រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជានៅព្រឹកថ្ងៃទី៧ មិថុនា ឆ្នាំ២០១៨នេះ បានអនុម័តសេចក្តីព្រាង វិសោធនកម្មនៃច្បាប់ស្តីពីការងារ ដោយតម្រូវឲ្យនិយោជកទូទាត់ប្រាក់ បំណាច់អតីតភាពការងារជូនកម្មករនិយោជិត ក្នុងរយៈពេល៦ខែម្តងជារៀងរាល់ខែ។ ការអនុម័តសេចក្តីព្រាងវិសោធនកម្មច្បាប់ស្តីពីវិសោធនកម្មមាត្រា៨៧ ចំណងជើងចំ ណុច«គ» ផ្នែកទី៣ នៃជំពូកទី៤ មាត្រា៨៩ មាត្រា៩០ មាត្រា៩១ មាត្រា៩២ មាត្រា១១០ មាត្រា១២០ និងមាត្រា១២២ នៃច្បាប់ស្តីពីការងារ ធ្វើឡើងក្នុងសម័យប្រជុំពេញ អង្គរដ្ឋសភាលើកទី១០ នីតិកាលទី៥ ក្រោមអធិតីភាពសម្តេច ហេង សំ រិន ប្រធានរដ្ឋសភា ដោយសមាជិករដ្ឋសភាចំនួន១០៧នាក់ បានលើកដៃអនុម័តក្នុងចំណោមសមាជិកចូលរួម ទាំងអស់១០៧រូប។ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ តំណាងរាជរដ្ឋាភិបាល បានលើកឡើងក្នុងសម័យប្រជុំការវិសោធនកម្មច្បាប់ការងារនេះថា ដើម្បីធានាបាននូវស្ថិរភាព និងសុវត្ថិភាពការងារ រួម ជាមួយនឹងការរក្សាកំណើនសេដ្ឋកិច្ចរបស់ប្រទេសជាតិប្រកបដោយចីរភាព រាជរដ្ឋាភិបាល ដែលមានក្រសួងការងារ និងបណ្តុះបណ្តាលវិជ្ជាជីវៈជាសេនាធិការ បានបង្កើតក្រុមការងារផ្នែកច្បាប់មួយដើម្បីរៀបចំតាក់តែងសេចក្តីព្រាងច្បាប់ស្តីពីវិ សោធនកម្មមាត្រា៨៧ ចំណងជើងចំណុច«គ» ផ្នែកទី៣ នៃជំពូកទី៤ មាត្រា៨៩ មាត្រា៩០ ដល់មាត្រា៩២ មាត្រា១១០ មាត្រា១២០ និងមាត្រា១២២ នៃច្បាប់ស្តីពីការងារដែលត្រូវប្រកាសឲ្យប្រើដោយព្រះរាជក្រមលេខ ជស/រកម/០៣៩៧ /០១ ចុះថ្ងៃទី១៣ មីនា ១៩៩៧ ដោយអនុញ្ញាតឲ្យមានការទូរទាត់ប្រាក់បំណាច់អតីតភាពការងាររបស់កម្មករ និយោជិត ជារៀងរាល់ថ្ងៃ៦ខែម្តង។
លោករដ្ឋមន្ត្រីក៏បានលើកឡើងថា សេចក្តីព្រាងច្បាប់នេះត្រូវបានឆ្លងកិច្ចប្រជុំជាបន្តបន្ទា ប់ច្រើនលើក។ ការៀបចំសេចក្តីវិសោធនកម្មច្បាប់នេះដើម្បីកែសម្រួលបញ្ញត្តិមាត្រា៨៩ ស្តីពីការទូទាត់ប្រាក់ចំណាច់ បណ្តេញចេញ និងមាត្រាពាក់ព័ន្ធ នៃច្បាប់ស្តីពីការងារក្នុងគោលបំណងរក្សាផលប្រយោជន៍ជូនកម្មករនិយោជិត និយោជក និងរាជរដ្ឋាភិបាល។ បើតាមលោករដ្ឋមន្ត្រីបានឲ្យដឹងសេចក្តីវិសោធនកម្មច្បាប់នេះ បានផ្តល់ និងរក្សាផលប្រយោជន៍ ជូនកម្មករ និយោជិត និយោជក និងរាជរដ្ឋាភិបាលដូចជា៖ បង្ការហានិភ័យរបស់កម្មករ និយោជិត ជាពិសេសក្នុងករណី រោងចក្រ សហគ្រាសបិទទ្វារដោយម្ចាស់រត់ចោល