ខេត្តបាត់ដំបង ៖ លោកឧត្តមសេនីយ៍ទោអ៊ុក ឃ្នួច មេបញ្ជាការរងយោធភូមិភាគទី៥ មេបញ្ជាការតំបន់ប្រតិបត្តិការសឹករងបាត់ដំបងនៅវេលាម៉ោង០៧និង៣០នាទីថ្ងៃទី០៨ ខែមិថុនា ឆ្នាំ២០១៨ ដែលអញ្ជើញជាអធិបតីក្នុងពិធីផ្សព្វផ្សាយការងារអប់រំចិត្តសាស្ត្រ ក្រមសីលធម៌សម្រាប់យោធិននៃកងយោធពលខេមរភូមិន្ទ នគរបាលជាតិ និងភ្នាក់ងារសន្តិសុខបោះឆ្នោត ក្នុងដំណើការបោះឆ្នោត ដោយមានការចូលរួមលោកមេបញ្ជាការរង នាយសេនាធិការ កងរាជអាវុធហត្ថខេត្ត, លោកមេបញ្ជាការង នាយរងសេនាធិការ នាយ នាយរងការិយាល័យផ្នែក លោកមេបញ្ជាការ មេបញ្ជាការរង កងវរសនាតូចទាំង៣ ផ្នែកសឹករងក្រុង-ស្រុកទាំង១៤ក្នុងខេត្តបាត់ដំបង និងនាយទាហាន – ទាហានរង ពលទាហានសរុបចំនួន២៩៦នាក់ នៅសាលាហ្វឹកហ្វឺនតំបន់ប្រតិបត្តិការសឹករងបាត់ដំបង ។
មានមតិស្វាគមន៍បើកកម្មវិធីនោះលោកឧត្តមសេនីយ៍ទោអ៊ុក ឃ្នួចបានថ្លែងថា យើងទើបទទួលបានការផ្សព្វផ្សាយតាមវ៉េបសាយប្រព័ន្ធហ្វេសប៊ុក និងផ្សេងៗទៀតក្តីពីក្រសួងព័ត៌មាន ក្រសួងមហាផ្ទៃ និងក្រសួងប្រៃសណីយ៍ និងសារទូរគមនាគមន៍ ដើម្បីទប់ស្កាត់ប្រុងប្រយ័ត្នកុំជឿរាល់ការផ្សាយជាឯកជន ឬស្ថាប័នណាដែលញុះញង់ បំផុសព័ត៌មានមិនពិតក្នុងន័យបង្កភាពវឹកវរក្នុងប្រទេសជាតិ គឺមិនត្រូវឲ្យកើតមានសកម្មភាពទាំងនោះឡើយ សំខាន់រំខានរាល់ មុនការបោះឆ្នោតតែងតែមានគ្រប់សកម្មភាព ដែលមាននិន្នាការនយោបាយប្រឆាំង និងប្រទេសកម្ពុជាយើងមិនឲ្យទទួលបានក្តីសុខឡើយ ទោះបីពេលនេះយើងទាំងអស់គ្នាមានសុខសន្តិភាព និងការអភិវឌ្ឍហើយក្តី ។
លោកបានបញ្ជាក់អំពីក្រមសីលធម៌របស់យោធិនយើង គឺយើងក៏មានកាតព្វកិច្ចចូលរួមក្នុងការបោះឆ្នោតដែរ ហើយចំណែកមួយទៀតត្រូវណែនាំរួមគ្នា ទាំងក្រុមគ្រួសារត្រូវនាំគ្នាទៅចូលរួមការបោះឆ្នោតកុំបីខានឡើយ ។ លោកឧត្តមសេនីយ៍ទោ បានបន្ថែមកងកម្លាំងតំបន់ប្រតិបត្តិការសឹករង យើងបានត្រៀមកម្លាំងសម្រាប់ការចូលរួមខួបកំណើតរបស់យោធភូមិភាគទី៥ លើកទី៣០នៅថ្ងៃទី២៨ មិថុនា ឆ្នាំ២០១៨ខាងមុខនេះ ក្នុងស្មារតីទទួលខុសត្រូវខ្ពស់ ហើយបន្តមកយើងបានផ្សព្វផ្សាយចូលរួមចលនាមូលនិធិ ដើម្បីមនុស្សធម៌ជួយដល់បងប្អូនអតីតយុទ្ធជនដែលមានគុណបំណាច់ចំពោះប្រទេសជាតិកន្លងមកនោះ កុំឲ្យគាត់ជួបការលំបាកទៀតឡើយ ។
បន្ទាប់មកលោកវរសេនីយ៍ឯកអ៊ឹម ដារ៉ា មេបញ្ជាការរងកងរាជអាវុធហត្ថខេត្តបាត់ដំបងជាគ្រូបង្គោលបានធ្វើបទបង្ហាញអំពីក្រមសីលធម៌ សម្រាប់យោធិននៃកងយោធពលខេមរភូមិន្ទ នគរបាលជាតិ និងភ្នាក់ងារសន្តិសុខបោះឆ្នោតក្នុងដំណើរការបោះឆ្នោតដែលបានចែងឡើងពីគណៈកម្មាធិការជាតិរៀបចំការបោះឆ្នោត(គជប) ដល់នាយទាហានទាំងអស់បានយល់ដឹង និងអនុវត្តន៍បន្តក្នុងពេលបោះឆ្នោតនាពេលខាងមុខនេះ ៕
ចែករំលែកព័តមាននេះ