ខេត្តបន្ទាយមានជ័យ ៖ ក្រោយការចាប់ផ្សឹកភ្លាមៗ ចៅអធិការវត្តភ្នំបាក់លើដ៏កក្រើក កាលពីថ្ងៃ៦ មិថុនា ក្រោយពីមានការបង្ហោះតាមហ្វេសប៊ុក និងមានការនាំខ្លួនក្រោយពេលតឺនុយស៊ីវិល នាំទៅស្នងការដ្ឋាននគរបាលខេត្តនោះ លោក ស្រិល វណ្ណា ត្រូវបានអនុញ្ញាតឱ្យត្រឡប់ទៅផ្ទះវិញ នៅវេលាម៉ោង៣រសៀលថ្ងៃទី៥ មិថុនា នៅភូមិដីឡូត៍ សង្កាត់ទឹកថ្លា ក្រុងសិរីសោភ័ណ ។
មន្ត្រីនគរបាលខេត្តម្នាក់បានប្រាប់ថា ការពិតអតីតចៅអធិការវត្តភ្នំបាក់លើ និងជាអនុគណក្រុងសិរីសោភ័ណឈ្មោះ ស្រិល វណ្ណា ហៅអៀម វណ្ណា ដែលកម្លាំងនគរបាលខេត្តនាំមកស្នងការដ្ឋាន មិនមែនឃាត់ខ្លួននោះទេ គឺដឹកគាត់រំដោះខ្លួនការពារសុវត្ថិភាព ខ្លាចមានហិង្សាណាមួយកើតឡើង ពីប្រជាពលរដ្ឋដែលនាំគ្នាទៅចោមរោមនៅបរិវេណព្រះវិហារ ។ ពេលនេះ ឈ្មោះ ស្រិល វណ្ណា ហៅអៀម វណ្ណា ត្រូវបានប្រគល់ជូនមន្ទីរធម្មការ និងសាសនា ឱ្យត្រឡប់ទៅផ្ទះគាត់វិញហើយ ដើម្បីទៅពិនិត្យសម្ភារក្នុងកុដិវត្តភ្នំបាក់លើ ។
លោក យិម យឿន ប្រធានមន្ទីរធម្មការ និងសាសនាខេត្ត បានប្រាប់ឱ្យដឹងនៅល្ងាចថ្ងៃដដែលនោះថា អតីតចៅអធិការវត្តភ្នំបាក់លើ ឈ្មោះ ស្រិល វណ្ណា ហៅអៀម វណ្ណា ដែលមានអាយុ៣៨ឆ្នាំ បន្ទាប់ពីរងការចោទប្រកាន់ពីនារីឈ្មោះ កាយ លីតា អាយុ១៩ឆ្នាំ រស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ពីបទថា រំលោភនិងគំរាម ហើយត្រូវមន្ត្រីធម្មការនិងសាសនាខេត្ត រួមជាមួយមន្ត្រីសង្ឃផ្សឹកត្រូវបានបញ្ចប់នៅម៉ោង៣រសៀលថ្ងៃទី៥ ខែមិថុនា នៅវត្តសុមាធិផល ស្ថិតក្នុងសង្កាត់ព្រះពន្លា ក្រុងសិរីសោភ័ណ ។
លោកបានបញ្ជាក់ថា ពេលកំពុងធ្វើពិធីផ្សឹកដ៏រំជើបរំជួល មិនធ្លាប់មានពីមុនមកនោះ លើលោក ស្រិល
វណ្ណា គេឃើញប្រជាពលរដ្ឋជាច្រើនរយនាក់ បានមកចោមរោមតាមដានហេតុការណ៍នោះ ធ្វើឱ្យមានការព្រួយបារម្ភខ្លាចមានផ្ទុះអធិករណ៍កើតឡើង និងដើម្បីការពារសុវត្ថិភាព ទើបកម្លាំងនគរបាលស្នងការដ្ឋាននគរបាលខេត្តប្រមាណ១០នាក់មកការពារនាំឡើងរថយន្តដឹកមកស្នងការដ្ឋាននគរបាលខេត្ត ។ លោក
យិម យឿន បានបញ្ជាក់ទៀតថា នៅម៉ោងជាង៣រសៀលថ្ងៃដដែល មន្ត្រីធម្មការនិងសាសនា រួមជាមួយមន្ត្រីសង្ឃបាននាំលោក ស្រិល វណ្ណា ទៅវត្តភ្នំបាក់លើវិញ ដើម្បីត្រួតពិនិត្យសម្ភារផ្ទាល់ខ្លួនត្រូវបានប្រគល់ជូនលោកយកទៅផ្ទះចុះ ។ ជាមួយគ្នានេះ ក៏មានការតែងតាំងបណ្តោះអាសន្នចៅអធិការវត្តភ្នំបាក់លើស្តីទីព្រះនាម សុភា ទិត្យ សាមណេរដែលបួស៥វស្សាមកហើយនៅវត្តភ្នំបាក់លើស្ថិតភូមិភ្នំបាក់ សង្កាត់ទឹកផ្លា ក្រុងសិរីសោភ័ណ ។
តាមព័ត៌មានទទួលបានឱ្យដឹងខ្លះៗថា រឿងផ្សឹកចៅអធិការវត្តភ្នំបាក់លើ តាមការចោទប្រកាន់ពីស្ត្រីម្នាក់ពីបទរំលោភ និងគម្រាមជិត៥ខែមកហើយ ទើបផ្ទុះរឿង ដោយសារការបង្ហោះរូបភាពចៅអធិការវត្តភ្នំបាក់លើ ដែលមានភាពស្និទ្ធស្នាលជាមួយស្ត្រីដែលចោទ ហើយវីដេអូឃ្លីបនោះ ក៏មានការប៉ះពាល់ដល់ព្រះពុទ្ធសាសនាទើបមានទោសបរាជិកត្រូវបានផ្សឹក ។
រឿងរ៉ាវដែលនារីវ័យក្មេងឈ្មោះ កាយ លីតា ចោទប្រកាន់និងគ្រោងប្តឹង តែត្រូវបានចាស់ទុំសម្របសម្រួលគ្នាសុំកុំឱ្យប្តឹង ដើម្បីជជែកគ្នារកដំណោះស្រាយបន្តទៀត ។ មិនទាន់មានប្រភពច្បាស់ការណ៍នៅឡើយទេថា តើភាគីទាំង២ និងបន្តការដោះស្រាយគ្នាដោយរបៀបណានោះ ក៏មិនទាន់ដឹងច្បាស់ដែរ ។ ប៉ុន្តែអ្វីដែលគួរកត់សម្គាល់នោះ គឺនៅពេលទៅដល់ផ្ទះ ឃើញមានអ្នកស្រុកចោមរោមអបអរសាទរយ៉ាងស្និទ្ធស្នាល ប្រៀបដូចអត់ខ្វល់រឿងអន្ទិតធ្វើឱ្យខូចកិត្តិយសវត្តដែលបានបង្កើតឱ្យមានរឿងស្រីញីស្អីគេនោះ ៕
ចែករំលែកព័តមាននេះ