រាជធានីភ្នំពេញ ៖ រោងបុណ្យខួបគំរប់៧ថ្ងៃមួយល្វែង សង់នៅលើផ្លូវទំនប់បឹងទំពុន (ផ្លូវលេខ៣៧១) ត្រូវរថយន្តកុងតឺន័រមួយគ្រឿង ដែលអ្នកបើកបរងងុយដេក គួបផ្សំនិងផ្លូវរាងកោងបន្តិច ហើយចាំងភ្នែកនិងហ្វារថយន្តពីខាងមុខ ធ្វើឱ្យអ្នកបើកជ្រុលចង្កូតបុកចូលក្នុងរោងបុណ្យ បណ្តាលឱ្យបាក់អស់ តែសំណាងល្អមិនបង្កឱ្យអ្នកណាម្នាក់រងរបួសឡើយ ។ ហេតុការណ៍នេះបានកើតឡើងកាលពីវេលាម៉ោង១ និង១៥នាទីរំលងអធ្រាត្រឈានចូលថ្ងៃទី៦ មិថុនា នៅចំណុចផ្ទះលេខ៤០៤ ផ្លូវ៣៧១ ផ្ទះលក់ស៊ីទែនទឹក យីហោ ហ្វុក ហេង ស្ថិតនៅសង្កាត់បឹងទំពុន២ ខណ្ឌមានជ័យ ។
ប្រភពព័ត៌មានពីកន្លែងកើតហេតុបានប្រាប់ឱ្យដឹងថា រោងបុណ្យគំរប់៧ថ្ងៃ បានសាងសង់នៅតាមដងផ្លូវ៣៧១ ដែលម្ចាស់បុណ្យធ្វើឡើង ដើម្បីឧទ្ទិសកុសលជូនដល់ភរិយារបស់គាត់ដែលបានស្លាប់ទៅថ្មីៗ ។ រោងបុណ្យនេះ សាងសង់តាំងពីព្រឹកថ្ងៃទី៥ មិថុនា ហើយនៅវេលាល្ងាច ទើបមានកម្មវីធីទទួលភ្ញៀវញាតិមិត្តជិតឆ្ងាយដែលបានមកចូលរួមរំលែកទុក្ខ និងមានកម្មវិធីសូត្រមន្តតាមប្រពៃណីចប់សព្វគ្រប់ហើយ ។
ចំណែកក្រុមចុងភៅ ក៏បានរើនិងសារទុករបស់របរនៅក្នុងរោងរួចរាល់ ហើយក្រុមចុងភៅក៏បានសម្រាកនៅមុខផ្ទះក្បែររោងនោះដែរ ។ ម្ចាស់ដើមបុណ្យបានបើកភ្លើងបំភ្លឺ នៅមុខរោង និងមានដាក់ធុងសាំង នៅចម្ងាយពីមុខរោងជាង២០ម៉ែត្រផងដែរ ដើម្បីជាសញ្ញាសម្គាល់ព្រោះរោងសង់តែមួយចំហៀងផ្លូវ ។ លុះមកដល់ម៉ោងកើតហេតុ ស្រាប់តែរថយន្តកុងតឺន័រធុនធំមួយគ្រឿងបោលទាំងកំរោលចូលទៅដល់ក្នុងរោងដើម្បីចូលរួមរំលែកទុក្ខទៅវិញ ។
ប្រភពពីអ្នកបើករថយន្តមានឈ្មោះ សែន វិរះបុត្រ ភេទប្រុស អាយុ២៥ឆ្នាំ មុខរបរបើកបររថយន្តស្នាក់នៅភូមិកៀនស្វាយ ឃុំបន្ទាយដែក ស្រុកកៀនស្វាយ ខេត្តកណ្ដាល ដែលត្រូវឃាត់ខ្លួនបានប្រាប់ឱ្យដឹងថា មុនកើតហេតុ រូបគាត់បានបើករថយន្តប្រភេទដឹកកុងតឺន័រ ពណ៌ក្រហម ពាក់ផ្លាកលេខភ្នំពេញ៣D-៩៣៣២ ដែលក្នុងទូកុងតឺន័រដឹកស្រូវសាឡី មកពីកំពង់ផែស្វយ័តភ្នំពេញ ក្នុងគោលបំណងយកទៅ ឱ្យក្រុមហ៊ុន ផលិត ស្រាបៀរនៅសង្កាត់ជើងឯក ខណ្ឌដង្កោ ។ ពេលធ្វើដំណើរមកដល់កន្លែងកើតហេតុ ជាចំណុចផ្លូវកោង ហើយមានរថយន្តផ្សេងទៀត ធ្វើដំណើរមកបញ្ច្រាសទិសគ្នាទៀត ចាំងភ្នែកនឹងភ្លើងហ្វារថយន្តផង ណាមួយងងុយដេកផង មើលមិនច្បាស់ ក៏វ៉ាក់ជាមួយរោងបុណ្យ ។ ភ្លាមៗ រូបគេប្រឹងជាន់ហ្វ្រាំង តែមិនជាប់ទើបជ្រុលបុកចូលក្នុងរោងបុណ្យ បណ្តាលឱ្យបាក់រោងតែម្តង ។ ការបុកនេះបានធ្វើឱ្យខូចខាតរោងបុណ្យ និងរបស់របរនៅក្នុងរោង ។
ក្រោយពេលកើតហេតុ ម្ចាស់រថយន្ត និងខាងក្រុមចុងភៅ ព្រមទាំងម្ចាស់ផ្តើមបុណ្យបានចរចាគ្នា ដោយខាងរថយន្តបានទូរស័ព្ទ ហៅតំណាងខ្លួនមកដោះស្រាយជាមួយម្ចាស់ផ្តើមបុណ្យ និងក្រុមចុងភៅដើម្បីសងសំណងទៅតាមទំហំនៃការខូចខាត ៕
ចែករំលែកព័តមាននេះ