ខេត្តស្ទឹងត្រែង ៖ ប្រជាពលរដ្ឋនៅខ្សែទឹកខាងក្រោមនៃទំនប់វ៉ារីអគ្គិសនីដនសាហុង ប្រទេសឡាវផ្នែកខាងលើមិនអាចប្រែក្លាយស្ថានការណ៍ឲ្យវិលត្រឡប់ដូចដើមនោះឡើយ គ្រាទំនប់វ៉ារីអគ្គិសនីដនសាហុងដែលមានកម្លាំងថាមពល២៦០មេកាវ៉ាត់ បានដំណើរការអភិវឌ្ឍស្ទើ៩០ភាគរយទៅហើយ ។
ហើយការរំពឹងទុកនៅពេលដ៏ខ្លីខាងមុខទំនប់ដនសាហុងនោះនឹងបញ្ចេញថាមពលឲ្យប្រើប្រាស់ជាផ្លូវការ គ្រានោះ គេនឹងដឹងថា វានឹងអាចជះឥទ្ធិពលផលវិជ្ជមានប៉ុណ្ណា និងប៉ះពាល់ផលអវិជ្ជមានធ្ងន់ធ្ងរយ៉ាងណា ។
ជាប្រភពសក្តានុពលធនធានធម្មជាតិនៅខ្សែទឹកខាងក្រោមទំនប់ដនសាហុងជាទន្លេមេគង្គដែលជាខ្សែទឹកហូរកាត់ប្រទេសចិន ថៃ វៀតណាម ឡាវ និងកម្ពុជា ។ នៅក្រោមទំនប់ដនសាហុងប្រទេសជាព្រំព្រទល់ជាប់ប្រទេសកម្ពុជាដែលបច្ចុប្បន្នមានសក្តានុពលផ្នែកទេសចរណ៍ដូចជា សត្វផ្សោតទឹកសាបទន្លេមេគង្គ ជាប្រទេសសត្វកម្រលើពិភពលោក តំនប់ព្រៃរាំសារ ចម្ងាយ៣៧គីឡូម៉ែត្រគ្របដណ្តប់លើភូមិចំនួន២១ឃុំ ចំនួន៣មួយសង្កាត់ ក្នុងស្រុកថា ឡាបរិវ៉ាត់ និងក្រុងស្ទឹងត្រែងប្រភេទសត្វស្លាប និងពពួកត្រីមេពូជសំខាន់ធំៗដែលរស់នៅតាមអន្លុងជ្រៅ ។
ប្រជាពលរដ្ឋរស់នៅតំនប់នោះ៨០ភាគរយពឹងផ្អែកលើការធ្វើស្រែ១៥ភាគរយពឹងផ្អែកលើការនេសាទ និង១៥ភាគពឹងផ្អែកទៅតំនប់ទេសចរណ៍នេះ បើការឲ្យដឹងពីលោកសួស ច័ន្ទផល ជំទប់ទី២ ឃុំព្រះរំកិល ស្រុកថាឡាបរិវ៉ាត់ ។ លោកបានបញ្ជាក់ថា នៅក្នុងឃុំព្រះរំកិលមានភូមិចំនួន៨ នៅលើដីកោះចំនួន៣ភូមិ និងត្រើយទន្លេចំនួន៥ភូមិ ពួកគាត់បានពឹងផ្អែក និងប្រើប្រាស់ទឹកទន្លេសម្រាប់ទ្រទ្រងការរស់ប្រចាំថ្ងៃដូចជា ការដាំស្លរធ្វើជាអាហារ និងប្រើប្រាស់ផ្សេងតែពួកគាត់ទទួលទានទឹកបរិសុទ្ធជំនួសការបរិភោគទឹកទន្លេវិញ ។
