ទន្ទឹមនឹងការខិតជិតមកដល់នៃការប្រកួត World Cup ក្រុមទាំង៣២ប្រទេសក៏បានត្រៀមលក្ខណៈរួចរាល់ហើយផងដែរ ដើម្បីចូលសមរភូមិប្រយុទ្ធ ។ ដោយមានការលើកឡើងផ្សេងៗគ្នាចំពោះលទ្ធភាពក្រុមទាំង៣២ដែលថាក្រុមណាមួយអាចមានឱកាសឡើងទៅវគ្គបន្តច្រើនជាងក្រុមណា ថ្ងៃនេះក្រុមការងារកីឡានៃសារព័ត៌មានកោះសន្តិភាពសូមលើកយកក្រុមនៅក្នុងពូល E មកវិភាគបន្ត ដែលក្នុងនោះមានដូចជាប្រេស៊ីល (អាមេរិកខាងត្បូង), ស្វ៊ីស និងស៊ែប៊ី(អឺរ៉ុប)
និងកូស្តារីកា(អាមេរិកខាងជើង) ។
១-ប្រេស៊ីល
ប្រេស៊ីលគឺជាប្រទេសមួយដែលគ្រប់គ្នាបានស្គាល់ និងដឹងពីសមត្ថភាពដ៏ខ្លាំងក្លារបស់ពួកគេ ជាពិសេសក្រុមដែលមានរហស្សនាមថា «សាំបា»”មួយនេះ ក៏គ្រងតំណែងជើងឯក World Cup បានច្រើនជាងគេផងដែររហូតដល់៥សម័យកាលក្នុងចំណោមវត្តមានវគ្គផ្តាច់ព្រ័ត្រ៧លើក ខណៈអាល្លឺម៉ង់ជាក្រុមតាមពីក្រោយកាន់ពានបាន៤ដង ។ បើនិយាយពីការប្រឡូកក្នុងព្រឹត្តិការណ៍នេះវិញ ប្រេស៊ីលបានចូលរួមតាំងពីបង្កើត World Cup ដំបូងមកម៉្លេះ និងបន្តរហូតមកទល់ពេលនេះដោយពុំដែលខកខានសូម្បីតែ១រដូវកាល ។ សករាជថ្មីនេះ ពួកគេបានបង្ហាញខ្លួនជាមួយកម្លាំងប្រយុទ្ធដ៏អស្ចារ្យក្រោមការដឹកនាំរបស់គ្រូបង្វឹកថ្មី ព្រមទាំងកីឡាករក្មេងៗជាច្រើនរូប ដែលពោរពេញទៅដោយសមត្ថភាពខ្ពស់ ។ ចំពោះលទ្ធផលប្រកួតវគ្គជម្រុះកន្លងមក ប្រេស៊ីលមិនទាន់ចាញ់ម្តងឡើយ ពោលគឺឈ្នះ៣ និងស្មើ២ ។
២-ស្វ៊ីស
ក្រុមមកពីទ្វីបអឺរ៉ុបមួយនេះ ក៏មិនធម្មតាប៉ុន្មានដែរ ។ បើទោះជានេះជាការបង្ហាញខ្លួនលើកទី១១នៅ World Cup ប៉ុន្តែ៣រដូវកាលចុងក្រោយកន្លងមក ស្វ៊ីសពុំដែលខកខានម្តងឡើយចាប់តាំងពីឆ្នាំ២០០៦ រៀងមក ។ យ៉ាងណាមិញ ភាគច្រើនពួកគេឆ្លងមិនផុតវគ្គ១៦ក្រុមនោះទេ ខណៈកំណត់ត្រាល្អបំផុតវិញគឺធ្លាប់បានឡើងដល់វគ្គ៨ក្រុមចុងក្រោយ៣លើកកាលពីឆ្នាំ១៩៣៤, ១៩៣៨ និង១៩៥៤ ។ ជាមួយនឹងការបង្ហាញខ្លួនលើកនេះ ស្វ៊ីសបាននាំមកជាមួយនូវកីឡាករឆ្នើមច្រើនរូបដែលសុទ្ធតែមានបទពិសោធន៍ប្រកួតក្នុងព្រឹត្តិការណ៍ធំដូចជា Xherdan Shaqiri (Southampton), Xhaka (Arsenal) និង Lichtsteiner (Juventus) ជាដើម។ ៥ប្រកួតចុងក្រោយកាលពីវគ្គជម្រុះបឋម ស្វ៊ីសចាញ់តែម្តងប៉ុណ្ណោះ និងឈ្នះ៣ ស្មើ១ ។
៣-កូស្តារីកា
