រាជធានីភ្នំពេញ ៖ មន្ត្រីជំនាញរបស់ក្រសួងរៀបចំដែនដី នគរូបនីយកម្ម និងសំណង់ បានអះអាងថា តាមរយៈការស្រាវជ្រាវ និងអង្កេតជាក់ស្តែងនោះ ប្រជាពលរដ្ឋដែលបានទិញផ្ទះ ឬអគារប្រមាណពី៦៥%ទៅ៧០% សម្រាប់ស្នាក់នៅ ចំណែកពី២៥%ទៅ៣០% ពួកគាត់បានទិញសម្រាប់ជួលយកកម្រៃប្រចាំខែ ឬទុកលក់យកចំណេញ និងសម្រាប់ចែកឲ្យកូនចៅជាដើម។ លោក ឡៅ ទិព្វសីហា អនុរដ្ឋលេខាធិការ ទទួលបន្ទុកសំណង់ របស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា គិតពីឆ្នាំ២០០០ រហូតដល់ឆ្នាំ២០១៨នេះ ការបោះទុនវិនិយោគពីបរទេសលើវិស័យសំណង់ ចំនួន៣២៧គម្រោង ផ្ទៃក្រឡាសំណង់មាន១៣.៩៧៣.៣៦៧ម៉ែត្រការ៉េ មានតម្លៃប៉ាន់ស្មាន ទុនវិនិយោគចំនួន ៤.៨៩២ លានដុល្លារសហរដ្ឋអាមេរិក។ ក្នុងចំណោម១៨ប្រទេស ក្នុងនោះប្រទេសដែលវិនិយោគច្រើនជាងគេ គឺជនជាតិចិន បន្ទាប់មក ជនជាតិកូរ៉េ ជប៉ុន ថៃ និងសិង្ហបុរីជាដើម ដែលជនបរទេសទាំងនោះ មានសិទ្ធិទិញចាប់ពីជាន់ទី១ឡើងទៅ ចំណែកឯជាន់ផ្ទាល់ដីមិនមានសិទ្ធិទិញនោះទេ។
លោកបន្តថា បន្ទាប់ពីរាជរដ្ឋាភិបាលបានរៀបចំ និងអនុវត្តន៍ច្បាប់ស្តីពីការផ្តល់សិទ្ធិកម្មសិទ្ធិលើចំណែកឯកជន លើនៃអគារសហកម្មសិទ្ធិជនបរទេស បានអនុម័តកាលពីឆ្នាំ២០១០ តែអនុវត្តន៍នៅឆ្នាំ២០១១ រហូតដល់ឆ្នាំ២០១៧នេះ ក្រសួងបានចុះបញ្ជីផ្ទេរសម្រាប់ការទិញចំណែកឯកជននៃអគារសហកម្មសិទ្ធិដល់ជនជាតិខ្មែរ និងជនបរទេសមានចំនួន ២.៨៥៧ លំនៅក្នុងនោះកម្មសិទ្ធិករជាជនបរទេសចំនួន៧៣៣បណ្ណ័ អគារសហកម្មសិទ្ធិដែលលក់ផ្តាច់ចំនួន១.០៣៥ បណ្ណ័ អំណោយផ្តាច់២០ និងសន្តតិកម្មចំនួន០១ អគារ។ លោក ឡៅ ទិព្វសីហា បានឲ្យដឹងទៀតថា តាមរយៈការស្រាវជ្រាវលើទីផ្សារពលកម្ម នៃវិស័យសំណង់ បានបង្ហាញថា វិស័យសំណង់ បានស្រូបយកកម្លាំង នៅទូទាំងប្រទេសមានចំនួន២៣ម៉ឺននាក់ទៅ២៦ម៉ឺននាក់ក្នុងមួយថ្ងៃ និងស្រូបបានអ្នកបច្ចេកទេស ជាវិស្វករ ចំនួន ៣.០០០នាក់។
ចំណែកស្ថាបត្យករស្រូបបានចំនួន១.៥០០នាក់ ដូចនេះកម្លាំងពលកម្មនៅក្នុងប្រទេសកម្ពុជា យើងមានកម្លាំងខ្លាំងក្លា ដែលទីផ្សារក្នុងវិស័យសំណង់នៅកម្ពុជានៅមានកង្វះខាតនៅឡើយ ហើយកន្លងមកនេះ ក្រសួងបានចេញនូវសៀវភៅផ្សព្វផ្សាយអំពីសុវត្ថិភាពក្នុងការដ្ឋាន ដើម្បីចៀសវាងគ្រោះថ្នាក់ផ្សេងៗដល់កម្មករ និងបានធ្វើការណែនាំដល់ម្ចាស់ការដ្ឋាន តំណាងក្រុមហ៊ុនសាងសង់ និងតំណាងអ្នកទទួលការសាងសង់ ឲ្យមានការប្រុងប្រយ័ត្នផងដែរ។ លោកបានបញ្ជាក់ថា វិស័យសំណង់ គឺជាចន្ទល់មួយយ៉ាងសំខាន់ ហើយក៏ជាវិស័យមួយរួមចំណែក និងនាំមុខនៃកំណើនសេដ្ឋកិច្ចជាតិ ហើយក៏បង្ហាញពីការវិនិយោគជាក់ស្តែង និងជាសញ្ញាកៀរគរវិស័យឯកជនក្នុងស្រុក និងក្រៅប្រទេសឲ្យមកវិនិយោគ និងបណ្តាក់ទុនលើវិស័យដីធ្លី និងសំណង់នៅព្រះរាជាណាចក្រកម្ពុជា។
ក្រោមការដឹកនាំប្រកបដោយភាពឈ្លាសវៃរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ដែលសម្តេចជាប្រមុខដឹកនាំដ៏ឈ្លាសវៃបំផុត ទៅលើការគូសវាសជាស្ថាបនិក ជាស្ថាបត្យករដ៏ល្បីក្នុងការកសាង និងអភិវឌ្ឍន៍ប្រទេសកម្ពុជាយើងពីឆ្នាំ១៩៧៩ រហូតដល់ពេលនេះ។ សូមបញ្ជាក់ថា ក្នុងរយៈពេល៥ឆ្នាំ ឬមួយអណត្តិទី៥ របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី នាពេលកន្លងមកនេះ បានធ្វើឲ្យរីចម្រើនលើគ្រប់វិស័យ ជាពិសេសវិស័យសំណង់មានការកើនឡើងចំនួន១១.៩៥៩ គម្រោង ដែលមានទុនវិនិយោគ សរុបប្រមាណ ២០.៩៧៧ លានដុល្លារសហរដ្ឋអាមេរិក៕
ចែករំលែកព័តមាននេះ