ខេត្តក្រចេះ ៖ ករណីវិវាទដីធ្លីពីពលរដ្ឋចំនួនជាង៣០គ្រួសារដែលអះអាងថា ជាម្ចាស់លំនៅឋានដីចម្ការ ហើយក៏មានមនុស្សមួយក្រុមតាំងខ្លួនជាសមត្ថកិច្ចចុះរុះរើកម្ទេចចោលអស់ផ្ទះ៤ខ្នង ទើបពួកគាត់ប៉ុនប៉ងតវ៉ាបិទផ្លូវជាតិលេខ៧ ដើម្បីឲ្យទាមទារឲ្យអាជ្ញាធររកដំណោះស្រាយនោះ ហើយស្ថានការណ៍ត្រូវបានធូរស្រាលវិញក្រោយពីមានការចុះទៅសម្របសម្រួលពីអាជ្ញាធរស្រុក។
ការនាំគ្នាមកទាមទាររបស់ក្រុមប្រជាពលដ្ឋចំនួនជាង៣០គ្រួសារ ដែលអះអាងថា ជាម្ចាស់ដីចម្ការ និងលំនៅឋានជាប់និងផ្លូវជាតិលេខ៧ នៅចំណុចភូមិអូរអណ្តាស ក្នុងឃុំអូរគ្រៀង ស្រុកសំបូរ បានកើតមានឡើងនៅព្រឹកថ្ងៃទី៦ មិថុនា បន្ទាប់ពីមានមនុស្សមួយក្រុមមានស្លៀកពាក់ឯកសណ្ឋានសមត្ថកិច្ច នៅតែបន្តចុះរុះរើលំនៅឋានចម្ការរបស់ពួកគាត់ ដោយសំអាងហេតុផលថា ការសាងសង់លំនៅឋានរបស់ពួកគាត់គឺសង់នៅលើដីរបស់ក្រុមហ៊ុន។
ក្រុមពលរដ្ឋដែលផ្ទុះការតវ៉ាប៉ុនប៉ងបិទផ្លូវជាតិដើម្បីទាមទាររកដំណោះស្រាយនាព្រឹក នោះបានរៀបរាប់ថា ទីតាំងដីដែលពួកគាត់កំពុងតែកាន់កាប់ទាំងនេះគឺពួកគាត់បានទិញតៗពីគ្នា និងបានកាន់កាប់តាំងពីឆ្នាំ២០០៦មកម៉្លេះ ។ ក្រោយពីបានធ្វើផ្ទះសម្រាប់ស្នាក់នៅសព្វថ្ងៃ ដីទាំងនោះក៏ពួកគាត់កំពុងតែបង្កបង្កើនផលដំណាំគ្រប់ប្រភេទផងដែរ។
ពលរដ្ឋទាំងនោះរៀបរាប់ថា ការនាំគ្នាចេញមកតវ៉ារបស់ពួកគាត់នេះ គឺធ្វើឡើងបន្ទាប់ពីអំឡុងរយៈពេលប៉ុន្មានថ្ងៃជាប់ៗគ្នា មានមនុស្សមួយក្រុមស្លៀកពាក់ឯកសណ្ឋានជាសមត្ថកិច្ចបានចុះមករុះរើលំនៅឋានរបស់ពួកគាត់ចោលទាំងស្រុងអស់ចំនួន៤ខ្នងផ្ទះ ហើយការរុះរើរបស់ក្រុមសមត្ថកិច្ចទាំងនោះ គឺមិនមានហេតុផលសមស្របណាមួយនោះទេ។ ដោយក្រុមសមត្ថកិច្ចទាំងនោះអះអាងថា នឹងបន្តរុះរើលំនៅឋានអនាធិបតេយ្យនៅតំបន់នេះចោលទាំងអស់ ទើបពលរដ្ឋមានការព្រួយបារម្ភ ហើយពលរដ្ឋឈានដល់ការតវ៉ាដើម្បីទាមទារ រកដំណោះស្រាយបែបនេះ។
បើតាមអាជ្ញាធរស្រុកសំបូរ បាននិយាយថា កន្លងមកដីនៅតំបន់នេះ ជាដីរបស់ក្រុមហ៊ុនឯកជនមួយដោយមិនដឹងថាជាក្រុមហ៊ុនវិនិយោគអ្វីនោះទេ។ ក្រោយមកដីនោះត្រូវបានពលរដ្ឋចូលមកកាន់កាប់តៗគ្នា រហូតសង់ជាលំនៅឋាន ដាំដុះបន្លែបង្កា និងដំណាំផ្សេងៗ ក្លាយជាភូមិករទៅហើយ។
ជុំវិញការលើកគ្នាតវ៉ានេះ លោកវរសេនីយ៍ឯក ប៊ុន ឈឿន បានប្រាប់ឲ្យដឹងថា បាតុភាពការតវ៉ានេះមិនបានបង្កឲ្យមានហិង្សាណាមួយនោះទេ ដោយគ្រាន់ តែពលរដ្ឋបាននាំគ្នាប្រមូលផ្តុំ និងប៉ុនប៉ងលើកកំណាត់ឈើផ្ទះ ដែលត្រូវរុះរើមកដាក់ពង្រាយ លើផ្លូវជាតិក្នុងចេតនាតវ៉ាបិទផ្លូវ។ តែយ៉ាងណា ស្ថានការណ៍នេះត្រូវបានអាជ្ញាធរចុះទប់ស្កាត់ទាន់ពេល។
លោកបានបញ្ជាក់ថា រហូតមកទល់នឹងរសៀលថ្ងៃទី៦ មិថុនា ពលរដ្ឋមិនមានការប្រមូលផ្តុំទៀតនោះទេ ខណៈដែលអាជ្ញាធរកំពុងតែសាកសួរទៅលើក្រុមមនុស្សទាំង៦នាក់នោះដែលមានចេតនាមករុះរើលំនៅឋានពលរដ្ឋ ឲ្យពួកគេមានសំណងខ្លះជូនទៅពលរដ្ឋវិញអោយសមស្របដោយប្រការណាមួយ៕
ចែករំលែកព័តមាននេះ