ព្រមានចាត់វិធានការផ្លូវច្បាប់ ចំពោះគ្រឿងចក្រដែលបន្តកាយដីចំណីព្រែកខុសច្បាប់
- ព្រៃវែង
ខេត្តព្រៃវែង ៖ លោក ហ៊ី ធួក អភិបាលស្រុកពារាំង បានថ្លែងប្រាប់ក្រុមអ្នកសារពត៌មាន កាលពីរសៀល ថ្ងៃទី០៦ ខែមិថុនា…
ខេត្តព្រៃវែង ៖ លោក ហ៊ី ធួក អភិបាលស្រុកពារាំង បានថ្លែងប្រាប់ក្រុមអ្នកសារពត៌មាន កាលពីរសៀល ថ្ងៃទី០៦ ខែមិថុនា…
ខេត្តព្រៃវែង ៖ លោក ហ៊ី ធួក អភិបាលស្រុកពារាំង បានថ្លែងប្រាប់ក្រុមអ្នកសារពត៌មាន កាលពីរសៀល ថ្ងៃទី០៦ ខែមិថុនា ថា លោកនឹងចាត់វិធានការយ៉ាងតឹងរ៉ឹងបំផុត ចំពោះគ្រឿងចក្រមួយចំនួនដែលលួចកាយដីចំណីព្រែក អូររំលេច នៅចំណុចភូមិវៃវេទ ឃុំរាប ស្រុកពារាំង ខេត្តព្រៃវែង ដោយពុំមានច្បាប់អនុញ្ញាតពីមន្ត្រីជំនាញ និងអាជ្ញាធរមូលដ្ឋាននោះ។ លោកអភិបាលស្រុកពារាំង បានបញ្ជាក់ថា ចាប់ពីពេលនេះទៅបើលោករកឃើញថា បើក្រុមហ៊ុនណា នៅតែបន្តយកគ្រឿងចក្រទៅកាយយកដីចំណីព្រែក ឬដីបឹងសាធារណៈទៀតនោះ លោកនឹងបញ្ជាឲ្យកម្លាំងសមត្ថកិច្ច ចុះចាប់យកគ្រឿងចក្រទាំងនោះ កសាងសំណុំរឿងបញ្ជូនទៅកាន់សាលាដំបូងខេត្ត ចាត់ការទៅតាមផ្លូវច្បាប់ ដោយពុំមានការយោគយល់អ្វីទាំងអស់។
លោក ហ៊ី ធួក អភិបាលស្រុកពារាំង ថ្លែងបែបនេះ បន្ទាប់ពីមានប្រពន្ធ័ផ្សព្វផ្សាយពត៌មានក្នុងស្រុកមួយចំនួន បានចុះផ្សាយអំពីសកម្មភាពរបស់អាជ្ញាធរឃុំរាប ដែលបានលក់អាចម៍ដីព្រែក អូររំលេច ទៅឲ្យក្រុមឈ្មួញរកស៊ីដឹកដីលក់ ក្រោមហេតុផលស្តារព្រែក និងធ្វើផ្លូវក្នុងភូមិ ប៉ុន្តែពេលដែលមន្ត្រីជំនាញចុះសិក្សាស្រាវជ្រាវ ទើបរកឃើញថា ហេតុផលនោះ គ្រាន់តែជាលេសដើម្បីលួចកេង យកផលប្រយោជន៍ប៉ុណ្ណោះ ព្រោះអាចម៍ដីដែលគេជីកយកពីក្នុងព្រែកទៅមានចំនួនរាប់ពាន់ឡាន ប៉ុន្តែផ្លូវដែលគេធ្វើឃើញចាក់ដីបានតែ៥០ទៅ៦០ឡានប៉ុណ្ណោះ។
ជាមួយគ្នានោះដែរ ក៏មានប្រជាពលរដ្ឋជាច្រើនគ្រួសារ បាននាំគ្នាដាក់ពាក្យប្តឹងខាងគ្រឿងចក្រដែលលួចកាយយកអាចម៍ដីក្នុងព្រែក អូររំលេច ត្រង់ចំណុចខាងជើងស្ពានជ្រៃ ចម្ងាយប្រហែល២០០ម៉ែត្រ ស្ថិតក្នុងភូមិវៃវេទ ឃុំរាប ស្រុកពារាំង ថា បានជីកកាយយកអាចម៍ដី បណ្តាលឲ្យកើតទៅជារណ្តៅជ្រៅៗពេញព្រែក ហើយរណ្តៅទាំងនោះបានបាក់ដី ធ្វើឲ្យប៉ះពាល់ដល់ដីស្រែប្រាំង របស់អ្នកស្រុកជាច្រើនកន្លែង ដែលនៅក្បែនោះថែមទៀតផង។ ដើម្បីទប់ស្កាត់សកម្មភាពជីកកាយយកអាចម៍ដី ពីក្នុងព្រែកក្នុងបឹងសាធារណៈដោយខុសច្បាប់តទៅទៀត ក៏ដូចជាទប់ស្កាត់កុំឲ្យក្រុមជនខិលខូចទាំងនោះ លួចធ្វើសកម្មភាពបង្កផលប៉ះពាល់ដល់ប្រជាពលរដ្ឋតទៅទៀត។ ទើបលោកអភិបាលស្រុកពារាំង បានចេញមុខព្រមាន និងចាត់វិធានការយ៉ាងតឹងរ៉ឹងបំផុតទៅលើបណ្តាគ្រឿងចក្រដែលប្រព្រឹត្តបទល្មើសទាំងនោះ ដោយពុំមានការយោគយល់ទៀតឡើយ៕
https://www.youtube.com/watch?v=3X1wmzQ1JuY
ចែករំលែកព័តមាននេះ