រាជធានីភ្នំពេញ ៖ ជនជាតិចិនមួយក្រុមស្រវឹងស្រាធ្លាក់ភ្លែក បើករថយន្តរេពេញផ្លូវទៅបុករថយន្តពីរគ្រឿងដែលឈប់ចតចោលនៅលើចិញ្ចើមផ្លូវ បណ្តាលរងការខូចខាតទាំង២គ្រឿង ហេតុការណ៍នេះកើតឡើងកាលពីវេលាម៉ោង១១និង៣០នាទីយប់ថ្ងៃទី០៦ ខែមិថុនា ឆ្នាំ២០១៨ តាមបណ្តោយផ្លូវ៥៩០ ស្ថិតក្នុងសង្កាត់បឹងកក់ទី២…
រាជធានីភ្នំពេញ ៖ ជនជាតិចិនមួយក្រុមស្រវឹងស្រាធ្លាក់ភ្លែក បើករថយន្តរេពេញផ្លូវទៅបុករថយន្តពីរគ្រឿងដែលឈប់ចតចោលនៅលើចិញ្ចើមផ្លូវ បណ្តាលរងការខូចខាតទាំង២គ្រឿង ហេតុការណ៍នេះកើតឡើងកាលពីវេលាម៉ោង១១និង៣០នាទីយប់ថ្ងៃទី០៦ ខែមិថុនា ឆ្នាំ២០១៨ តាមបណ្តោយផ្លូវ៥៩០ ស្ថិតក្នុងសង្កាត់បឹងកក់ទី២ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញជនជាតិចិនប្រុសស្រីមួយក្រុម មានគ្នាប្រាំទៅប្រាំមួយនាក់ បើកបរថយន្ដមួយគ្រឿង ML500 ពណ៌ស ពាក់ស្លាកលេខភ្នំពេញ 2AA-2182 បើកបរក្នុងស្ថានភាពស្រវឹងជោគជាំ តាមបណ្ដោយផ្លូវលេខ៥៩០ ទិសដៅពីកើតទៅលិចក្នុងល្បឿនយ៉ាងលឿន ហើយជិះរេពេញផ្លូវ លុះមកដល់ចំណុចកើតហេតុរថយន្ដបង្កខាងលើក៏បានរេចង្កូតទៅខាងឆ្វេងទៅបុករថយន្តមួយគ្រឿងទៀត ពណ៌ខៀវ ពាក់ស្លាកលេខភ្នំពេញ 2F-0314 ជាប្រភេទពីរបាំង ឈប់ចតចោលនៅលើចិញ្ចើមផ្លូវ បណ្ដាលឲ្យក្រពឹតខាងក្រោយចំហៀងខាងស្ដាំ ។ ភ្លាមៗនោះរថយន្ដបង្កបានប្រឹងបួងចង្កូតទៅខាងស្តាំទៅបុករថយន្តមួយគ្រឿងទៀតម៉ាកអូឌីមិនចាំស្លាកលេខ ឈប់ចតចោលនៅចិញ្ចើមផ្លូវបណ្ដាលឲ្យរងការខូចខាត ចំណែកឯរថយន្ដបង្ករងការខូចខាតក្រពឹតផ្នែកទាំងសងខាងនៃរថយន្ត ។
ប្រភពដដែលបន្តថា បន្ទាប់មកម្ចាស់រថយន្តអូឌីបានចេញមកពីក្នុងហាងពិភពសាច់អាំង១ ធ្វើការដោះស្រាយជាមួយ និងភាគីខាងរថយន្ដបង្កដោយភាគីខាងរថយន្តបង្កបានចេញសំណងចំនួន៥០០ដុល្លារ ឲ្យទៅខាងរថយន្តអូឌី ដើម្បីបញ្ចប់រឿង ហើយរថយន្តអូឌីក៏បានបើកចេញទៅបាត់ ។ ដោយឡែករថយន្ដរងគ្រោះមួយគ្រឿងទៀតបានទាមទារសំណងចំនួន៣០០ដុល្លារពីខាងរថយន្ដបង្កដើម្បីបញ្ចប់រឿង តែភាគីខាងរថយន្ដបង្កមិនព្រមសងនោះទេ ហើយថែមទាំងនាំគ្នាគេចខ្លួនចេញពីកន្លែងកើតហេតុបាត់ស្រមោល បន្សល់ទុកតែបុរសជាជនជាតិចិនម្នាក់ ស្រវឹងដេកក្អួតនៅក្នុងរថយន្តបង្កដោយមិនខ្វល់ពីអ្វីទាំងអស់ ។
ក្រោយពេលកើតហេតុសមត្ថកិច្ចមូលដ្ឋានក៏ដូចជា សមត្ថកិច្ចជំនាញខណ្ឌទួលគោកបានចុះមកដល់ចំណុចកើតហេតុពេលនោះក៏ស្រាប់តែមានបុរសម្នាក់ដែលជាម្ចាស់ហាងពិភពសាច់អាំង១មិនដឹងថា ត្រូវជាអ្វីនិងម្ចាស់រថយន្តបង្កខាងលើនោះទេ គឺបានចេញមុខមកធ្វើការសម្របសម្រួលជាមួយម្ចាស់រថយន្តរងគ្រោះដែលជាភ្ញៀវ ដោយសុំសងសំណងចំនួន២០០ដុល្លារ ដើម្បីបញ្ចប់រឿងនៅនឹងកន្លែងកើតហេតុ ៕
ចែករំលែកព័តមាននេះ