ប្រជាពលរដ្ឋរស់នៅតំនប់នោះបានត្អូញត្អែរអំពីកង្វះទឹកស្អាតសម្រាប់ប្រើប្រាស់ប្រែប្រួលពីបរិស្ថានធម្មជាតិទៅជាល្អក់កង្វះអនាម័យ ។ ពួកគាត់បន្តថា រាប់សិបឆ្នាំកន្លងផុតប្រជាពលរដ្ឋនៅតាមដងទន្លេតែងប្រើប្រាស់ទឹកទន្លេជាប្រចាំជាលក្ខណៈធម្មតា តែខណៈទំនប់ដនសាហុងទើបដំណើរការសាងសង់ពួកគាត់ជួបផលប៉ះពាល់អំពីការប្រើប្រាស់ទឹកទន្លេ ដោយសារជាតិបំផ្ទុះគ្រាប់ក្នុងបាទទន្លេហូរតាមទឹកចុះមកខ្សែទឹកខាងក្រោម ហើយរយៈប៉ុន្មានឆ្នាំមកនេះ ប្រជាពលរដ្ឋហាក់បីដូចជា សម្របខ្លួនទៅនឹងបរិយាកាសនោះដែរ តែមិនទាន់ប្រាកដថា នឹងអាចជះឥទ្ធិពលយ៉ាងណាក្រោមទំនប់ត្រូវបិទឲ្យដំណើរការជាផ្លូវការនោះឡើយ ។
ប្រជានេសាទនៅខ្សែទឹកទន្លេមេគង្គបានត្អូញត្អែដែរ ថាគ្រាផ្តើមនៃការបង្កើតទំនប់វ៉ារីអគ្គិសនីផលចាប់ត្រីមានការធ្លាក់ចុះខ្លាំង ហើយត្រីពុំសូវមានធំធាត់នោះដែរ ដោយសារទឹកប្រែជាល្អក់ខុសពីធម្មជាតិ ។ ប្រជានេសាទដដែលបន្តថា បើកាលពីណាទឹកល្អក់ពពួកត្រីតូចធំវាមិនអាចរស់នៅឡើយ ដូច្នេះមានតែការសម្របខ្លួនទៅតាមធម្មជាតិនោះដែរ ។
លោក ដន បាន់ប្រធានភូមិ និងជាអនុប្រធានសហគមន៍អេកូទេសចរណ៍ឃុំព្រះរំកិលស្រុកថា ឡាបរិវ៉ាត់បានលើកឡើងថា យើងមិនអាចហាមឃាត់គេឲ្យបញ្ឍប់ដំណើរការសាងសង់នោះឡើយ ព្រះជាសិទ្ធិរបស់គេហើយការសាងសងទំនប់ដនសាហុងនោះ គឺនៅលើទឹកដីនៃប្រទេសរបស់គេ ដូច្នេះជម្រើសតែមួយគត់សម្រាប់ប្រជាពលរដ្ឋនៅខ្សែទឹកខាងក្រោម មានតែការសម្របខ្លួនប៉ុណ្ណោះ ។ លោកបញ្ជាក់បន្តថា ការខ្វាយខ្វល់របស់ប្រជាពលរដ្ឋដែលប្រឈមបច្ចុប្បន្ននឹងទៅអនាគត គឺប្រភពទឹកស្អាតសម្រាប់ប្រើប្រាស់ ទន្ទឹមនេះដែរពួកគាត់បានសំណូមពរដល់រដ្ឋាភិបាលក៏ដូចជា អាជ្ញាធរមន្ទីរអង្គភាពពាក់ព័ន្ធមេត្តាជួយរកប្រភពទឹកស្អាត ដើម្បីបបញ្ជៀសពីការប្រើប្រាស់ទឹកល្អក់បង្កជាបញ្ហាដល់សុខភាព ។
ប្រជាពលរដ្ឋនៅតំនប់ខ្សែទឹកខាងក្រោមនៃទំនប់ដនសាហុងបានថ្លែងថា បច្ចុប្បន្នពុំមានប្រជាពលរដ្ឋណាម្នាក់រងគ្រោះ ដោយសារប្រើប្រាស់ទឹកទន្លេនោះនៅឡើយទេ តែវត្តមានសម្បុរទឹកល្អក់កំពុងផ្លាស់ប្តូរការវិវត្តនៃជីវៈចម្រុះពីប្រើសើរទៅជាអន្តរាយ ៕
ចែករំលែកព័តមាននេះ