ខេត្តបាត់ដំបង ៖ ការប្រគល់វិញ្ញាបនបត្រ ISO 9001-2015 ដល់វិទ្យាស្ថានបច្ចេកវិទ្យាបាត់ដំបង នាវេលាព្រឹកថ្ងៃទី០៦ ខែមិថុនា ឆ្នាំ២០១៨ ក្រោមអធិបតីភាពលោកបណ្ឌិត…
ខេត្តបាត់ដំបង ៖ ការប្រគល់វិញ្ញាបនបត្រ ISO 9001-2015 ដល់វិទ្យាស្ថានបច្ចេកវិទ្យាបាត់ដំបង នាវេលាព្រឹកថ្ងៃទី០៦ ខែមិថុនា ឆ្នាំ២០១៨ ក្រោមអធិបតីភាពលោកបណ្ឌិត ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ។ លោក ងួន រតនៈ អភិបាលខេត្តបាត់ដំបង ព្រមទាំងប្រធានមន្ទីរនានាជុំវិញខេត្ត តំណាងក្រុមហ៊ុនរោងជាងដែលជាដៃគូរសរុបរួមប្រមាណជាង២០០នាក់បានចូលរួម ។
លោកអ៊ុក ដាវ៉ាន់ឌី នាយកវិទ្យាស្ថានបច្ចេកវិទ្យាបាត់ដំបងបានអានរបាយការណ៍ និងប្រវត្តិនៃការកកើតវិទ្យាស្ថាននេះ តាំងពីឆ្នាំ១៩៨៩ ដោយមានការជួយឧបត្ថម្ភពីអង្គការយុវជនសេរីអាល្លីម៉ង់ នៃអតីតប្រទេសអាល្លីម៉ង់ខាងកើត ដើម្បីជំរុញសកម្មភាពការងារបណ្តុះបណ្តាលឲ្យមាននិរន្តរភាព ដើម្បីរួមចំណែកក្នុងយុទ្ធសាស្ត្រកាត់បន្ថយភាពក្រីក្ររបស់រាជរដ្ឋាភិបាលកម្ពុជា ដោយបានកសាងអគារ រោងជាងតាមមុខជំនាញបានចំនួន២១ខ្នង ក្នុងផ្ទៃដី១៣ហិកតា ស្ថិតនៅក្នុងក្រុងបាត់ដំបងបានបណ្តុះបណ្តាលសិក្ខាកាមសិស្ស និស្សិតក្នុង១ឆ្នាំៗប្រមាណ១ពាន់នាក់ បានយកចំណេះវិជ្ជាចេញទៅប្រកបការងារ ដើម្បីជួយផ្គត់ផ្គង់ជីវភាពក្នុងគ្រួសារប្រកបដោយគុណភាព ។
លោក ងួន រតនៈអភិបាលខេត្តបាត់ដំបងបានថ្លែងថា នេះ គឺជាការទទួលស្គាល់គុណភាពការបណ្តុះបណ្តាលវិជ្ជាជីវៈបន្តរហូតមកបានទទួលស្គាល់ពីអង្គការស្តង់ដារអន្តរជាតិ (ISO) លើផ្នែកគ្រប់គ្រងបណ្តុះបណ្តាលបច្ចេកទេស និងវិជ្ជាជីវៈនៅទីនេះដូច្នេះសូមកូនក្មួយៗទាំងអស់យកចិត្តទុកដាក់ក្រេបជញ្ជក់យកចំណេះដឹងពីទីនេះ ដែលជាធនធានមនុស្សយកទៅប្រើប្រាស់ ដើម្បីលើកកម្ពស់ជីវភាពឲ្យមានភាពល្អប្រសើរបន្ថែមទៀត ។
