រាជធានីភ្នំពេញ៖ បុរសម្នាក់ដែលជាអ្នកបើកបររថយន្តបានជួសជុលម៉ូទ័របូមទឹក ដោយមិនបានដឹងថាម៉ូទ័រនោះឆ្លងចរន្តឡើយ ហើយក៏ត្រូវបានចរន្តអគ្គីសនីឆក់បណ្ដាលឲ្យដួលដេកប្រកាច់ ពេលឃើញបែបនេះបុរសម្នាក់ទៀតដែលជាមិត្តភក្ដិរួមការងារស្មានថាជនរងគ្រោះជើងរមួលក្រពើ បានចូលទៅជួយក៏ត្រូវចរន្តអគ្គីសនីឆក់ដែរ ប៉ុន្តែដកដៃទាន់ទើបគ្រាន់តែរងរបួសស្រាលប៉ុណ្ណោះ ។ បន្ទាប់មក ជាងជួសជុលរថយន្តនៅទីនោះបាននាំគ្នារត់ទៅដកឌុយភ្លើងចេញ រួចបានដឹកបុរសរងគ្រោះតាមរថយន្តទៅកាន់មន្ទីរពេទ្យដើម្បីសង្គ្រោះបន្ទាន់ ប៉ុន្តែដោយសារតែរបួសធ្ងន់ធ្ងរពេកក៏បានស្លាប់ក្រោយពេលដឹកចេញផុតពីកន្លែងកើតហេតុបានចម្ងាយប្រមាណ៣គីឡូម៉ែត្រប៉ុណ្ណោះ។
ហេតុការណ៍ខាងលើនេះបានកើតឡើងកាលពីវេលាម៉ោង៩ព្រឹកថ្ងៃទី៦ ខែមិថុនា ឆ្នាំ២០១៨ នៅក្នុងយានដ្ឋានជួសជុលរថយន្តមួយកន្លែង មានទីតាំងស្ថិតនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
តាមសាច់ញាតិបុរសរងគ្រោះខាងលើនេះបានឲ្យដឹងថា ជនរងគ្រោះដែលស្លាប់ឈ្មោះ អ៊ុង សុខឿន អាយុ៣៥ឆ្នាំ មុខរបរជាអ្នកបើកបររថយន្ត មានទីលំនៅអចិន្ត្រៃយ៍នៅក្នុងភូមិព្រែកប្រស់ ឃុំទឹកថ្លា ស្រុកព្រៃនប់ ខេត្តព្រះសីហនុ ហើយសព្វថ្ងៃស្នាក់កន្លែងកើតហេតុខាងលើ ។ ចំណែកបុរសម្នាក់ទៀតជាមិត្តរួមការងារដែលចូលទៅជួយជនរងគ្រោះនោះមិនត្រូវបានស្គាល់ឈ្មោះឡើយ និងបានរងរបួសស្រាលប៉ុណ្ណោះ។
ប្រភពខាងលើបានបន្តទៀតថា នៅមុនពេលកើតហេតុ បុរសរងគ្រោះបានដោតឌុយភ្លើងម៉ូទ័រដើម្បីបូមទឹកបាញ់លាងរថយន្ត ប៉ុន្តែដោយសារតែម៉ូទ័រនោះរអាក់រអួលចេញទឹកតិចពេក ទើបជនរងគ្រោះធ្វើការជួសជុល ហើយពេលនោះមិនបានដកឌុយចេញពីព្រី ឬបិទកុងតាក់ជាមុនសិននោះឡើយ មិនតែប៉ុណ្ណោះក៏មិនបានដឹងថាម៉ូទ័រនោះឆ្លងចរន្តដែរ ហើយខណៈដែលគាត់យកដៃទៅកាន់ម៉ូទ័រនោះក៏ស្រាប់តែត្រូវចរន្តអគ្គីសនីឆក់ បណ្ដាលឲ្យដួលដេកប្រកាច់ ។ ចំណែកបុរសម្នាក់ទៀតដែលជាអ្នករួមការងារ ពេលឃើញបែបនេះ ស្មានថាជនរងគ្រោះជើងរមួលក្រពើក៏បានចូលទៅជួយសម្រួលសរសៃ ហើយក៏ត្រូវចរន្តអគ្គីសនីឆក់ដែរប៉ុន្តែរងរបួសស្រាល។ បន្ទាប់មកមិត្តភក្ដិរួមការងារបានរត់ទៅដកឌុយចេញដើម្បីផ្ដាច់ចរន្តអគ្គិសនី រួចបានដឹកយកបុរសរងគ្រោះទៅកាន់មន្ទីរពេទ្យដើម្បីសង្គ្រោះ ប៉ុន្តែជាអកុសលពេលដឹកចេញបានចម្ងាយប្រមាណ៣គីឡូម៉ែត្រ មិនទាន់ដល់មន្ទីរពេទ្យផង គាត់ក៏បានស្លាប់បាត់ទៅហើយ៕
ចែករំលែកព័តមាននេះ