ខេត្តបាត់ដំបង៖ កម្លាំងនគរបាលផ្នែកបង្ការ បង្ក្រាបនៃស្នងការខេត្តបានបើកកិច្ចប្រតិបត្តិការបង្ក្រាបទីតាំងល្បែងហ្គេមអុីនធឺណិតមួយកន្លែង កាលពីវេលាម៉ោង១និង៤០នាទីរសៀលថ្ងៃទី៧ មិថុនា នៅចំណុចភូមិ២០ ឧសភា សង្កាត់ស្វាយប៉ោ ក្រុងបាត់ដំបង ដែលប្រមូលបានអ្នកលេងជាង២០នាក់សុទ្ធតែជាសិស្ស។
លោកឈឿង គឹមសុង នាយរងការិយាល័យព្រហ្មទណ្ឌកំរិតស្រាល និងជាប្រធានក្រុមអន្តរាគមន៍បង្ការ
បង្ក្រាប បានឲ្យដឹងថា ទីតាំងល្បែងហ្គេមនេះមានម្ចាស់ឈ្មោះឡុង ដែលបានបើកបំរើល្បែងហ្គេមគ្រប់ប្រភេទដែលជ្រកក្រោមស្លាកអាជីវកម្មអុីនធឺណេត ហើយអ្នកចូលលេងល្បែងនេះភាគច្រើនសុទ្ធតែជាសិស្ស ទើបលោកស្នងការខេត្តបញ្ជាឲ្យកម្លាំងរបស់លោកចុះបង្ក្រាបតែម្ដង ក្រោមការដឹកនាំផ្ទាល់ដោយលោកឧត្ដមសេនីយត្រីជេត វណ្ណនី ស្នងការរងខេត្ត។ លោកបានប្រាប់ថា ជាមួយនឹងការបង្ក្រាបនេះ យើងបានដកហូតនូវវត្ថុតាងជាច្រើនដែលពាក់ព័ន្ធនឹងការប្រព្រឹត្តល្បែងហ្គេមតាមអុីនធឺណិតនេះ។
យោងតាមរបាយការណ៍របស់សមត្ថកិច្ចដកហូតវត្ថុតាងរួមមាន ម៉ាស៊ីនកុំព្យូទ័រចំនួន២០គ្រឿង, អេក្រង់កុំព្យូទ័រ ចំនួន២០គ្រឿង, ក្តារចុចកុំព្យូទ័រចំនួន២០គ្រឿង, Mouse កុំព្យូទ័រចំនួន២០គ្រឿង, កាសស្តាប់ចំនួន ២០គ្រឿង, ឧបករណ៍សំរាប់ភ្ជាប់អុីនធឺណេតចំនួន១គ្រឿង, ឧបករណ៍សំរាប់ភ្ជាប់បំបែកអុីនធឺណេតចំនួន១គ្រឿង, ឧបករណ៍ចែកចាយអុីនធឺណេតចំនួន១គ្រឿង និងសម្ភារ:ពាក់ព័ន្ធមួយចំនួនទៀត។
ជុំវិញការបង្ក្រាបខាងលើនេះ បើតាមលោកឧត្តមសេនីយ៍ត្រី ជេត វណ្ណនី ស្នងការរងខេត្ត បានមានប្រសាសន៍ថា លោកស្នងការខេត្តបានបញ្ជាឲ្យបញ្ជូនអ្នកលេងទាំងអស់ រួមទាំងសិស្ស និងវត្ថុតាងផងទៅកាន់ស្នងការខេត្ត ដើម្បីសាកសួរ និងធ្វើកំណត់ហេតុ។ លោកបានបញ្ជាក់ថា នៅមានទីតាំងល្បែងអុីនធឺណិតជាច្រើនទៀតដែលជាគោលដៅត្រូវចុះបង្ក្រាប។
ពាក់ព័ន្ធនឹងចំណាត់ការនេះដែរ លោកជេត វណ្ណនី បានបញ្ជាក់ថា ក្រុមសិស្សដែលវង្វេងសាលាទាំងនោះ នឹងប្រគល់ឲ្យមន្ត្រីជំនាញសួរនាំ ហើយអញ្ជើញអាណាព្យាបាលរបស់ពួកគេឲ្យមកធ្វើកិច្ចសន្យាធានាកូនៗរបស់ខ្លួន ក្រោយពីសមត្ថកិច្ចធ្វើការអប់រំ។ ដោយឡែកម្ចាស់ទីតាំងខាងលើ យើងនឹងរង់ចាំគោលការណ៍លោកស្នងការខេត្តដើម្បីចាត់ការបន្ត។
ជាមួយនឹងការចុះបង្ក្រាបទីតាំងល្បែងហ្គេមខាងលើនេះ ប្រជាពលរដ្ឋនៅក្នុងក្រុងបាត់ដំបង ក៍ដូចជាអាណាព្យាបាលសិស្សមួយចំនួនបានសំណូមពរសូមឲ្យលោកស្នងការខេត្តធ្វើការបង្ក្រាបទីតាំងល្បែងហ្គេមជ្រកក្រោមស្លាកអុីនធឺណិតប៉ុន្មានកន្លែងទៀតដែលដុះស្លែនៅខាងលិចវិទ្យាល័យព្រះមុនីវង្សផងដែរ។
បើតាមការពិនិត្យជាក់ស្ដែង ទីតាំងនេះបានបើកទទូលអតិថិជនចាប់តាំងពីភ្លឺស្រាងៗរហូតដល់យប់ជ្រៅ។ សិស្សដែលធ្លាប់ទៅលែងល្បែងហ្គេមនៅទីតាំងខាងលើបានបង្ហើបឲ្យដឹងថា សិស្សសាលាខ្លះបានចូលលេងហ្គេមតាំងពីមុនម៉ោង៧ព្រឹក ដើម្បីឲ្យបានមុនម៉ោងចូលរៀន ប៉ុន្តែពេលដល់ម៉ោងចេញលេង ពួកគេនាំគ្នាទៅលេងទៀត នៅទីនោះមានតែសិស្សសាលាទេដែលចូលលេង ៕
ចែករំលែកព័តមាននេះ