រាជធានីភ្នំពេញ ៖ បុរសម្នាក់ស្រវឹងជោកបើករថយន្តបាឡែនមួយគ្រឿងបោះពួយយ៉ាងលឿន ហើយបត់មិនទាន់ក៏ជ្រុលចង្កូតទៅបុកបង្គោលស្លាកបង្ហាញលេខផ្លូវបណ្តាលឲ្យរងការខូចខាត ។ ហេតុការណ៍នេះកើតឡើងកាលពីវេលាម៉ោង១១និង២០នាទីយប់ ថ្ងៃទី៧ ខែមិថុនា ឆ្នាំ២០១៨ ត្រង់ចំណុចទល់មុខនឹងសាលាបឋមសិក្សាភ្នំពេញថ្មី តាមបណ្តោយផ្លូវហាណូយ កែងនឹងផ្លូវ២៨គ្រួសារ ស្ថិតក្នុងភូមិរោងចក្រ សង្កាត់គោកឃ្លៀង ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ស្រវឹងជោក បើកបររថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ ២Z-៦០២៨ ធ្វើដំណើរតាមបណ្តោយផ្លូវហាណូយ ក្នុងទិសដៅពីជើងទៅត្បូង និងបើកបរក្នុងល្បឿនលឿន លុះមកដល់ចំណុចកើតហេតុ រថយន្តក៏បានបួងចង្កូតបត់ស្តាំទៅផ្លូវ២៨គ្រួសារ ដោយមិនបានបន្ថយល្បឿន ក៏ជ្រុលទៅបុកបង្គោលស្លាកបង្ហាញលេខផ្លូវ រួចផ្ទុបនឹងបង្គោលភ្លើង បណ្តាលឱ្យវៀចបង្គោលស្លាកបង្ហាញលេខផ្លូវរងការខូចខាត ចំណែករថយន្តបង្កបានរងការខូចខាតក្រពឹតផ្នែកខាងមុខចំហៀងខាងឆ្វេង។ ភ្លាមៗនោះរថយន្តបង្កបានព្យាយាមបើករត់គេចទៅមុខទៀតបានចម្ងាយប្រមាណ២០ម៉ែត្រពីកន្លែងកើតហេតុក៏ឈប់ចតអែបនឹងចិញ្ចើមផ្លូវ រួចអ្នកបើកបរបានរត់គេចខ្លួនបាត់ បន្សល់ទុកតែរថយន្តដែលរងការខូចខាត។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ ហើយបានធ្វើការទាក់ទងទៅសមត្ថកិច្ចជំនាញឲ្យចុះមកធ្វើការស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញដើម្បីរងចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់៕
ចែករំលែកព័តមាននេះ