រាជធានីភ្នំពេញ ៖ បើទោះបីជាជិតដល់ថ្ងៃបោះឆ្នោតថ្នាក់ជាតិ តែសុខភាពនៃវិស័យហិរញ្ញវត្ថុ មិនមានអ្វីប្រែប្រួលឬគួរឲ្យបារម្ភឡើយ ក្នុងនោះគេឃើញកម្ចីឥណទាន និងប្រាក់បញ្ញើនៅតាមស្ថាប័នមីក្រូហិរញ្ញវត្ថុនានា ដែលមានអាជ្ញាប័ណ្ណទទួលប្រាក់បញ្ញើពីអតិថិជន បានកើនឡើងទន្ទឹមគ្នា ។ ទោះជាយ៉ាងណាក៏ដោយ ប្រធានសមាគមមីក្រូហិរញ្ញវត្ថុកម្ពុជា ហៅកាត់ថា(CMA) បានប្រកាសឲ្យសមាជិករបស់ខ្លួនទាំងអស់ គួរតែត្រៀមទុនបម្រុងសម្រាប់ទប់ទល់នឹងស្ថានការណ៍ដែលអាចកើតមានជាយថាហេតុ ក្រែងមានអតិថិជនអ្នកដាក់ប្រាក់បញ្ញើត្រូវការដកប្រាក់បន្ទាន់យកទៅប្រើប្រាស់ បើទោះបីជាស្ថានភាពនយោបាយមិនប្រែប្រួលក៏ដោយ ។
ថ្លែងនៅក្នុងកិច្ចសម្ភាសន៍មួយជាមួយសារព័ត៌មានកោះសន្តិភាព លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា និងជានាយកប្រតិបត្តិគ្រឹះស្ថានមីក្រូហិរញ្ញវត្ថុ អេ អឹម ខេ បានឲ្យដឹងថា ស្ថានភាពវិស័យមីក្រូហិរញ្ញវត្ថុកម្ពុជាក្នុងឆ្នាំ២០១៨នេះ នៅតែមានភាពល្អប្រសើរ បើទោះបីជាឆ្នាំនេះ កម្ពុជាមានព្រឹត្តិការណ៍បោះឆ្នោតជាតិក៏ដោយ ។ លោកថា ៖« ការបោះឆ្នោតឆ្នាំនេះ មិនមែនជាលើកទី១ ទី២ ឬទី៣ទេ តែវាជាលើកទី៦ហើយ តាំងពីឆ្នាំ១៩៩៣មក ហើយនៅក្រោយការបោះឆ្នោតម្ដងៗ ក៏មិនឃើញមានព្រឹត្តិការណ៍អីអាក្រក់ប៉ុន្មានដែរ ក្នុងនោះគេឃើញអាជីវកម្មនានានៅកម្ពុជានៅតែដើរទៅមុខ និងបានរុញឲ្យកំណើនសេដ្ឋកិច្ចឈរក្នុងកម្រិតមួយគួរឲ្យកត់សម្គាល់ »។
លោកបន្ដថា ទោះជាយ៉ាងណា សម្រាប់ការបោះឆ្នោតខាងមុខនេះ គ្រប់គ្រឹះស្ថានមីក្រូហិរញ្ញវត្ថុទាំងអស់ គួរតែត្រៀមទុនបម្រុងរបស់ខ្លួនឲ្យបានត្រឹមត្រូវ និងត្រៀមទប់ទល់ជាមួយនឹងស្ថានការណ៍ ។ ក្នុងករណីអតិថិជនត្រូវការសាច់ប្រាក់ដកជាបន្ទាន់ គ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណទទួលប្រាក់បញ្ញើទាំងអស់ត្រូវតែមានប្រាក់សម្រាប់ទុកបើកជូនអតិថិជន ។
