រាជធានីភ្នំពេញ ៖ ប្ដី-ប្រពន្ធពេលកំពុងជិះម៉ូតូ១គ្រឿងដឹកគ្នាទៅធ្វើការនៅរោងចក្រ ក៏ជ្រុលទៅបុកខឿនផ្លូវ បណ្ដាលឱ្យដួលស្របពេលនោះ ក៏មានរថយន្តធុនធំ១គ្រឿងដឹកទ្រុងមាន់ បើករ៉ឺយែថយក្រោយទៅកិនថែម បណ្ដាលឱ្យរងរបួសធ្ងន់តែម្ដង ។ ហើយភ្លាមៗ ជនរងគ្រោះត្រូវបានគេបញ្ជូនទៅកាន់មន្ទីរពេទ្យរុស្ស៊ីដើម្បីសង្គ្រោះ រីឯម៉ូតូបានស្ថិតនៅក្រោមរថយន្តរងការខូចខាតយ៉ាងដំណំ ។
ហេតុការណ៍រន្ធត់នេះ បានកើតឡើងកាលពីវេលាម៉ោង៧ព្រឹកថ្ងៃទី៧ មិថុនា ស្ថិតនៅលើកំណាត់ផ្លូវ៥០ម៉ែត្រ ក្នុងភូមិអន្លូងគងថ្មី សង្កាត់ព្រៃស ខណ្ឌដង្កោ ។
តាមប្រភពឱ្យដឹងថា ជនរងគ្រោះទាំង២នាក់ប្ដីប្រពន្ធនោះ មិនទាន់ត្រូវបានស្គាល់ឈ្មោះទេ ។ ពួកគាត់ជិះម៉ូតូ១គ្រឿងម៉ាកយ៉ាម៉ាហា ស៊ីរូស ពណ៌ខ្មៅ លាយក្រហមពាក់ស្លាកលេខភ្នំពេញ 1BC-1967។ ចំណែករថយន្តម៉ាកហ៊ីណូពណ៌.ស ពាក់ស្លាកលេខកំពត 3A-0729 បើករបរដោយបុរសមិនស្គាល់ឈ្មោះម្នាក់ហើយរថយន្តនេះមានដឹកទ្រុងមាន់ផងដែរ។
ប្រភពដដែលបន្តថា នៅមុនពេលកើតហេតុ ប្ដីប្រពន្ធជនរងគ្រោះបានជិះម៉ូតូ១គ្រឿងឌុបគ្នាក្នុងទិសដៅពីជើងទៅត្បូង ។ ក្នុងបំណងទៅធ្វើការរោងចក្រ លុះពេលទៅដល់ត្រង់ចំណុចកើតហេតុបានជ្រុលទៅបុកខឿនផ្លូវបណ្ដាលឲ្យដួល ស្របពេលនោះរថយន្តម៉ាកហ៊ីណូបានបើករ៉ឺយែថយក្រោយជ្រុលទៅកិនទើបបណ្ដាលឲ្យរងរបួសធ្ងន់ទាំង២នាក់ចំណែកម៉ូតូរងការខូចខាតយ៉ាងដំណំ។
ចែករំលែកព័តមាននេះ