មេហ្វេសប៊ុកសារភាពខ្ទេចថា ឱ្យក្រុមហ៊ុនទូរស័ព្ទធំៗទាំងនេះទាញយកទិន្នន័យអ្នកប្រើ
យោងតាមសារព័ត៌មាន New York Times បានឲ្យដឹងថា ហ្វេសប៊ុកបានព្រមព្រៀងជាមួយក្រុមហ៊ុនផលិតឧបករណ៍ចំនួន៦០ រួមមាន Apple, Microsoft, Samsung…
យោងតាមសារព័ត៌មាន New York Times បានឲ្យដឹងថា ហ្វេសប៊ុកបានព្រមព្រៀងជាមួយក្រុមហ៊ុនផលិតឧបករណ៍ចំនួន៦០ រួមមាន Apple, Microsoft, Samsung និង BlackBerry ដោយអនុញ្ញាតឲ្យក្រុមហ៊ុនទាំងនេះអាចទាញយកទិន្នន័យពីអ្នកប្រើប្រាស់ ។
តាមសេចក្តីរាយការណ៍កាលពីថ្ងៃអាទិត្យ ក្រុមហ៊ុនផ្សេងទៀតអាចទាញយកទិន្នន័យជាច្រើន ដោយមិនចាំបាច់ទទួលការអនុញ្ញាតពីអ្នកប្រើប្រាស់ឡើយ ។ បន្ទាប់ពីមានរឿងអាស្រូវទាក់ទងនឹងក្រុមហ៊ុនគ្រប់គ្រងផ្នែកបច្ចេកវិទ្យា Cambridge Analytica ហ្វេសប៊ុកហាក់ដូចជាជួបប្រទះនឹងឧបសគ្គកាន់តែច្រើនឡើងក្នុងការដោះស្រាយបញ្ហានេះ ។
គួរបញ្ជាក់ថា ហ្វេសប៊ុកបានទទួលរងការរិះគន់យ៉ាងខ្លាំងកាលពីខែមីនា ក្រោយគេប្រទះឃើញថា ក្រុមហ៊ុន Cambridge Analytica បានប្រើប្រាស់ទិន្នន័យរបស់អ្នកប្រើប្រាស់ហ្វេសប៊ុកដោយខុសច្បាប់ ក្នុងអំឡុងពេលមុនការបោះឆ្នោតជ្រើសរើសប្រធានាធិបតីអាមេរិក កាលពីឆ្នាំ២០១៦ ។ តាំងពីពេលនោះមក ស្ថាបនិកហ្វេសប៊ុក លោក Mark Zuckerberg បានឆ្លើយតបសំណួរទាក់ទងនឹងការគ្រប់គ្រងទិន្នន័យរបស់អ្នកប្រើប្រាស់ហ្វេសប៊ុក នៅមុខរដ្ឋសភាអាមេរិក និងសភាអឺរ៉ុប ។
លោក Ime Archibong អនុប្រធានផ្នែកដៃគូផលិតផលរបស់ហ្វេសប៊ុកបាននិយាយថា ការព្រមព្រៀងគ្នានេះ គឺជារឿងចាំបាច់ ។
យោងតាមហ្វេសប៊ុកឲ្យដឹងថា ដៃគូនានាបានចុះកិច្ចព្រមព្រៀងមួយហាមឃាត់ការប្រើប្រាស់ទិន្នន័យផ្សេងៗរបស់អ្នកប្រើប្រាស់ក្នុងមូលហេតុអ្វីផ្សេង ។ ហ្វេសប៊ុកនិយាយថា ខ្លួនមិនបានដឹងពីការប្រើប្រាស់ទិន្នន័យខុសឆ្គងណាមួយ ដែលបានចែករំលែកដោយប្រើកិច្ចព្រមព្រៀងទាំងនេះទេ ៕
ចែករំលែកព័តមាននេះ