លោកនិយាយថា ៖« តាមពិតទៅ ទុនបម្រុងមិនមែនសម្រាប់តែទុកក្នុងពេលមានព្រឹត្តិការណ៍បោះឆ្នោតនោះទេ តែគ្រប់គ្រឹះស្ថានទាំងអស់ត្រូវតែត្រៀមទុននេះឲ្យបានល្អជានិច្ច។ ម្យ៉ាងទៀត នៅពេលស្នើសុំបើកគ្រឹះស្ថានមីក្រូហិរញ្ញវត្ថុនោះ ធនាគារជាតិក៏បានតម្រូវឲ្យតម្កល់ប្រាក់មួយចំនួននៅក្នុងធនាគារជាតិដែរ ដើម្បីការពារហានិភ័យកើតឡើង នឹងយកប្រាក់តម្កល់នោះមកដោះស្រាយ ក៏ប៉ុន្តែគ្រឹះស្ថានមីក្រូហិរញ្ញវត្ថុ ក៏ត្រូវមានទុនពីខាងក្រៅដើម្បីត្រៀមនៅក្នុងស្ថាប័នរបស់ខ្លួនដែរ » ។
ប្រធានសមាគមរូបនេះបន្តទៀតថា សម្រាប់ ប្រភពទុនក៏មាន២ប្រភេទដែរ ក្នុងនោះគឺទុនពីខាងក្រៅប្រទេស និងទុនក្នុងស្រុក ហើយទុនក្នុងស្រុកនេះ គឺបានមកពីប្រាក់បញ្ញើរបស់អតិថិជន ដែលយកមកដាក់នៅក្នុងស្ថាប័នមីក្រូហិរញ្ញវត្ថុតែម្ដង ។
លោកបន្ថែមថា សម្រាប់គ្រឹះស្ថានមីក្រូហិរញ្ញវត្ថុទាំងអស់ចង់បានណាស់ គឺទំហំប្រាក់បញ្ញើច្រើនជាងឥណទាន តែធាតុពិតសម្រាប់វិស័យមីក្រូហិរញ្ញវត្ថុកម្ពុជានាពេលបច្ចុប្បន្ននេះ ទំហំឥណទានមានច្រើនជាងទំហំប្រាក់បញ្ញើ ដូចនេះ ទាមទារឲ្យគ្រឹះស្ថានមីក្រូហិរញ្ញវត្ថុត្រូវស្វែងរកទុនបន្ថែមពីខាងក្រៅ ដើម្បីផ្ដល់កម្ចីដល់អតិថិជន ។ លោកថា ៖« បច្ចុប្បន្ននេះ ប្រាក់បញ្ញើពីអតិថិជននៅក្នុងមីក្រូហិរញ្ញវត្ថុទូទាំងប្រទេស មានប្រមាណតែ៥០%នៃប្រាក់ឥណទានប៉ុណ្ណោះ ។ ជាក់ស្ដែង ប្រាក់បញ្ញើមានតែជាង២ពាន់លានដុល្លារអាមេរិកប៉ុណ្ណោះ ខណៈប្រាក់កម្ចីមានរហូតដល់ជាង៤ពាន់លានដុល្លារអាមេរិក » ។
គួរបញ្ជាក់ផងដែរថា ក្រៅពីមីក្រូហិរញ្ញវត្ថុ ស្ថាប័នធនាគារពាណិជ្ជ ដែលកំពុងធ្វើប្រតិបត្តិការនៅក្នុងប្រទេសកម្ពុជា ក៏បានត្រៀមទុនរបស់ខ្លួន ដើម្បីទប់ទល់នឹងស្ថានការណ៍នៅជិតការបោះឆ្នោតឆ្នាំ២០១៨នេះដែរ បើទោះជាបច្ចុប្បន្ននេះ ស្ថានការណ៍នយោបាយនៅតែមានភាពល្អប្រសើរក៏ដោយ ។
ជាក់ស្ដែងធនាគារពាណិជ្ជធំជាងគេ អេស៊ីលីដា ក៏បានឲ្យដឹងថា ខ្លួនបានត្រៀមរួចរាល់ហើយសម្រាប់ទុនបម្រុងទុកជូនអតិថិជនរបស់ខ្លួនដក នៅពេលត្រូវការប្រើប្រាស់សាច់ប្រាក់ជាចាំបាច់ណាមួយនៅក្នុងពេលបោះឆ្នោត និងក្រោយពេលបោះឆ្នោតថ្នាក់ជាតិ នៅចុងខែកក្កដា ឆ្នាំ២០១៨ខាងមុខនេះ ៕
ចែករំលែកព័តមាននេះ