ខេត្តបន្ទាយមានជ័យ ៖ ស្ត្រីវ័យក្មេងម្នាក់បានយំសោកបោកខ្លួនដូចអក រៀបរាប់ទាំងទឹកភ្នែកថា មិនគួរសោះបែកគ្នាតែ១យប់សោះ ស្រាប់តែទទួលព័ត៌មានថា ប្តីស្លាប់នៅក្នុងប្រទេសថៃ ដែលសង្ស័យខ្យល់.
គរ ។ សពបុរសខាងលើ ត្រូវបានភាគីថៃបញ្ជូនមកឲ្យសាច់ញាតិ តាមច្រកទ្វារអន្តរជាតិប៉ោយប៉ែត កាលពីវេលាម៉ោងជិត១២ថ្ងៃត្រង់ថ្ងៃទី៧ ខែមិថុនា ។
ស្ត្រីដែលទ្រហោយំព្រោះប្តីស្លាប់នេះ ឈ្មោះ ស្រីអូន អាយុ២៤ឆ្នាំ មានទីលំនៅក្នុងភូមិឃុំតាបែន ស្រុកស្វាយចេក ខេត្តបន្ទាយមានជ័យ ។ នាងរៀបរាប់ថា ប្តីនាងឈ្មោះ ស៊ិន សោម អាយុ២៧ឆ្នាំ ជាកម្មករសំណង់ និងមានស្រុកកំណើតនៅភូមិតានី ឃុំរោងគោ ស្រុកក្រឡាញ់ ខេត្តសៀមរាប ។
នាងនិយាយដោយក្តីសោកស្តាយជីវិតប្តីថា បើនៅជុំគ្នា ប្តីនាងប្រហែលជាមិនស្លាប់ទេ ព្រោះបើកើតជំងឺខ្យល់ នាងអាចកោសជប់ឲ្យប្តីបាន ។ មុនស្លាប់មួយថ្ងៃ ប្តីបានជូននាងឡើងជិះរថយន្តពីខេត្តឈុនបុរី មកកម្ពុជាវិញ ដើម្បីធ្វើលិខិតឆ្លងដែនឱ្យបានសមស្របនឹងគេ ដឹងអីបែកគ្នាតែ១ថ្ងៃ ព្រឹកឡើងស្រាប់តែទទួលព័ត៌មានថាប្តីស្លាប់គួរឲ្យរន្ធត់ខ្លាំងណាស់ ។
តាមព័ត៌មានថា ប្តីនាងស្លាប់នៅខេត្តឈុនបុរី ប្រទេសថៃ ខណៈទៅធ្វើការជាកម្មករសំណង់នៅទីនោះ ហើយត្រូវកម្មកររួមការងារជាមួយគ្នាប្រទះឃើញស្លាប់នៅព្រឹកថ្ងៃទី៦ ខែមិថុនា ។ សាច់ញាតិសពនិយាយថា ជនរងគ្រោះកាលពីរសៀលថ្ងៃទី៥ ខែមិថុនា ខណៈកំពុងធ្វើការបានប្រាប់គេឯងថាខ្លួនចុកពោះ ប៉ុន្តែមិនព្រមសម្រាកពីការងារទេ បើទោះជាកម្មកររួមការងារជាមួយគ្នាប្រាប់ឲ្យសម្រាកក្តី ។ សពជនរងគ្រោះ ក្រោយពីបញ្ជូនដល់កម្ពុជាវិញ ត្រូវបានសាច់ញាតិជួលរថយន្តដឹកបន្តទៅស្រុកក្រឡាញ់ ខេត្តសៀមរាប ដើម្បីធ្វើបុណ្យតាមប្រពៃណីក្រោមការសោកសង្រេងរបស់ស្ត្រីជាភរិយា ៕
ចែករំលែកព័តមាននេះ