រាជធានីភ្នំពេញ ៖ កម្លាំងសមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ កាលពីថ្ងៃទី០៣ មិថុនា ២០១៨ បានធ្វើការស្រាវជ្រាវឈានដល់ការឃាត់ខ្លួនសង្ស័យជាមុខសញ្ញាប្លន់ប្រដាប់អាវុធ បានចំនួន៣នាក់ និងដកហូតបានអាវុធខ្លី១ដើមជាមធ្យោបានធ្វើសកម្មភាព។ ជនសង្ស័យទាំង៣នាក់នោះមាន ១.ឈ្មោះ ម៉ន សិត ហៅប្រុស ភេទប្រុស អាយុ២៥ឆ្នាំ ស្នាក់នៅបន្ទប់ជួលលេខ៩ ផ្លូវលំ(លូប្រាំ) សង្កាត់ស្ទឹងមានជ័យ៣ ខណ្ឌមានជ័យ មុខរបរជាបុគ្គលិកក្រុមហ៊ុនចាក់បង្គោលភ្លើង។ ២.ឈ្មោះ យុន ហាក់សីហា ហៅយុត ភេទប្រុស អាយុ៣០ឆ្នាំ ស្នាក់នៅបន្ទប់ជួលលេខ៩ ផ្លូវលំ(លូប្រាំ) សង្កាត់ស្ទឹងមានជ័យ៣ ខណ្ឌមានជ័យ (មានផ្ទុកសារធាតុញៀន) មុខរបរបុគ្គលិករោងចក្រកាត់ដេរ។
និង៣.ឈ្មោះ ពុំ ចែត ហៅម៉ៅ ភេទប្រុស អាយុ៣៩ឆ្នាំ ស្នាក់នៅផ្ទះជួលម្តុំលូប្រាំ សង្កាត់ស្ទឹងមានជ័យ៣ ខណ្ឌមានជ័យ មុខរបរមិនពិតប្រាកដ ជននេះ(មានផ្ទុកសារធាតុញៀន)ក្នុងខ្លួន។ ទាក់ទិននឹងការឃាត់ខ្លួនជនសង្ស័យ៣នាក់ខាងលើនេះ លោកវរសេនីយ៍ឯក អេង សោភា នាយការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ បានឲ្យដឹងថា ជនសង្ស័យ១ក្រុមនេះជាមុខសញ្ញាធ្វើសកម្មភាពប្លន់ប្រដាប់អាវុធជាច្រើនលើក គឺប្លន់នៅរាជធានី និងតាមមណ្តាលខេត្ត ភាគច្រើនប្លន់ម៉ូតូ និងប្លន់ទូរស័ព្ទដៃពីជនរងគ្រោះ។ នៅពេលឃាត់ខ្លួនសមត្ថកិច្ចបានធ្វើការដកហូតវត្ថុតាងរួមមាន ១.ម៉ូតូ០១គ្រឿងម៉ាកហុងដា សេ១២៥ ស៊េរី២០១៥ ពណ៌ខ្មៅ ស្លាកលេខភ្នំពេញ 1CK-4447(មធ្យោបាយធ្វើសកម្មភាព)។
២.អាវុធខ្លី០១ដើម ម៉ាកកា៥៤ឈូសលេខ បង់០១ គ្រាប់០៤គ្រាប់។ ៣.ទូរសព្ទ័ដៃ០១គ្រឿងម៉ាកអាយហ្វូន៦ ពណ៌ទឹកប្រាក់ (ទូរសព្ទ័ជនរងគ្រោះ)។ ចំណែកម៉ូតូជនរងគ្រោះ ដោយមានការឯកភាពពីលោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងទូរសព្ទ័០១គ្រឿងម៉ាក អាយហ្វូន៦ ពណ៌ ទឹកប្រាក់ បានប្រគល់ឲ្យជនរងគ្រោះវិញ។ ក្រោយពីបញ្ចប់កិច្ចការសាកសួរហើយជនសង្ស័យ និង វត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការទៅតាមនីតិវិធី៕
ចែករំលែកព័តមាននេះ