ខេត្តកំពត ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុ ដោយជួបគ្រោះថ្នាក់ចរាចរណ៍រវាងជនរងគ្រោះជិះម៉ូតូត្រូវរថយន្តមួយគ្រឿងបុកពេញទំហឹង ខណៈរថយន្តកំពុងមានល្បឿនលឿន ហើយម៉ូតូជនរងគ្រោះបត់ទៅខាងស្តាំផ្លូវរថយន្តក៏ត្រូវបុកពេញទំហឹងទៀត បណ្តាលឲ្យស្លាប់ភ្លាមៗនៅកន្លែងកើតហេតុតែម្តង ។ ហេតុការដ៏រន្ធត់នេះបានកើតឡើង កាលថ្ងៃទី០៧ ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ៤១ (ផ្លូវអង្គឌួង) ត្រង់ចំណុចភូមិដំណាក់ឈ្នួល ឃុំត្រពាំងបី ស្រុកឈូក ខេត្តកំពត ។
លោកវរសេនីយ៍ទោ ពុធ សឺង នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបានឲ្យដឹងថា ករណីគ្រោះថ្នាក់ចរាចរណ៍ខាងលើយានយន្តទាំងពីរគ្រឿងបើកបរក្នុងទិសដៅបញ្ជ្រាសទិសគ្នា(ត្បូងជើង)ជារថយន្តមួយគ្រឿងពណ៌ស ពាក់ស្លាកលេខភ្នំពេញ 2Aq- 2009 លុះមកដល់ចំណុចកើតហេតុអ្នកបើកបរម៉ូតូបានបត់ឆ្លងផ្លូវចូលមកចំណីផ្លូវខាងរថយន្ត បណ្តាលឲ្យរថយន្តកំពុងតែលឿនផងនោះចាប់ហ្វាំង មិនទាន់ក៏បុកពេញទំហឹង បណ្តាលឲ្យស្លាប់ភ្លាមៗនៅកន្លែងកើតហេតុយ៉ាងអាណោចអាធម៌ ។
ក្រោយពីកើតហេតុអ្នកបើកបររថយន្តបានចុះរត់គេចខ្លួនបាត់ បន្សល់ទុករថយន្តដែលខូចខាតធ្ងន់នៅកន្លែងកើតហេតុ ។ ចំណែកជនរងគ្រោះអ្នកបើកបរម៉ូតូដែលស្លាប់បាត់បង់ជីវិតមានឈ្មោះ ង៉ែត ប្រុស ភេទប្រុស អាយុ៤៩ឆ្នាំ មានទីលំនៅកន្លែងកើតហេតុខាងលើ ម៉ូតូជនរងគ្រោះម៉ាកសេ១២៥ ពណ៌ខ្មៅ ពាក់ផ្លាកលេខភ្នំពេញ១AT-០៨៦២ ខូចខាតធ្ងន់ធ្ងរដូចរថយន្តដែរ ។
ក្រោយពីសមត្ថកិច្ចធ្វើការវាស់វែងរួច សពក៏ត្រូវសមត្ថកិច្ចប្រគល់ឲ្យក្រុមគ្រួសារយកទៅរៀបចំធ្វើបុណ្យតាមប្រពៃណី ។ ឯចំណែកយានយន្តទាំងពីរគ្រឿងត្រូវបានសមត្ថកិច្ចនាំទៅរក្សាទុកនៅអធិការដ្ឋាននគរបាលស្រុកឈូករង់ចាំដោះស្រាយគ្នាទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