លោកអភិបាលខេត្តបានប្រៀបធៀបអំពីរបបប្រជាធិបតេយ្យ តើមានពិតនៅកម្ពុជាឬទេ ? ដែលមានជនមួយចំនួននៅក្រៅប្រទេសតែងតែវាយតម្លៃក្នុងស្ថានភាពអាក្រក់រហូតមក តែតាមពិតនេះ គឺជាលទ្ធផលដែលអង្គការអន្តរជាតិបានមើលឃើញពីគុណភាពរបស់កម្ពុជាហើយទើបបានប្រគល់ទទួលស្គាល់វិញ្ញាបនបត្រ ISO 9001-2015 ដល់ទីនេះ ។ បន្ទាប់មកលោកបណ្ឌិត ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានថ្លែងថា គុណភាពនៃចំណេះដឹងផ្នែកធនធានមនុស្ស គឺជាកត្តាកំណត់នៃភាពជោគជ័យរបស់យើងគ្រប់ៗគ្នានាពេលអនាគតដោយមាន ភាពជាអ្នកដឹកនាំ និងមានការចូលរួមពីមហាជន ឲ្យមានដំណើរការល្អ ហើយត្រូវតែមានការកែលំអជាប្រចាំ ។
លោកបណ្ឌិតបានរំលឹកអំពីប្រទេសដែលកើតមានសង្គ្រាម គឺបណ្តាលឲ្យមានជនភៀសខ្លួនរត់ចេញទៅនៅក្រៅប្រទេស ហើយស្រែកទាមទាររកប្រជាធិបតេយ្យចុះពេលនេះ តើកម្ពុជាកំពុងទទួលបានអ្វីមកវិញខ្លះ ? គឺកំពុងមានការរីកដុះដាលពេញផ្ទៃប្រទេសដោយសារមានសម្តេចតេជោហ៊ុន សែនបានដឹកនាំផ្តួលរំលំរបបកាប់សម្លាប់ ប្រមូលខ្មែរមករួបរួមគ្នាពន្លត់ភ្លើងសង្គ្រាម ហើយនាំគ្នាថែររក្សាសុខសន្តិភាព កសាងអភិវឌ្ឍន៍ប្រទេសរហូតមកដល់ពេលនេះ តែក៏នៅតែមានអ្នកនៅក្រៅស្រុកចេះតែស្រែកថា (ឲ្យដូររបបនេះចេញទៅ ដូរឬមិនដូរ ?) តើយើងនៅទីនេះបានឃើញដឹងផ្ទាល់ហើយថា តើគេចង់ដូរយកអ្វីមកវិញ ?
បើស្រុកយើងទទួលបានការកសាងអភិវឌ្ឍន៍ចេញពីគំនរផេះផង់មកហើយនោះ គឺយើងទាំងអស់គ្នាមិនព្រមជាដាច់ខាត ព្រោះយើងនៅទីនេះត្រូវរួមគ្នាថែរក្សាសុខសន្តិភាព បណ្តុះបណ្តាលធនធានមនុស្សបន្ថែមទៀត ព្រោះសម័យឥឡូវកូនក្មួយចៅៗជំនាន់ក្រោយកំពុងក្រេបចំណេះដឹងតាមបែបទាន់សម័យនៃពិភពលោក ដូច្នោះសូមខិតខំរួមគ្នាថែរក្សាសុខសន្តិភាព ដើម្បីយើងទាំងអស់គ្នា និងកុំភ្លេចចូលរួមការបោះឆ្នោតនាពេលខាងមុខនេះ ដើម្បីរក្សាស្ថានភាពសុខសប្បាយរុងរឿងក្នុងប្រទេសកម្ពុជាកុំឲ្យបាត់បង់ទៅវិញឲ្យសោះ ។
ជាចុងក្រោយបន្ទាប់ពីប្រគល់វិញ្ញាបនបត្រ ISO 9001-2015 រួចហើយ ក៏មានប្រគល់រង្វាន់លើកទឹកចិត្តដល់មន្ត្រីក្នុងវិទ្យាស្ថាន និងជូនថវិកាលោកគ្រូអ្នកគ្រូ៥៥នាក់ ក្នុងម្នាក់ទទួលបាន២ម៉ឺនរៀល សិស្សនិស្សិតចំនួន១៥០នាក់ ក្នុងម្នាក់ៗទទួលបាន១ម៉ឺនរៀលផងដែរ ៕
ចែករំលែកព័តមាននេះ