទទួលរងប៉ះពាល់សុខ ភាព ដោយសារជំងឺពីស្រាលមកធ្ងន់ក៏ព្រោះ តែតំបន់ខ្លះពលរដ្ឋជឿទៅលើអបិយជំនឿ និងជឿ ទៅលើទម្លាប់ទៅវិញនោះ ។
បើទោះបីជាការប្រឈមនៅមានតិចតួចយ៉ាងណាក្តីអភិបាលខេត្តក្រចេះលោកវ៉ា ថន បានមានប្រសាសន៍ជម្រុញឲ្យមន្ត្រីបុគ្គលិកពេទ្យត្រូវខិតខំយកចិត្តទុកដាក់បំពេញការងារ ការផ្តល់សេវាសុខភាពជូនដល់ពលរដ្ឋកុំឲ្យមានភាពចន្លោះប្រហោងទាំងឥរិយាបថរបស់គ្រូ ពេទ្យទៅលើពួកគាត់ក៏ដូចជា ការបំពេញការងារគោរពតាមវិជ្ជាជីវឲ្យបានខ្ជាប់ខ្ជួន គឺធ្វើឲ្យ យ៉ាងណាឲ្យពលរដ្ឋកាន់តែមានជំនឿមកលើវិស័យសុខាភិបាល ។
ស្របគ្នានោះលោកវ៉ា ថន អភិបាលខេត្តបានសម្តែងការកោតសរសើរដល់បុគ្គលិកមន្ទីរពេទ្យខេត្ត និងមណ្ឌលសុខភាព ដែលក្នុងការជួយសង្គ្រោះព្យាបាលជំងឺដល់ពលរដ្ឋដែលរងគ្រោះដោយការពុលកន្លងមក ក្នុង សកម្មភាពយ៉ាងសស្រាក់សស្រាំបំផុត៕
ចែករំលែកព័តមាននេះ