ដើម្បីអនុញ្ញាតឲ្យកម្មករនិយោជិតទទូលបានការទូរទាត់ប្រាក់បំណាច់ អតីតភាពការងារ ជារៀងរាល់៦ខែម្តង ផ្អែកតាមអតីតភាពការងារ ដោយមិនមានកំណត់កម្រិតអតិបរមានៃប្រាក់បំណាច់ អតីតភាពការងារ បើទោះបីជាកម្មករនិយោជិតត្រូវបានបញ្ឈប់ ឬលាឈប់ពីការងារ។ សម្រាលបន្ទុក និយោជកក្នុងការ ទូទាត់ប្រាក់បំណាច់អតីតភាពការងារ ចៀសវាងការរក្សាទុកប្រាក់បំណាច់ អតីតភាពការងាររហូតដល់ពេលបញ្ចប់ កិច្ចសន្យា។ លើកកម្ពស់ភាពសុខដុមរមនាក្នុងទំនាក់ទំនងវិជ្ជាជីវៈ ដោយកាត់បន្ថយការតវ៉ាទាមទារការទូទាត់ប្រាក់ បំណាច់ផ្សេងៗក៏ដូចជាការកាត់បន្ថយការចំណាយរបស់រាជរដ្ឋាភិបាលក្នុងការចូលរួមដោះស្រាយជំនួសម្ចាស់រោងចក្រ ស ហគ្រាសក្នុងករណីម្ចាស់រោងចក្រ សហគ្រាសរត់ចោលកម្មករនិយោជិត។
លោក អ៊ិត សំហេង បានបញ្ជាក់ថា« សេចក្តីព្រាងច្បាប់នេះពិតជាមានសារៈសំខាន់ណាស់ សម្រាប់ធានាបានការការពារអត្ថប្រយោជន៍ជូនបងប្អូនកម្មករ និយោជិត ការសម្រាលបន្ទុកនិយោជកក្នុងការទូរទាត់ប្រាក់បំណាច់អតីតភាពការងារ ការចៀសវាងការរក្សាទុកប្រាក់បំណាច់ អតីតភាពរហូតដល់ពេលបញ្ចប់កិច្ចសន្យា និងលើកកម្ពស់ភាពសុខដុមរនាក្នុងទំនាក់ទំនងវិជ្ជាជីវៈ តាមរយៈការកាត់បន្ថយ ការតវ៉ា ទាមទារការទូទាត់ប្រាក់បំណាច់ផ្សេងៗក៏ដូចជាការកាត់បន្ថយការចំណាយរបស់រាជរដ្ឋាភិបាល ក្នុងការចូលរួម ដោះស្រាយជំនួសម្ចាស់រោងចក្រសហគ្រាសក្នុងករណីម្ចាស់រោងចក្ររត់ចោលកម្មករនិយោជិត»។ ក្នុងសម័យប្រជុំពេញអង្គសភានោះដែរលោករដ្ឋមន្ត្រីក៏បានលើកឡើងថា ស្ថិតក្នុងបរិបទ នៃការអភិវឌ្ឍសេដ្ឋកិច្ចដ៏ឆាប់រហ័ស វិស័យការងារបានប្រឈម នឹងបញ្ហាមួយចំនួនដែលរាជរដ្ឋាភិបាលតែងតែបានចូលរួមអន្តរាគមន៍ ដោះស្រាយ រាល់ការលំបាករបស់កម្មករនិយោជិត ជាពិសេសនោះក្នុងករណីរោងចក្រសងគ្រាសបិទទ្វារ ដោយម្ចាស់រត់ចោល។ លោកគូ សបញ្ជាក់ថា« នៅឆ្នាំនេះរាជរដ្ឋាភិបាលបានផ្តល់បុរេប្រទានថវិកាចំនួន៤,៦លានដុល្លា ដើម្បីដោះស្រាយករណីរោងចក្រ ចំនួន៩នៅរាជធានីភ្នំពេញ ខេត្តកណ្តាល និងខេត្តកំពង់ស្ពឺ ដែលបានបិទទ្វារហើយធ្វើឲ្យប៉ះពាល់ដល់កម្មករនិយោជិត ចំនួន៤.១៦៥នាក់។ ការអន្តរាគមន៍នេះ មានគោលបំណងធានាការទទួលបានប្រាក់ឈ្នួលប្រាប់បំណាច់បណ្តេញចេញ និងអត្ថប្រយោជន៍ផ្សេងៗ ដែលបានកំណត់នៅក្នុងច្បាប់ស្តីពីការងារ ជូនបងប្អូនកម្មករនិយោជិតគ្រប់រូប »៕
ចែករំលែកព័តមាននេះ