ខេត្តបាត់ដំបង ៖ ក្នុងសាលប្រជុំទីបញ្ជាការដ្ឋានយោធភូមិភាគទី៥ នៅក្រុង-ខេត្តបាត់ដំបង បានបើកកិច្ចប្រជុំបូកសរុបលទ្ធផលការងារយោធាសន្តិសុខ ខែឧសភា និងផ្សព្វផ្សាយផែនការ ការងារ ខែមិថុនា ឆ្នាំ២០១៨ ក្រោមអធិបតីភាពលោកឧត្តមសេនីយ៍ទោ ឯក សំអូន មេបញ្ជាការស្តីទីយោធភូមិភាគទី៥ លោកឧត្តមសេនីយ៍ឯក ផាន់ សាមន្ថា អគ្គមេបញ្ជាការរង នៃកងយោធពលខេមរភូមិន្ទប្រចាំទិសយោធភូមិភាគទី៥ ដោយមានការចូលរួមពីមេបញ្ជាការរង មេបញ្ជាការតំបន់ប្រតិបត្តការសឹករងខេត្ត មេបញ្ជាការកងការពារព្រំដែន នាយការិយាល័យទាំងអស់ចំណុះយោធភូមិភាគទី៥ ប្រមាណ៦០នាក់ បានចូលរួមវេលាព្រឹកថ្ងៃទី០៧ ខែមិថុនា ឆ្នាំ២០១៨ ។
បន្ទាប់ពីលោកឧត្តមសេនីយ៍ទោឯក សំអូន មេបញ្ជាការស្តីទីយោធភូមិភាគទី៥ បានបើកកម្មវិធីរួច លោកឧត្តមសេនីយ៍ត្រី សារី ហ្សាបឺតនាយរងសេនាធិការយោធភូមិភាគទី៥ បានអានរបាយការណ៍បូកសរុបការងារ ខែឧសភាកន្លងមក ដោយផ្តោតលើការងារ អន្តរជាតិ និងការងារជាតិ បញ្ជាក់អំពីសភាពការណ៍តាមភូមិសាស្ត្រ សន្តិខុសតាមព្រំដែន សន្តិសុខសណ្តាប់ធ្នាប់សង្គមទំនាក់ទំនងកិច្ចសហប្រតិបត្តការ ពង្រឹង ការពារជាតិ អនុវត្តន៍តាមគោលនយោបាយភូមិឃុំមានសុវត្ថិភាព ការងារ ការកសាងពង្រឹងកងកម្លាំងអង្គភាព រឹងមាំលើគ្រប់វិស័យ ជំរុញការងារហ្វឹកហ្វឺន អប់រំចិត្តសាស្ត្រ-នយោបាយ សង្គមសាស្ត្រ ចុះផ្ទាល់ជាមួយអតីតយុទ្ធជនកម្ពុជា ពង្រឹងសម្ព័ន្ធមេត្រីភាព និងការងារជំនាញផ្ទៃក្នុងបណ្តុះជំនាញ និងវាយតម្លៃចំណុចខ្លាំង-ខ្សោយ ដើម្បីបន្តអនុវត្តន៍បន្តរកការរីកចម្រើនបន្តទៅទៀត ។
ក្នុងនោះលោកឧត្តមសេនីយ៍ទោ ឯក សំអូន មេបញ្ជាការស្តីទីបានបញ្ជាក់ថា ក្នុងខែមិថុនានេះ យោធភូមិភាគទី៥ បានត្រៀមការងារសំខាន់ៗចំពោះមុខបន្ថែមទៀត គឺត្រៀមក្បួនព្យុះហយាត្រារបស់កងទ័ពទូទាំងយោធ ភូមិភាគទី៥ ដើម្បីរំលឹកខួបលើកទី៣០ នៃកំណើតរបស់អង្គភាពកង ទ័ពយោធភូមិភាគទី៥ ដោយត្រូវប្រើកម្លាំងកងទ័ពរាប់ពាន់នាក់ មកពីគ្រប់តាមបណ្តាអង្គភាព និងតាមតំបន់សឹករងនៃខេត្តទាំង៤ មានខេត្តបាត់ដំបង ពោធិសាត់ ប៉ៃលិន និងខេត្តបន្ទាយមានជ័យ ហើយនិងការងារដែលត្រូវពង្រឹងជំនួបគ្នារវាងយោធភូមិភាគទី៥ ជាមួយកងទ័ពភូមិភាគទី១ របស់ប្រទេសថៃនៅខេត្តសៀមរាប ។
លោកឧត្តមសេនីយ៍ទោ កែវ ចំរើន មេបញ្ជាការរងយោធភូមិភាគទី៥ បានលើកឡើងថា ក្នុងទិវាកំណើតរបស់យោធភូមិភាគទី៥ លើកទី៣០(ថ្ងៃ២៨ ខែមិថុនា ឆ្នាំ១៩៨៨) ត្រូវធ្វើនៅថ្ងៃទី២៨ ខែមិថុនា ឆ្នាំ២០១៨ខាងមុខនេះ គឺកងកម្លាំងគ្រប់តាមបណ្តាអង្គភាពដែលនៅឆ្ងាយៗត្រូវមកចូលរួមត្រៀមក្បួនហ្វឹកហាត់ជាមុន ដែលមានកន្លែងខ្លះយើងបានរៀបចំទីកន្លែង និងសហការជាមួយមូលដ្ឋាន ហើយសុំការអនុញ្ញាតពីអាជ្ញាធរដែនដីគ្រប់លំដាប់ថ្នាក់ ដើម្បីចៀសវាងការកកស្ទះ និងប៉ះពាល់ដល់សណ្តាប់ធ្នាប់សង្គមតាមផ្លូវថ្នល់ដែលប្រជាពលរដ្ឋកំពុងធ្វើដំណើរជារៀងរាល់ថ្ងៃនេះ ឲ្យបានសមរម្យផងដែរ ៕
ចែករំលែកព័តមាននេះ