តាមប្រភពព័ត៌មាន Soccer Laduma បានឲ្យដឹងថា Messi បានប្រាប់ទៅសារព័ត៌មាន El Mundo Deportivo នូវអារម្មណ៍របស់ខ្លួនខ្លះៗទាក់ទងនឹងការចាកចេញដែលមិនគួរឲ្យនឹកស្មានរបស់អ្នកចាត់ការក្លិប Real Madrid លោក Zinedine Zidane ។
កាលពីចុងខែមុន Zidane បានប្រកាសចាកចេញពីតំណែងជាអ្នកចាត់ការនៅក្រោយពេលឈ្នះ Champions League ជាមួយនឹង Liverpool ភ្លាម ។ ការប្រកាសនេះពិតជាធ្វើឲ្យគ្រប់គ្នាមានការភ្ញាក់ផ្អើលជាខ្លាំងព្រោះគ្មាននរណាគិតដល់នោះទេ ។ ជាមួយនឹងការដឹកនាំក្លិបអធិរាជសរយៈពេល២ឆ្នាំកន្លះ លោករកពានបាន៩ ដែលនៅក្នុងនោះរួមមានពាន UEFA Champion League 3ដងជាប់ៗគ្នា ។ នេះពិតជាមិនធម្មតានោះទេសម្រាប់អ្នកចាត់ការក្លិប។
Messi បាននិយាយថា «គ្មាននរណាម្នាក់រំពឹងដឹងមុនទេ ។ វាពិតជាគួរឲ្យភ្ញាក់ផ្អើលខ្លាំងណាស់ តែគាត់មានហេតុផលរបស់គាត់ ។ ខ្ញុំមិនដឹងថាពេលខាងមុខនឹងទៅជាយ៉ាងណាទេ តែវាល្អណាស់ចំពោះការចាកចេញមួយនេះ ព្រោះគាត់បានឈ្នះនូវអ្វីជាច្រើនដែលមិនមាននរណាធ្វើដូច» ។
គួរបញ្ជាក់ផងដែរថា ក្រោយការចាកចេញរបស់ Zidane ក្លិបអធិរាជសមិនទាន់បានប្រកាសថានរណាគេជាអ្នកស្នងតំណែងនោះទេ ។ តែបើតាមការរាយការណ៍ពីអេស្ប៉ាញក្រៅផ្លូវការបានឲ្យដឹងថា មានបេក្ខជនបីនាក់ដែលអាចនឹងត្រូវគេគិតគូរក្នុងនោះរួមមាន Antonio Conte, Mauricio Pochettino និង Massimiliano Allergri ៕
ចែករំលែកព័តមាននេះ