ទម្លាប់ខ្មែរយើងតាំងពីដើមរៀងមកភាគច្រើនណាស់ដែលគាត់មានជំនឿលើទិសដោយមានផ្នត់គំនិតថា ការរកទទួលទានកាក់កប ឬមិនកបប្រសើរនោះក៏មកពីការរៀបចំអ្វីមួយត្រឹមត្រូវ ឬ មិនត្រូវទៅតាមទិស ។ ដោយហោចទៅសូម្បីតែហោមពិធីដូចជា ពិធីក្រុងពាលី ពិធីបន់ស្រន់អារុក្ខអារក្ស ទេវតា អ្នកតា ពិធីសែនព្រេនជាដើម តែងឃើញចាស់ទុំក្នុងភូមិរៀបចំទីកន្លែងបែរទៅទិសណាដែលគាត់យល់ថា នាំសុខចម្រើន នាំលាភសំណាងដល់កូនចៅ ។
ម្យ៉ាងទៀតការកសាងលំនៅឋាន មុននឹងកសាង ម្ចាស់ផ្ទះតែងទៅរកគ្រូហោរគុណគូរមើលដីភូមិឋានឱ្យជាក់លាក់ជាមុនសិនទើបហ៊ានសាងសង់ជាក្រោយ ដែលភាគច្រើនប្រជាជនខ្មែរយើងច្រើនពេញនិយមសង់លំនៅឋានបែរមុខទៅទិសខាងកើត និងទិសត្បូង ដែលយល់ថា នាំសុខចម្រើន នាំឱ្យរកស៊ីមានបាន នាំលាភ នាំសំណាងចូលផ្ទះ ។
ខាងក្រោមនេះជាទិស៦ដែលលោកអ្នកគួរជ្រើសរើសតាមចិត្តចង់ថាតើទិសមួយណានាំឱ្យសុខចម្រើន នាំហេងហេងចូលផ្ទះ ។
១-ទិសខាងកើត លោកទុកដូចជាមាតាបិតា។
មាតាបិតាដែលលោកប្រៀបទៅនឹងទិសបូព៌ ដោយអធិប្បាយថា មានគុណូបការៈដល់បុត្រធីតាច្រើនជាងមនុស្សដទៃ និងមុនបំផុតជាងគេ ។
២-ទិសខាងត្បូងទុកដូចជាគ្រូបាអាចារ្យ។
គ្រូអាចារ្យដែលលោកប្រៀបនឹងទិសទក្សិណ ដោយអធិប្បាយថា ដូចដៃស្តាំដែលនឹងធ្វើឱ្យសម្រេចប្រយោជន៍នោះៗ។
៣-ទិសខាងលិចទុកដូចជាប្រពន្ធ។
ភរិយាដែលលោកប្រៀបនឹងទិសបស្ចិម ដោយអធិប្បាយថា ជាស្ត្រីដើរ ឬធ្វើតាមក្រោយស្វាមី ។
៤-ទិសខាងជើងទុកដូចជាមិត្តសម្លាញ់។
មិត្តសម្លាញ់ ដែលលោកប្រៀបនឹងទិសឧត្តរដោយអធិប្បាយថា ដូចដៃឆ្វេងដែលសម្រាប់ជួយដៃស្តាំឱ្យសម្រេចប្រយោជន៍នោះៗបាន។
៥-ទិសខាងក្រោមទុកដូចជាទាសកម្មករ។
ទាសកម្មករដែលលោកប្រៀបនឹងទិសខាងក្រោម ដោយអធិប្បាយថា ជាអ្នកទាបថោកជាងចៅហ្វាយនាយ ឬនៅក្រោមបង្គាប់ចៅហ្វាយនាយ។
៦-ទិសខាងលើទុកដូចជាសមណព្រាហ្មណ៍។
សមណព្រាហ្មណ៍ ដែលលោកប្រៀបនឹងទិសខាងលើ ដោយអធិប្បាយថា ជាអ្នកមានគុណធម៌ខ្ពង់ខ្ពស់ជាងគ្រហស្ថ ។
ទស្សនៈខ្ញុំយល់ថា សកម្មភាពសព្វបែបយ៉ាងដែលយើងធ្វើដោយសុចរិត៣យ៉ាងគឺ កាយសុចរិត វចីសុចរិត និងមនោសុចរិត ប្រាកដជានាំសុខសួស្តី នាំលាភសំណាងមហាប្រសើរចូលផ្ទះសម្បែង ។ រឿងការប្រកាន់ទិសនោះគ្រាន់តែជាហេតុផលបន្ទាប់បន្សំប៉ុណ្ណោះ តែយើងក៏មិនអាចបោះបង់ចោលទម្លាប់នេះបានដែរ ។
ចែករំលែកព័តមាននេះ