វិស័យបាល់ទាត់របស់កូស្តារីកានៅអាមេរិកខាងជើងមិនសូវជាលេចធ្លោប៉ុន្មានឡើយបើធៀបនឹងប្រទេសដទៃក្នុងតំបន់នោះ ។ បើនិយាយពីការប្រឡូកនៅ World Cup វិញកូស្តារីកាបានចូលរួមដំបូងកាលពីឆ្នាំ១៩៩០ ហើយពេលនេះគឺជាការបង្ហាញខ្លួនលើកទី៥ ប៉ុន្តែទម្រង់លេងពួកគេហាក់រីកចម្រើនច្រើនជាងរដូវកាលមុនៗ ។ វត្តមានចុងក្រោយនៅរដូវកាលមុនពួកគេមានវាសនាឡើងដល់វគ្គ៨ក្រុម ហើយក៏ជាកំណត់ត្រាល្អបំផុតក្នុងប្រវត្តិសាស្ត្រផងដែរ ។ ទោះបីយ៉ាងណា លទ្ធផល៥ប្រកួតចុងក្រោយវគ្គជម្រុះ World Cup ពួកគេធ្វើបានយ៉ាងល្អ ដោយឈ្នះ២ ស្មើ២ និងចាញ់១ ។
៤-ស៊ែប៊ី
ស៊ែប៊ីដែលជាក្រុមជម្រើសជាតិមកពីទ្វីបអឺរ៉ុប ក៏មានសមត្ថភាពមិនខុសពីកូស្តារីកាដែរ ។ ម្យ៉ាងទៀត ពួកគេហាក់មិនចុះសម្រុងគ្នារវាងគ្រូបង្វឹក និងកីឡាករផងដែរ ក្រោយមានកៅអីលេង World Cup រហូតធ្វើឱ្យសហព័ន្ធកីឡាជាតិសម្រេចដកតំណែងលោក Slavoljub Muslin ចេញពីតំណែងគ្រូបង្វឹក ដោយមានការរិះគន់យ៉ាងខ្លាំងទៅលើការជ្រើសរើសកូនក្រុម និងកម្សោយនៃការដឹកនាំ ។
យ៉ាងណាមិញ បទពិសោធន៍ក្នុងព្រឹត្តិការណ៍នេះ ក៏ស៊ែប៊ីមានមិនធម្មតាដែរ ពោលគឺចូលរួមតាំងពីបង្កើតដំបូងនៅឆ្នាំ១៩៣០មកម៉្លេះ ។ សម្រាប់រដូវកាលនេះជាការបង្ហាញខ្លួនលើកទី១២ ហើយពួកគេធ្វើបានល្អបំផុត២លើកបន្ទាប់ពីឡើងដល់វគ្គពាក់កណ្តាលផ្តាច់ព្រ័ត្រឆ្នាំ១៩៣០ និង១៩៦២ ខណៈវត្តមានចុងក្រោយឆ្នាំ២០១០ ពួកគេមិនបានឆ្លងផុតវគ្គចែកពូលនោះទេ ។ លទ្ធផលក្នុងវគ្គជម្រុះ៥ប្រកួតចុងក្រោយ ក៏ស៊ែប៊ីទទួលបានមិនខុសពីក្រុមទាំងពីរខាងលើប៉ុន្មានដែរ គឺចាញ់ម្តងដូចគ្នា និងឈ្នះ៣ ស្មើ១ ។
វិភាគ ៖ នៅក្នុងពូលនេះ វាមិនមានអ្វីចម្លែក ហើយក៏គ្មានអ្វីគួរឱ្យភ្ញាក់ផ្អើលដែរ ដែលយើងនឹងឃើញប្រេស៊ីលកក់កៅអីកំពូលតារាង ដ្បិតក្រុមផ្សេងៗទៀតមិនមែនជាឧបសគ្គធំសម្រាប់ក្រុមសាំប៉ានោះទេ ។ ទន្ទឹមនឹងនេះ យើងអាចនិយាយបានថា ប្រេស៊ីលនឹងគ្រងតំណែងម្ចាស់ពានរង្វាន់នេះជាថ្មីម្តងទៀត ព្រោះបច្ចុប្បន្នសមត្ថភាពកូនក្រុមទាំងមូលសុទ្ធតែខ្លាំង ។
ចំណែកឯតំណែងលេខ២ ដែលជាកៅអីពិបាកឈោងចាប់សម្រាប់ក្រុមទាំងបីផ្សេងទៀតនោះ អាចនឹងធ្លាក់ទៅលើក្រុមស្វ៊ីស ។ មិនថាប្រវត្តិប្រឡូកនៅ World Cup ក៏ដូចជាបទពិសោធន៍ប្រកួតក្នុងព្រឹត្តិការណ៍ធំៗ និងកម្រិតលេងរបស់កីឡាករ ស្វ៊ីសមានភាគរយខ្ពស់ជាងគេដែលអាចឡើងទៅវគ្គ១៦ក្រុម ។ យ៉ាងណាមិញ កូស្តារីកា និងស៊ែប៊ីក៏មិនប្រាកដថាធ្វើឱ្យក្រុមទាំងពីរខាងលើអាចសម្រេចក្តីប្រាថ្នាដោយស្រួលៗនោះឡើយ ។
តើប្រិយមិត្តមានយោបល់ដូចអ្វីដែលក្រុមការងារយើងបានវិភាគខាងលើនេះដែរឬយ៉ាងណា? តើក្នុងពូលនេះ ក្រុមណាមួយជាក្រុមសំណព្វចិត្តរបស់ប្រិយមិត្ត? ៕
ចែករំលែកព័តមាននេះ